LÈSON 37
Ka Labib ka di anrapò èvè travay é anrapò èvè lajan ?
Ès sa ja rivé-w dè pa dòmi lannuit pas tèt a-w chajé parapòt a travay oben parapòt a pwoblèm a lajan ? Si nou vlé gangné vi an nou é anmenmtan sèvi Jéova dè-tou-kè, a pa on biten ki toujou fasil. Men sé konsèy-la ki an Bib-la pé édé-nou.
1. Ka Labib ka di anrapò èvè travay ?
Bondyé vlé kè nou travay èvè plézi. Bib-la ka di kè « pa ni pibon biten pou on nonm ki [...] pran plézi adan travay rèd la i ka fè la » (Éklézyas 2:24). Jéova ka travay rèd menm. Lè nou ka imité-y, nou ka fè-y plézi é noumenm an nou, nou ka kontan.
Sé vré, travay, sé on biten ki enpòwtan. Men fò pa on moun fè travay-la pasé avan sa i ni a fè pou Jéova (Jan 6:27). Bondyé ka pwomèt-nou kè si nou ka mété-y prèmyé douvan adan vi an nou, i ké ban-nou tousa nou bizwen pou viv.
2. Ki enpòwtans pou nou ba lajan ?
Labib ka di kè « lajan sé on pwotèksyon », men anmenmtan, i ka fè-nou konprann kè a pa sa ki ka ban-nou tchè-kontan (Éklézyas 7:12). I ka di-nou kè fò pa nou enmé lajan, men kè fò-nou ‘kontanté-nou dè sa nou ni’ (li Ébré 13:5). Lè nou ka suiv konsèy-lasa, sa ka pwotéjé-nou, pas nou pa ka enkyèt menmjan ki on moun ki toujou vlé ni plis. Nou pa ka mèt dèt initil anlè do an nou nonplis (Pwovèb 22:7). É nou pa’a rantré adan pon kalté biten ki ké fè-nou vin rich vitman swadizan, paskè sé biten-lasa sé zatrap ki danjéré toubònman.
3. Ni mwayen nou fè onlo bon biten èvè lajan an nou. Ki biten ésa ?
Jéova sé on Bondyé ki donan é nou ké imité-y si nou ka ‘montré-nou donan, é si men an nou ka rété gran wouvè’ (1 Timoté 6:18). Sé on bon biten nou ka fè èvè lajan an nou lè nou ka mèt on monné adan sé bwat a ofrann la é lè nou ka édé moun zafè a yo mélé, siwtou lèwvwè sé frè é sè an nou adan lasanblé-la. Sa ki pi enpòwtan pou Jéova a pa konmen nou ka bay, men sé sa ki ka pousé-nou bay. Si nou ka fè on don èvè tout tchè an nou, nou ké kontan é nou ké fè Jéova plézi (li Akt 20:35).
AN-NOU FOUYÉ PI FON
An-nou vwè ki bénéfis sa ka pwokiré-nou lè nou pa’a ba travay twòp enpòwtans, é lè nou ka kontanté-nou dè sa nou ni.
4. An-nou onoré Jéova lè nou ka travay
Si nou bon zanmi èvè Jéova, nou ké ba travay enpòwtans-la pou nou ba-y la. Gadé VIDÉO-la é fè on ti kozé asi sé kèsyon-la ki ka vin la.
-
Ès ou vwè kijan Jason té ka fonksyonné adan travay a-y, é ki konpòwtèman i té ni ?
-
Ka i ka fè pou i pa ba travay-la twòp enpòwtans ?
Li Kolosyen 3:23, 24 é fè on ti kozé asi kèsyon-lasa :
-
Poukwa fò-nou travay rèd ?
Sé vré, travay, sé on biten ki enpòwtan. Men fò pa on moun fè travay-la pasé avan sa i ni a fè pou Jéova.
5. Lè nou ka kontanté-nou dè sa nou ni, sé yenki bon biten sa ka pòté
Ni onlo moun ki ka éséyé fè ansòt pou pòch a yo plen lajan. Men a pa konsa Bib-la ka ankourajé-nou vwè sa. Li 1 Timoté 6:6-8 é fè on ti kozé asi kèsyon-lasa :
-
Ki konsèy Labib ka ban-nou ?
On moun ki pa ni onlo lajan pé ni tchè-kontan. Gadé VIDÉO-la é fè on ti kozé asi kèsyon-la ki ka vin la.
-
Menmsi yo maléré, pou ki biten sé fanmi-lasa ni tchè-kontan ?
On moun pé ja ni onlo lajan, men i pa jen ni asé. Jézi èspliké kè on mantalité konsa danjéré toubònman. Li Lik 12:15-21 é fè on ti kozé asi kèsyon-lasa :
-
Ka istwa-la Jézi rakonté la aprann-vou ? (gadé vèwsé 15 la).
Li é konparé Pwovèb 10:22 é 1 Timoté 6:10. Aprésa, fè on ti kozé asi sé kèsyon-lasa :
-
Sèlon vou, ka ki pi enpòwtan ? Vin bon zanmi èvè Jéova, oben ni onlo lajan ? Poukwa ?
-
Ki pwoblèm ou pé rivé a jwenn si ou pa’a jen las kouri dèyè lajan ?
6. Jéova ké pran swen an nou
Lè nou pa ni travay oben lè nou ni pwoblèm a lajan, sé on lokazyon pou nou montré si nou ka fè Jéova konfyans poubon. Gadé VIDÉO-la pou vwè kijan nou pé rivé about a sé kalté pwoblèm-lasa. Aprésa, fè on ti kozé asi sé kèsyon-la ki ka vin la.
-
Ki difikilté frè-la jwenn ?
-
Ka i fè pou i té rivé about a yo ?
Li Matyé 6:25-34 é fè on ti kozé asi kèsyon-lasa :
-
Si on moun ka mèt Jéova prèmyé douvan an vi a-y, ka Jéova pwomèt i ké fè pou-y ?
MI SA MOUN KA DI : « Fò an travay rèd pou an ba fanmi an mwen bwè é manjé. An pé pa ay réinyon toutlè ! »
-
Ki vèwsé ki ka montré-w kè Jéova ké toujou ba-w sa ou bizwen si ou mété-y prèmyé douvan an vi a-w ?
ON TI RÉZIMÉ
Travay é lajan sé 2 biten ki nésésè, men fò pa nou jen lésé-yo anpéché-nou sèvi Jéova.
Ka ou woutyenn
-
Ka ki pé édé-w ba travay-la enpòwtans-la pou ou ba-y la ?
-
Lè ou ka kontanté-w dè sa ou tini, ki bénéfis sa pé pwokiré-w ?
-
Jéova ka pwomèt kè i ké pran swen a pèp a-y. Kijan ou pé montré kè ou ni konfyans adan pwomès-lasa ?
AY GADÉ SA OSI
Èskè dapré Labib, lajan sé biten a Dyab ?
« Èskè sé lajan ki dèyè tout pwoblèm ki tini ? » (on awtik ki asi jw.org)
An-nou vwè kijan nou pé sèvi èvè lajan an nou pou fè Bondyé plézi.
« Lè nou ka bay, ka Bondyé ka pansé dè sa ? » (on awtik ki asi jw.org)
Èskè jé a lajan sé on bon biten ?
« D’après la Bible : Les jeux d’argent » (Réveillez-vous ! a maws 2015)
On vòlè ki té ka jouwé jé chanjé bout-pou-bout. Ka ki pousé-y fè sa ?
« Les courses de chevaux étaient ma passion » (Tou dè Gad a 1é novanm 2011 an fransé)
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
