LÈSON 42
Kijan Labib pé édé-w lè ou sélibatè é lè ou mayé ?
Ni désèrten koté asi latè, sé moun-la ka pansé kè fò ou mayé pou ou ni tchè-kontan. É poutan, ni moun-mayé ki tris toubònman é ni moun sélibatè ki pé pa pi kontan ki sa. Labib ka di kè lè on moun sélibatè sé on kado Jéova ka fè-y, é lè on moun mayé sé on kado i ka fè-y osi.
1. Ka sitiyasyon a on sélibatè ka pèwmèt-li fè ?
Mi sa Labib ka di : « Sila ki ka mayé la ka fè on bon biten, men sila ki pa’a mayé la ka fè on pibon biten ankò » (li 1 Korentyen 7:32, 33, 38). Poukwa Labib ka di kè on sélibatè ka fè « on pibon biten ankò » ? Pi souvan ki rarman, konm i pa mayé, i ni mwens rèsponsabilité asi kont a-y, kifè i pi lib. Pa ègzanp, si sé pou i ay préché ondòt koté oben adan ondòt péyi, sa pi fasil pou-y. É sa ki pli bèl ankò, sé kè i ni plis tan pou i konsolidé lanmityé a-y èvè Jéova.
2. Ka sitiyasyon a on moun-mayé ka pèwmèt-li fè ?
Menmjan ki on sélibatè, on moun ki mayé ka touvé-y adan on sitiyasyon ki ni bon koté a-y osi. Mi sa Labib ka di : « Vométan dé ki yonn » (Éklézyas 4:9). Lidé-lasa valab siwtou lè 2 moun-mayé ka suiv sé prensip-la ki an Bib-la. Lè on misyé é on madanm ka mayé, yonn ka pwomèt lòt kè i ké enmé-y é kè i ké rèspèkté-y. Kifè, yo ka santi-yo pi ansékirité ki 2 moun ki anmennaj, é timoun a yo ka santi-yo ansékirité osi.
3. Mayé : ka Jéova ka pansé dè sa ?
Lè Jéova mayé prèmyé misyé-la é prèmyé madanm-la, mi sa i di : « On nonm ké kité pap’a-y é manman-y, é i ké rété èvè madanm a-y » (Jénèz 2:24). Lè on misyé é on madanm mayé, Jéova vlé kè yo enmé-yo é kè yo rété ansanm tout vi a yo. I ka ba-yo dwa divòsé yenki si yonn adan yo kouché èvè ondòt moun. Adan on ka konsa, Jéova ka ba sila ki inosan la dwa désidé si i ké divòsé a (Matyé 19:9). Jéova pa’a ba sé krétyen-la dwa mayé èvè plizyè moun alafwa (1 Timoté 3:2).
AN-NOU FOUYÉ PI FON
Ki nou mayé ki nou sélibatè, nou pé ni tchè-kontan é nou pé fè Jéova plézi. An-nou vwè kijan.
4. Si ou sélibatè, pwofité dè sitiyasyon a-w
Pou Jézi, séla ki pa mayé la ni on bèl don (Matyé 19:11, 12). Li Matyé 4:23 é fè on ti kozé asi kèsyon-lasa :
-
Jézi pa jen mayé. Kijan i itilizé don-lasa pou i té sèvi Pap’a-y é pou i té fè lèbyen alantou a-y ?
Menmjan ki Jézi, on krétyen ki sélibatè pé ni tchè-kontan. Gadé VIDÉO-la é fè on ti kozé asi kèsyon-la ki ka vin la.
-
Adan ki aktivité entérésan sé krétyen sélibatè la pé pasé tan a yo ?
Ès ou té sav sa ?
Labib pa’a ba-w on laj pou ou mayé, men pawkont, i ka ba-w on konsèy. I ka di-w kè vométan ou atann ou pasé « flè a jénès » a-w avan ou mayé. I ka di sa pas pannan péryòd-lasa, on moun ka pi anvi fè lanmou, é sa pé anpéché-y pran bon désizyon (1 Korentyen 7:36).
5. Pran tan a-w pou chwazi mari a-w oben madanm a-w byen
Lè ou ka chwazi mari a-w oben madanm a-w, sé yonn adan sé désizyon pi enpòwtan la ou ka pran adan vi a-w. Li Matyé 19:4-6, 9 é fè on ti kozé asi kèsyon-lasa :
-
Poukwa fò pa on krétyen enki kouri mayé èvè nenpòt ki moun ?
Si nou vlé mayé, Bib-la ka di-nou ki jan dè moun pou nou chèché. I ka montré-nou kè sa ki pli enpòwtan, sé kè fò moun-lasa enmé Jéova b. Li 1 Korentyen 7:39 é 2 Korentyen 6:14, é fè on ti kozé asi sé kèsyon-lasa :
-
Poukwa sé enki èvè on sèwvitè a Jéova fò-nou mayé ?
-
Si on krétyen désidé mayé èvè on moun ki pa ka sèvi Jéova, ka Jéova ké rèsanti ?
Si ou mèt 2 zannimo diféran anba menm jouk-la, yo toulédé ké pran plon adan sa. Menmjan-la, si ou ka mayé èvè on moun ki pa’a sèvi Jéova, sé pwoblèm ou ka chèché pou kò a-w.
6. Menmjan ki Jéova, fò-nou ba mayé onlo valè
An tan a Izrayèl, ni dé boug ki té ka sonjé yenki yo, é ki té ka divòsé èvè madanm a yo pou nenpòt ki rézon. Li Malaki 2:13, 14, 16, é fè on ti kozé asi kèsyon-lasa :
-
Jéova hay lè on moun ka divòsé alòskè moun-la ki mayé èvè-y la pa fè adiltè. Poukwa sa ?
Adiltè é divòs ka fè moun soufè onlo. Sa ka fè moun-la ki inosan la soufè é sé timoun-la ka pran bon gaz adan sa osi.
Gadé VIDÉO-la é fè on ti kozé asi kèsyon-la ki ka vin la.
-
Si ou mayé èvè on moun ki pa’a sèvi Jéova, ka ou pé fè pou mayé a-w pé maché ?
7. Suiv tout konsèy Jéova ka ba-w anrapò èvè mayé
Dépawfwa, pou suiv sé konsèy-la Jéova ka ba sé moun-mayé la, sa ka mandé onlo éfò c. Men si nou ka obéyi, nou pé sèten Jéova ké béni-nou. Gadé VIDÉO-la.
Li Ébré 13:4 é fè on ti kozé asi sé kèsyon-lasa :
-
Ou ka di dé moun-mayé pé fè tousa Jéova ka mandé-yo fè ? Poukwa ou ka di sa ?
Adan onlo péyi, lè on moun ka mayé oben i ka divòsé, ni on lwa ki ka di kè fò maké sa anlè on rèjis. Jéova vlé kè sé krétyen-la suiv lwa-lasa. Li Tit 3:1 é fè on ti kozé asi kèsyon-lasa :
-
Si ou mayé, ès ou sèten sa maké asi rèjis a lanméri ?
MI SA YO TÉ’É PÉ MANDÉ-W : « Moun oblijé mayé alò ? Nou pé pa enki viv ansanm ? »
-
Ka ou té’é réponn ?
ON TI RÉZIMÉ
Lè on moun sélibatè, sé on kado Jéova ka fè-y, é lè on moun mayé sé on kado i ka fè-y osi. Lè nou ka suiv konsèy Jéova ka ban-nou, nou pé ni tchè-kontan ki nou mayé, ki nou sélibatè.
Ka ou woutyenn
-
Kijan on moun ki sélibatè pé pwofité dè sitiyasyon a-y ?
-
Poukwa Labib ka di kè fò-nou mayé enki èvè on moun ki ka sèvi Jéova ?
-
Adan Labib, nou ka touvé onsèl biten ki ka ba on moun dwa divòsé. Ki biten ésa ?
AY GADÉ SA OSI
Lè Labib ka di-nou mayé « sèlman èvè on disip a Ségnè-la », ka sa vlé di ?
« Questions des lecteurs » (Tou dè Gad a 1é juiyé 2004 an fransé)
Gadé on vidéo an dé mòso ki ké pèwmèt-vou pran bon désizyon anrapò èvè frékantasyon é mayé.
On frè rann-li kont kè Jéova ba-y plis ki sa i pèd.
Asi ki biten fò-nou pran tan réfléchi avan nou désidé divòsé oben séparé ?
« “Sa Bondyé mété anba menm jouk-la”, ba-y on gran valè » (Tou dè Gad a désanm 2018)
a Si ou gadé nòt niméwo 4 la ki an bout a liv-la, ou ké vwè pou ki rézon on krétyen pé séparé èvè moun-la i mayé èvè-y la, menmsi pa ni adiltè.
b Ni sèwten koté asi latè, sé sé paran-la ki ka chwazi èvè kimoun timoun a yo ké mayé. Adan on ka konsa, si sé paran-la enmé timoun a yo, prèmyé biten yo ké gadé, sé si moun-lasa enmé Jéova. Men kantité lajan i ka gangné é sa i ka fè konm travay ké pasé apré.
c Si ou ankaz èvè on moun, sé-w ki ka vwè si ou ka mayé èvè-y oben si ou ka kité-y.
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
