LÈSON 44
Èskè sé tout fèt ki ka fè Bondyé plézi ?
Jéova vlé kè nou pwofité dè lavi é kè nou anmizé kò an nou dètanzantan. Men ès sé tout fèt ki ka fè Bondyé plézi ? Adan domenn-lasa, kijan nou pé montré kè nou enmé Jéova ?
1. Poukwa ni onlo fèt kè Jéova pa enmé ?
Pétèt sa ké siwprann-vou, men ni onlo fèt ki pa annakò èvè sa Labib ka anségné, oben ki sòti adan fo-rèlijyon-la. Sèwten fèt ni on rapò èvè sé démon-la oben yo bazé asi on mansonj ki ka di kè nou ni on nanm ki pa ka mò. Ni sèwten fèt ki lyanné èvè sipèwstisyon é ni dòt ankò, lè yo kréyé-yo odépa, sé té pou pòté moun chans (Izayi 65:11). Nou ka tou konprann poukwa Jéova avèti sèwvitè a-y. I di-yo : « Mèt-zòt apa [...] é arété mannyé sa ki pa pwòp a » (2 Korentyen 6:17).
2. Ni dé fèt ki ka ba moun on lonnè yo pa mérité. Ka Jéova ka pansé dè sé fèt-lasa ?
Jéova ka di-nou kè sa danjéré lèwvwè nou ka ‘fè nonm kon noumenm konfyans’ (li Jérémi 17:5). Ni sèwten fèt yo ka sélébré pou pòté on dirijan anlè oben pou pòté on sòlda anlè. Ni dòt fèt ki ka fété endépandans a on péyi oben drapo a on péyi (1 Jan 5:21). Ni dòt fèt ankò ki ka fè moun sonjé on mouvman ki jouwé on wòl enpòwtan adan istwa a on péyi. É ni sa osi ki ka fè moun sonjé on òwganizasyon politik. Si nou ka pòté on moun oben on òwganizasyon anlè alòskè i pa mérité sa, ka Jéova ké rèsanti, siwtou si moun-lasa oben òwganizasyon-lasa pa k’ay an sans a-y ?
3. Ki konpòwtèman ki pa dwètèt tini adan on fèt ?
Bib-la ka défann-nou ‘bwasonné, ay adan bòdé apiyé, é bwè pou sou’ (1 Pyè 4:3). Adan sèwten fèt, sé moun-la pa’a métrizé-yo é yo ka fè péché sèksyèl. Pou nou rété zanmi èvè Jéova, fò-nou rété lwen a tout sé mové biten-lasa.
AN-NOU FOUYÉ PI FON
An-nou vwè kijan nou pé fè Jéova plézi lè nou ka pran on désizyon anrapò èvè sé fèt-la.
4. Si on fèt pa’a fè Jéova plézi, fò pa nou fété-y
Li Éfézyen 5:10 é fè on ti kozé asi sé kèsyon-lasa :
-
Ka pou nou vérifyé avan nou fété on fèt ?
-
Ki fèt sé moun-la ka fété, la ou ka viv la ?
-
Ès ou ka di sé fèt-lasa ka fè Jéova plézi ?
Pa ègzanp, ès ou ja mandé-w si Bondyé ka aprésyé lè on moun ka fété anivèwsè a-y ? Bib-la pa’a palé dè pon sèwvitè a Jéova ki fété anivèwsè a-y. Pawkont, i ka palé dè anivèwsè a 2 moun ki pa té ka sèvi Jéova. Li Jénèz 40:20-22 é Matyé 14:6-10, é fè on ti kozé asi sé kèsyon-lasa :
-
Ka nou ka touvé adan toulédé anivèwsè-lasa ?
-
Lè ou ka pran tan réfléchi asi sé 2 istwa-lasa, dapré-w, ka Jéova ka pansé dè anivèwsè ?
Alò pétèt ou ka mandé-w : Ès sé on biten ki grav pou Jéova lè on moun k’ay adan on anivèwsè oben adan on fèt ki pa annakò èvè sa Labib ka anségné ? Li Ègzòd 32:1-8. Aprésa, gadé VIDÉO-la é fè on ti kozé asi sé kèsyon-la ki ka vin la.
-
Poukwa fò-nou chèché a sav si on fèt ka fè Jéova plézi ?
-
Kijan nou pé fè sa ?
Kijan nou ka fè sav si on fèt pa’a fè Bondyé plézi
-
Ès i bazé anlè ansègnman ki pa annakò èvè sa Labib ka di ? Pou sav sa, chèché ola i sòti.
-
Èskè fèt-lasa ka pòté on moun anlè alòskè i pa mérité sa ? Ès i ka fè menm biten-la pou on òwganizasyon oben pou on drapo ? Sé Jéova nou ka pòté anlè, é nou ka fè-y konfyans pou réglé tout pwoblèm ki tini.
-
Lè sé moun-la ka fété sé fèt-lasa, ès yo ni dé konpòwtèman ki pa annakò èvè sé prensip-la ki an Bib-la ? Fò-nou toujou fè sa ki byen. Fò-nou rété pwòp.
5. Édé lézòt rèspèkté kwayans a-w
Fanmi a-w oben zanmi a-w té’é pé mèt bon présyon asi-w pou ou fété on fèt kè Jéova pa enmé. Adan ka-lasa, pran pasyans èvè yo é èspliké-yo désizyon a-w èvè onlo rèspé. Pou vwè kijan ou pé fè sa, gadé VIDÉO-la.
Li Matyé 7:12 é fè on ti kozé asi sé kèsyon-lasa :
-
Dapré sé vèwsé-lasa, ès sé-w pou di fanmi a-w ki pa Témwen si yo pé fété on fèt ?
-
A pa paskè ou arété fété sèwten fèt èvè fanmi a-w kè ou pa enmé-yo ankò. Kijan ou pé montré-yo sa ?
6. Jéova vlé nou ni tchè-kontan
Jéova vlé kè nou pasé dé bèl ti moman èvè fanmi an nou é zanmi an nou. Li Éklézyas 8:15 é fè on ti kozé asi kèsyon-lasa :
-
Jéova vlé kè nou ni tchè-kontan. Kijan vèwsé-lasa ka montré sa ?
Jéova vlé kè sèwvitè a-y anmizé kò a yo é kè yo pasé dé bèl ti moman ansanm. Nou ka vwè sa on mannyè ki klè adan sé lasanblé entèwnasyonal la. Gadé VIDÉO-la pou vwè sa.
Li Galat 6:10 é fè on ti kozé asi sé kèsyon-lasa :
-
Ni sèwten fèt près toutmoun ka sélébré ‘pou fè lèbyen’ alantou a yo. Men ès nou oblijé fété sé fèt-lasa ?
-
Ka ki ka fè-w plis plézi : ba on moun on kado pas ni on fèt ki ka oblijé-w fè sa, oben ba on moun on kado dè-tou-kè ?
-
Ni onlo Témwen ki ka òwganizé ti fèt pou timoun a yo, é yo toujou ka sonjé fè-yo on ti siwpriz oben on ti kado. Si ou ni timoun, ka ou té’é pé fè pou fè-yo plézi ?
MI SA MOUN KA DI : « On fèt pé sòti la i sòti si i vlé, sa pa ni enpòwtans. Dépi ou ka pasé on bon ti moman èvè fanmi a-w é zanmi a-w, sé sa ki ka konté. »
-
Ka ou té’é réponn ?
ON TI RÉZIMÉ
Jéova vlé kè nou pasé dé bon ti moman èvè fanmi an nou é zanmi an nou. Men i vé pa kè nou fété fèt ki pa’a fè-y plézi.
Ka ou woutyenn
-
Ki kèsyon nou té’é pé pozé-nou pou sav si on fèt ka fè Jéova plézi ?
-
Kijan nou té’é pé èspliké fanmi an nou é zanmi an nou kè ni sèwten fèt nou pa’a fété ?
-
Jéova vlé kè nou anmizé-nou é kè nou ni tchè-kontan. Ka ki ka fè-w di sa ?
AY GADÉ SA OSI
Mi déotwa fèt kè Témwen a Jéova pa’a fété.
« Poukwa Témwen a Jéova pa’a fété sèwten fèt ? » (on awtik ki asi jw.org)
Kat rézon ki fè Bondyé pa enmé anivèwsè.
« Poukwa Témwen a Jéova pa’a fété anivèwsè a yo ? » (on awtik ki asi jw.org)
Gadé kijan on jenngason ka réyaji lè kanmarad-lékòl a-y é pwofésè a-y ka fè jé èvè-y davwa i pa’a fété Nwèl.
Ni plizyè milyon krétyen ki désidé pa fété Nwèl. Kijan yo ka viv sa ?
« Ils ont trouvé mieux » (Tou dè Gad a 1é désanm 2012 an fransé)
a Gadé nòt niméwo 5 la ki an bout a liv-la pou vwè kijan ou té’é pé réyaji lè ou douvan on sitiyasyon ki ni on rapò èvè on fèt.
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
