LÈSON 53
Anmizman ki ka fè Jéova plézi
Jéova sé « Dyé-la tchè a-y kontan la » (1 Timoté 1:11). I vlé tchè an nou kontan osi é kè nou bwè dlo an nou. Lè nou ka pran tan pou pozé kò an nou oben pou anmizé-nou, sa ka fè-y plézi. Adan lèson-lasa, nou ké vwè kijan nou pé anmizé-nou pou sa fè-nou dibyen é pou nou fè Jéova plézi an menm balan-la.
1. Ka fò-nou sonjé lè nou ka chwazi anmizman an nou ?
Ka ou enmé fè pou dézannuiyé-w ? Ni sa ki byen enmé rété trankilman akaz a yo pou li on liv, pou kouté tibwen mizik, pou gadé on fim, oben pou ay si Entèwnèt. Ni dòt ki byen enmé maché anba bwa-la oben fè on koud foutbòl èvè zanmi a yo. Kèlkèswa sa nou enmé fè pou dézannuiyé-nou, fò-nou fè atansyon pou nou toujou « fè Ségnè-la plézi » (Éfézyen 5:10). Sa enpòwtan toubònman kè nou konprann prensip-lasa. Piskè adan onlo anmizman, nou ka touvé enpé biten Jéova hay, kon vyolans, péché sèksyèl, oben biten ki anrapò èvè mové lèspri (li Sòm 11:5). Ka ki pé édé-nou chwazi anmizman an nou byen ?
Si nou ni zanmi ki enmé Jéova, yo ké édé-nou chwazi anmizman ki ka fè-y plézi. Kon nou vwè adan lèson 48 la, « on moun ki ka maché èvè moun saj ké vin saj ». Pawkont, sila ki ka frékanté moun ki pa enmé prensip a Jéova « ké ni pwoblèm » (Pwovèb 13:20).
2. Poukwa fò-nou fè atansyon pou nou pa pasé twòp tan ka anmizé-nou ?
Menmsi nou sav kè anmizman-la nou chwazi la ka fè Jéova plézi, sa vé pa di kè fò-nou pasé tout tan an nou adan sa. Sinon, pé’é rété-nou asé tan pou fè dòt biten ki pi enpòwtan. Labib ka di-nou kè fò-nou ‘sèvi èvè tan-la nou ni la méyè fason ki tini’ (li Éfézyen 5:15, 16).
AN-NOU FOUYÉ PI FON
An-nou vwè kijan pou nou chwazi anmizman an nou byen konm i fo.
3. Rété lwen a tout anmizman ki pa bon
Poukwa fò-nou chwazi anmizman an nou èvè onlo prékosyon ? Gadé VIDÉO-la é fè on ti kozé asi sé kèsyon-la ki ka vin la.
-
Lè nou ka gadé sèwten anmizman ki té ni an tan a sé Women-la, é lè nou ka gadé sèwten anmizman kè nou ni jòdijou, poukwa nou pé di kè yo ka sanm ?
-
Ka Danny aprann asi sé anmizman-la ?
Li Women 12:9 é fè on ti kozé asi kèsyon-lasa :
-
Lè ou ka chwazi anmizman a-w, kijan vèwsé-lasa pé édé-w ?
Ki biten Jéova hay ? Li Pwovèb 6:16, 17 é Galat 5:19-21. Apré ou li chak pasaj, fè on ti kozé asi kèsyon-lasa :
-
Pawmi tout sé biten-la ki adan sé vèwsé-lasa, kilès nou ka jwenn souvan adan sé anmizman-la jòdijou ?
Avan ou chwazi on anmizman...
Mandé-w :
-
Èvè ki biten ? Ès ni dé biten kè Jéova pa enmé adan ?
-
Pannan konmen tan ? Ès i ka anpéché-mwen fè dé biten ki pi enpòwtan ?
-
Èvè kimoun ? Èskè akòz dè anmizman-lasa an toujou ka touvé-mwen èvè moun ki pa enmé Jéova ?
Lèwvwè ni on danjé, fò-nou rété lwen a-y pou nou ansékirité. Kifè, fò-nou rété lwen a tout anmizman ki ka sanm sa i pa bon.
4. Sèvi èvè tan a-w byen konm i fo
Gadé VIDÉO-la é fè on ti kozé asi kèsyon-la ki ka vin la.
-
Frè-la pa té ka gadé ayen ki pa bon, men i té ni on pwoblèm ! Ki pwoblèm ésa ?
Li Filipyen 1:10 é fè on ti kozé asi kèsyon-lasa :
-
Kijan vèwsé-lasa ké édé-nou désidé konmen tan nou ké pasé ka anmizé-nou ?
5. An-nou chwazi anmizman ki ka fè Jéova plézi
Ni sèwten anmizman ki pa bon pou on krétyen, men ni bon tibwen biten nou pé fè pou anmizé-nou é ki ka fè Jéova plézi. Li Éklézyas 8:15 é Filipyen 4:8, é fè on ti kozé asi kèsyon-lasa :
-
Ki anmizman ou byen enmé é ki ka fè Jéova plézi osi ?
Ni onlo anmizman ki ka fè Jéova plézi.
MI SA MOUN KA DI : « Si on moun ka anmizé-y èvè vyolans, sèks, oben biten ki anrapò èvè sé démon-la, sa pa grav. Dépi limenm a-y pa’a fè sé biten-lasa, pa ni ayen dè mal adan sa ! »
-
Ka ou ka pansé dè sa ?
ON TI RÉZIMÉ
Jéova vlé kè nou anmizé-nou èvè biten ki ka fè-nou dibyen é ki ka fè-y plézi.
Ka ou woutyenn
-
On krétyen pa dwètèt anmizé-y èvè sèwten biten. Ki biten ésa ?
-
Poukwa fò pa nou pasé twòp tan ka anmizé-nou ?
-
Ès ou vlé anmizé-w èvè biten ki ka fè Jéova plézi ? Poukwa ?
AY GADÉ SA OSI
Kimoun ki dwètèt désidé èvè ki biten nou ka anmizé-nou ?
Kijan nou pé chwazi anmizman an nou èvè sajès ?
« Comment se détendre sainement ? » (Tou dè Gad a 15 òktòb 2011 an fransé)
Istwa a on misyé ki désidé chanjé jan i té ka anmizé-y. Ou ké touvé istwa-lasa adan awtik-la : « J’ai même surmonté mes préjugés ».
« La Bible transforme des vies » (Tou dè Gad a 1é févriyé 2010 an fransé)
Kijan on manman ka réyaji douvan on fim ki ni biten a démon adan-y ?
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
