LÈSON 35
Ka pou ou fè pou ou pran bon désizyon
Noutout ni désizyon a pran an vi an nou. Pa ègzanp, fò-nou chwazi èvè kimoun nou ké mayé, ki travay nou ké fè, oben ola nou ké rété. Sé kalité désizyon-lasa ka aji swa anbyen swa anmal anlè vi an nou é anlè lanmityé an nou èvè Jéova. Si nou pran sé bon désizyon-la, nou ké adoumanman é Jéova ké fyèw dè nou.
1. Kijan Bib-la pé édé-nou pran bon désizyon ?
Avan ou pran on désizyon, priyé Jéova pou mandé-y édé-w é chèché an Bib-la pou sav ka i ka pansé dè chwa-la ou ni a fè la (li Pwovèb 2:3-6). Délè, ou ké pé touvé on lwa ki klè é ki ka tonbé kòtòk èvè sitiyasyon-la ou ka viv la. Adan ka-lasa, méyè biten ou pé fè sé suiv lwa-lasa.
É vinvwè Bib-la pa’a di-w ègzaktèman ka pou ou fè ? Kanmenmsa, Jéova ké « gidé-w asi chimen-la ou dwètèt maché la » (Izayi 48:17). É sé vré, piskè adan Bib-la ou pé touvé onlo prensip ki pé édé-w. Sé prensip-la ki an Bib-la sé dé vérité ki enpòwtan é ki ka montré sa Bondyé ka pansé oben sa i ka rèsanti. Dépawfwa, lè nou ka li on istwa adan Labib, nou ka aprann ka Jéova ka pansé dè tèl ou tèl biten. É lè nou vin sav ka i ka pansé, a moman-lasa nou pé pran désizyon ki ka fè-y plézi.
2. Avan ou pran on désizyon, asi ki biten fò ou réfléchi ?
Mi sa Labib ka di : « Nonm-la ki ka pran prékosyon a-y ka véyé chak pa i ka fè » (Pwovèb 14:15). Sa vé di kè avan nou pran on désizyon, fò-nou pran tan réfléchi. É adan réflèksyon an nou, fò-nou mandé-nou : « Ki prensip ki k’ay èvè sitiyasyon-lasa ? Si an pran désizyon-lasa, ès lèspri an mwen ké trankil ? Kijan désizyon an mwen ké aji asi dòt moun ? » É on kèsyon ki pi enpòwtan ankò sé : « Ès sa ké fè Jéova plézi ? » (Détéwonòm 32:29).
Jéova andwa di-nou ka ki bon é ka ki pa bon. Lè nou ka pran tan konnèt lwa a Jéova é prensip a-y é kè nou ka fè bon éfò pou nou pé sa suiv-yo, sa ka fòwmé konsyans an nou. Konsyans-la sé on biten ki andidan an nou é ki ka di-nou lè on biten bon é lè on biten pa bon (Women 2:14, 15). On konsyans ki fòwmé pou fè sa ki byen ké édé-nou pran bon désizyon.
AN-NOU FOUYÉ PI FON
An-nou vwè kijan sé prensip-la ki an Bib-la é konsyans an nou pé édé-nou lè nou bizwen pran on désizyon.
3. Lésé Bib-la gidé-w
Kijan sé prensip-la ki an Bib-la pé édé-nou pran bon désizyon ? Gadé VIDÉO-la é fè on ti kozé asi sé kèsyon-la ki ka vin la.
-
Dapré vidéo-la, ki bèl kado Jéova fè-nou ?
-
Poukwa Jéova ka lésé-nou lib dè chwazi ka nou vlé fè ?
-
Ka Jéova ban-nou pou pèwmèt-nou sèvi byen konm i fo èvè libèté-lasa ?
Li Éfézyen 5:15, 16. Adan sé vèwsé-lasa, nou ka touvé prensip-lasa : « Sèvi èvè tan-la zò ni la méyè fason ki tini. » Kijan ou pé apliké prensip-lasa...
-
pou ou li Bib a-w chakjou ?
-
pou ou pasé plis tan èvè moun-la ou mayé èvè-y la, èvè timoun a-w, oben èvè manman-w é papa-w ?
-
pou ou ay adan réinyon a lasanblé-la ?
4. Fòwmé konsyans a-w pou ou pran bon désizyon
Pi souvan ki rarman, lè Bib-la ka di-nou ègzaktèman ka pou nou fè, sa pi fasil dè pran bon désizyon-la. Men si i pa’a di-nou ègzaktèman kijan pou nou aji, ka pou nou fè ? Gadé VIDÉO-la é fè on ti kozé asi kèsyon-la ki ka vin la.
-
Ka Emma fè pou fòwmé konsyans a-y é pou i pran on désizyon ki k’ay an sans a Jéova ?
Poukwa fò pa nou mandé dòt moun désidé an plas an nou ? Li Ébré 5:14 é fè on ti kozé asi sé kèsyon-lasa :
-
Lè nou ka touvé-nou adan on sèwten sitiyasyon, nou byen enmé mandé on moun ka i té’é fè si i té anplas an nou. Men ka fò-nou rivé a fè noumenm an nou ?
-
Ki zouti nou ni a dispozisyon an nou pou nou pé sa fòwmé konsyans an nou é pran bon désizyon ?
Menmjan on kat ka édé on moun sav ki dirèksyon pou i pran, menmjan-la, konsyans an nou ka édé-nou désidé ki chimen pou nou pran adan lavi.
5. Rèspèkté konsyans a lézòt
Noutout diféran, kifè, nou pa’a pran sé menm désizyon-la. Alò kijan nou pé montré kè nou ka rèspèkté konsyans a lézòt ? An-nou pran 2 ègzanp :
On 1é sitiyasyon : On sè ki byen enmé suiv on sèwten mòd pou abiyé rivé adan on nouvo lasanblé. Men sè a nouvo lasanblé a-y pa gè enmé mòd-lasa.
Li Women 15:1 é 1 Korentyen 10:23, 24, é fè on ti kozé asi sé kèsyon-lasa :
-
Si sè-la ka suiv sa ki maké adan sé vèwsé-lasa, ki désizyon i pé rivé a pran ? Imajiné konsyans a-w ka pèwmèt-vou fè on biten, men biten-lasa ka chouboulé konsyans a ondòt moun, ki désizyon ou ké pran ?
Mi on 2èm sitiyasyon : Menmsi Labib pa ka entèwdi on moun bwè alkòl, on frè désidé kè i pé’é bwè pon gout alkòl. Men lèwgadé, yo envité-y adan on swaré é i ka konstaté kè ni dòt Témwen ki ka bwè alkòl.
Li Éklézyas 7:16 é Women 14:1, 10, é fè on ti kozé asi sé kèsyon-lasa :
-
Si frè-la ka suiv sé vèwsé-lasa, ka i pé rivé a fè ? Si ou ka vwè on moun ka fè on biten kè konsyans a-w pa’a pèwmèt-vou fè, kijan ou ké réyaji ?
Ka pou ou fè pou-w pran on bon désizyon ?
1. Mandé Jéova édé-w sav ka pou ou fè (Jak 1:5).
2. Chèché an Bib-la é adan piblikasyon an nou pou sav ki prensip ki k’ay èvè sitiyasyon a-w. Anplisdisa, ou pé palé sa èvè krétyen ki ni èkspéryans.
3. Réfléchi pou vwè kijan désizyon a-w ké aji asi konsyans a-w é asi konsyans a lézòt.
MI SA MOUN KA DI : « Sa moun ka pansé sé pwoblèm a yo. An ni dwa fè sa an vlé ! »
-
Poukwa fò-nou tchenn kont dè sa Bondyé ka pansé é dè sa lézòt ka rèsanti ?
ON TI RÉZIMÉ
Pou nou pran bon désizyon, fò-nou sav ka Jéova ka pansé. Anplisdisa, fò-nou réfléchi pou vwè kijan sa nou kay fè ké aji asi lézòt. Fò-nou éséyé vwè si sé anbyen oben si sé anmal sa ké aji asi yo.
Ka ou woutyenn
-
Kijan ou pé pran désizyon ki ké fè Jéova plézi ?
-
Ka ou pé fè pou fòwmé konsyans a-w ?
-
Kijan ou ka montré kè ou ka rèspèkté konsyans a lézòt ?
AY GADÉ SA OSI
Ka pou ou fè pou ou pé sa pran désizyon ki ké fè-w vin pibon zanmi èvè Bondyé ?
« Prenons des décisions qui honorent Dieu » (Tou dè Gad a 15 avril 2011 an fransé)
Pou Jéova ban-nou konsèy, i ka sèvi èvè plizyè biten diféran. Ki biten ésa ?
Sa ki édé on jennboug pran on désizyon ki té rèd a pran.
Kijan nou pé pran on désizyon ki ka fè Jéova plézi menm lè Labib pa’a di-nou ka pou nou fè ègzaktèman ?
« Vous faut-il un commandement pour tout ? » (Tou dè Gad a 1é désanm 2003 an fransé)
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
