Padavwa nou vivan, ni onlo biten èstraòwdinè nou pé fè é ki pé rann tchè an nou kontan. É menmsi nou plen pwoblèm, toujou ni on tibiten adan lavi ki pé rann tchè an nou kontan. Kijan nou pé montré Jéova kè vi-la i ban-nou la ni onlo enpòwtans pou nou ? É ki prèmyé rézon ki ka pousé-nou fè sa ?

1. Poukwa nou dwètèt ba lavi onlo valè ?

Fò-nou ba lavi onlo valè paskè sé Jéova, Pap’an nou ki plen lanmou, ki fè-nou kado-y. Sé li ki sé « sous a lavi ». Sé-y ki kréyé tousa ki vivan (Sòm 36:9). « Sé-y ki ka ba toutmoun lavi èvè souf-la é tout biten » (Akt 17:25, 28). Jéova ka ban-nou tousa nou bizwen pou viv. Men i k’ay pli lwen ki sa ; i mèt plizyè varyété biten a dispozisyon an nou pou nou aprésyé lavi é pou nou pran plézi (li Akt 14:17).

2. Kijan nou pé montré Jéova kè lavi ni onlo valè pou nou ?

Dépi andidan vant a manman-nou, vi an nou ni onlo enpòwtans pou Jéova. Adan Labib, on sèwvitè a Bondyé non a-y sé David té ka priyé Bondyé é mi sa i di-y : « Dé zyé a-w vwè-mwen lè an té toupiti an vant a manman-mwen » (Sòm 139:16). Vi an nou ni onlo valè pou Jéova (li Matyé 10:29-31). A pa ti lapenn sa ka fè-y lapenn lèwvwè on moun ka tchouyé ondòt moun pa èspré oben lèwvwè on moun ka suisidé-y a ! (Ègzòd 20:13). Sa ka fè Jéova lapenn toubònman osi lèwvwè nou ka riské vi an nou initilman oben lè nou pa’a pran prékosyon pou pwotéjé vi a lézòt. Lè nou ka pran swen a vi an nou é lè nou ka rèspèkté ta lézòt, nou ka montré Jéova kè nou ka aprésyé lavi, bèl kado-la i fè-nou la.

 AN-NOU FOUYÉ PI FON

3. Pran swen a santé a-w

Lè on krétyen ka ba Jéova vi a-y, i ka pwomèt-li kè i ké itilizé tout nanm a-y pou i pé sa sèvi-y. Sé konsi i ka prézanté kò a-y kon on sakrifis. Kifè, fò i pran swen a kò a-y. Li Women 12:1, 2 é fè on ti kozé asi sé kèsyon-lasa :

• Ka ki dwètèt pousé-w pran swen a santé a-w ?

• Kijan ou pé pran swen a santé a-w ?

 5. Rèspèkté vi a on timoun ki an vant a manman-y

Dépi lèwvwè on timoun ka grandi an vant a manman-y, Jéova ka suiv sa dè pré. David ékri on bèl ti poèm anlè sa. Li Sòm 139:13-17 é fè on ti kozé asi kèsyon-lasa :

• Pou Jéova, vi a on moun ka koumansé dépi an vant a manman-y oben lè manman-y akouché-y ?

Sé lwa-la Jéova té ba Izrayèl la té ka pwotéjé sé madanm ansent la é sé timoun-la ki té an vant a yo la. Li Ègzòd 21:22, 23 é fè on ti kozé asi sé kèsyon-lasa :

• Lèwvwè on moun té ka tchouyé on timoun an vant a manman-y é kè i pa té fè sa pa èspré, kijan Jéova té ka vwè sa ?

• Konnyéla, ka i té’é rèsanti si on moun té fè sa pa èspré b ?

• Ès ou ka vwè sa menmjan ki Jéova ?

Gadé VIDÉO-la.

Menmsi on madanm ka ba lavi onlo valè, adan sèwten sitiyasyon i pé kwè kè sèl solisyon ki tini sé avòté. Li Izayi 41:10 é fè on ti kozé asi sé kèsyon-lasa :

• Si yo ka mèt présyon asi on madanm pou i avòté, owa kimoun i pé touvé on soutyen ? Poukwa ?

 ON TI RÉZIMÉ

Labib ka di-nou kè fò-nou enmé vi an nou, kè fò-nou rèspèkté-y é kè fò-nou pwotéjé-y pas sé on bèl kado Jéova fè-nou. Sé konsèy-lasa valab pou pwòp vi an nou, men yo valab pou ta lézòt osi.

Ka ou woutyenn

• Pou ki biten vi a nonm ni onlo valè pou Jéova ?

• Lè on moun ka tchouyé ondòt moun pa èspré, ka Jéova ka rèsanti ?

• Lavi sé on bèl kado Jéova fè-nou. Poukwa ou ka aprésyé kado-lasa ?