Toupatou si latè, lè yo ka mandé sé moun-la ka yo ka pansé dè alkòl, yochak ni lidé a yo asi sa. Ni moun ki byen enmé pran on ti dékolaj dètanzantan èvè zanmi a yo. Ni dòt ki désidé pa bwè pon gout alkòl. Ni dòt ankò ki ka kongné bon alkòl si yo jiskatan yo sou. Lè Labib ka palé dè alkòl, ka i ka di ?

1. Èskè sé on péché ou ka fè si ou ka bwè biten ki ni alkòl ?

Labib pa’a di kè fò pa nou bwè alkòl. Okontrè, i ka di kè pawmi sé pakèt kado-la Bondyé fè-nou la, ni « diven-la ki ka mèt jwa an tchè a lòm » (Sòm 104:14, 15). I jous ka di kè ni sèwten sèwvitè fidèl a Jéova ki té ka bwè bwason ki té ni alkòl (1 Timoté 5:23).

2. Ki konsèy Bib-la ka ba moun ki désidé bwè alkòl ?

Jéova pa dakò pou on moun bwè a dépasé menmsi i ka kenbé alkòl-la byen (Galat 5:21). Mi sa i ka di adan Pawòl a-y : « Fò pa ou touvé-w pawmi moun ki ka bwè twòp diven » (Pwovèb 23:20). Kifè, si nou désidé bwè alkòl — menm siwvwè nou tousèl an nou — nou pé’é bwè pou sa fè-nou pèd tèt an nou, pou nou pa sav ka nou ka di oben ka nou ka fè, oben ankò pou sa pété fwa an nou. É si nou pa’a rivé métrizé-nou, pisimé nou chwazi pa jen bwè alkòl ankò.

3. Kijan nou pé rèspèkté sa lézòt désidé anrapò èvè alkòl ?

Sé chakmoun ki ka vwè si i ké bwè alkòl oben si i pé’é bwè. Alò si on moun désidé kè i ké bwè tibwen alkòl, fò pa nou di-y ayen. Si on moun désidé kè i pé’é bwè, fò pa nou fòsé-y (Women 14:10). É si nou ka touvé-nou èvè moun ki ké santi-yo jenné si yo vwè-nou ka bwè alkòl, nou ké désidé pa pran ayen (li Women 14:21.) Nou ka chèché ‘entéré a lòt moun-la, olyé nou chèché entéré an nou’ (li 1 Korentyen 10:23, 24).

 AN-NOU FOUYÉ PI FON

4. Chwazi si ou ké bwè oben si ou pé’é bwè

Ka Jézi té ka pansé dè alkòl ? Pou nou réponn, an-nou palé dè prèmyé mirak-la i fè la. Li Jan 2:1-11 é fè on ti kozé asi sé kèsyon-lasa :

• Lè nou ka pran tan réfléchi asi mirak-lasa, ka Jézi ka pansé dè alkòl é dè moun ki désidé bwè alkòl ?

• Jézi pa ka entèwdi ponmoun bwè alkòl. Alò, ka on krétyen dwètèt pansé dè on moun ki désidé kè i ké bwè ?

Labib ka di kè si on krétyen désidé bwè tibwen alkòl, a pa on péché. Men ni dé moman, pisimé i pa pran pon gout alkòl. Li Pwovèb 22:3 é éséyé vwè kijan prensip-la ki adan-y la pé édé-w adan sé sitiyasyon-lasa :

• Ou kay menné on véikil oben ou kay sèvi èvè on machin.

• Ou ansent.

• On mèdsen di-w pisimé ou pa bwè alkòl.

• Lè ou koumansé bwè, ou ni dimal a frenné balan a-w.

• La ou ka rété la, gouvènman-la ka défann-vou bwè alkòl.

• Ou ka touvé-w èvè on moun ki désidé pa bwè pas i té ni pwoblèm èvè alkòl avan.

Ès fò ou sèvi alkòl adan on mayé oben adan on bwè-é-manjé ? Avan ou réponn, gadé VIDÉO-la.

Li Women 13:13 é 1 Korentyen 10:31, 32. Apré ou li chak pasaj, fè on ti kozé asi kèsyon-lasa :

• Kijan ou pé sèvi èvè prensip-lasa pou-w pran on désizyon ki ké fè Jéova plézi ?

 5. Désidé alavans ki kantité ou ké bwè

Si ou désidé kè ou ké bwè, toujou sonjé kè menmsi Jéova pa ka défann-nou bwè on ti biten, i pa dakò pou nou bwè a dépasé. Poukwa ? Li Ozé 4:11, 18 é fè on ti kozé asi kèsyon-lasa :

• Ka ki pé rivé on bwasonnè ?

Ka nou pé fè pou nou pa bwè twòp ? Fò-nou konnèt limit an nou. Li Pwovèb 11:2 é fè on ti kozé asi kèsyon-lasa :

• Poukwa sé on bon biten lè nou ka désidé alavans ki kantité alkòl nou ké bwè ?

6. Si ou ni dimal a arété bwè, ka ou pé fè pou ou pèd vyé labitid-lasa

 ON TI RÉZIMÉ

Jéova ban-nou alkòl pou sa mèt jwa an tchè an nou, men i vé pa nou fè abi é i vé pa nou vin èsklav a alkòl.

Ka ou woutyenn

• Ka Labib ka di anrapò èvè alkòl ?

• Lè on moun ka bwè a dépasé, ki danjé ki tini ?

• Kijan nou pé rèspèkté sa lézòt désidé anrapò èvè alkòl ?