Sé Jézi ki Chèf a lasanblé krétyèn la (Éfézyen 5:23). Jòdijou, dépi an syèl-la, Jézi ka dirijé disip a-y asi latè grasa « èsklav fidèl é prévwayan la » (li Matyé 24:45). Sé Jézi limenm a-y ki mèt ‘èsklav-lasa’ anplas ; kifè ‘èsklav-lasa’ ni on sèwten otorité, men i sé èsklav a Kris é i ka travay ba frè a Kris. Kimoun ki ‘èsklav-lasa’ ojis ? É kijan i ka pran swen an nou ?

1. Kimoun ki « èsklav fidèl é prévwayan la » ?

Jéova toujou sèvi èvè swa on nonm, swa on gwoup nonm, pou gidé pèp a-y (Malaki 2:7 ; Ébré 1:1). Apré mò a Jézi, sé sé apòt-la é sé ansyen-la ki té Jérizalèm ki té ka dirijé lasanblé-la (Akt 15:2). Menmjan-la, jòdijou, sé kèlkè ansyen ki ka dirijé lasanblé krétyèn la. Yo ka kriyé-yo Komité santral a Témwen a Jéova. Sé yo ki ka ban-nou nouriti èspirityèl la é sé yo ki ka dirijé travay a prédikasyon-la. Gwoup-lasa sé « èsklav fidèl é prévwayan la [kè Jézi] mété rèsponsab » (Matyé 24:45a). Tout sé frè-la ki adan Komité santral la sé dé krétyen wen. Yo kontan toubònman, pas yo sav yo ké ay jwenn Kris adan wayòm a-y an syèl-la, lè vi a yo ké bout asi latè.

2. Nouriti èspirityèl la ‘èsklav-la’ ka ban-nou la, ka sa yé ojis ?

Jézi té di kè « èsklav fidèl é prévwayan la » té’é ba disip a-y « manjé a yo o bon moman » (Matyé 24:45b). Manjé-la nou ka manjé la ka ban-nou fòs é i ka édé-nou rété byen doubout. Menmjan-la, nouriti èspirityèl la, kivédi on ansègnman ki bazé asi Pawòl a Bondyé, ka ban-nou fòs-la nou bizwen la pou nou pé sa rété fidèl a Jéova é pou nou fè travay-la Jézi ban-nou fè la (1 Timoté 4:6). Nou ka rèsèvwa nouriti èspirityèl lasa grasa sé réinyon-la, sé lasanblé-la, sé piblikasyon-la é sé vidéo-la ki bazé asi Labib. Grasa tout sé dispozisyon-lasa, nou ka rivé konprann ka ki volonté a Bondyé é nou ka pé konsolidé lanmityé an nou èvè-y.

 AN-NOU FOUYÉ PI FON

3. Fò pèp a Jéova travay ansanm-ansanm

Anba dirèksyon a Jézi, Komité santral la ka òwganizé travay-la sé Témwen a Jéova la ka fè la. Lè nou ka gadé jan sa té ka pasé an tan a sé prèmyé krétyen-la é jan sa ka fèt jòdijou, nou ka rann-nou kont kè sé près menm biten-la. Gadé VIDÉO-la.

Li 1 Korentyen 14:33, 40 é fè on ti kozé asi kèsyon-lasa :

• Jéova vlé kè Témwen a-y travay ansanm. Kijan sé vèwsé-lasa ka montré sa ?

4. Èsklav fidèl é prévwayan la ka òwganizé prédikasyon-la

Pou sé prèmyé krétyen-la, pa té ni pon travay ki té pi enpòwtan ki prédikasyon-la. Li Akt 8:14, 25 é fè on ti kozé asi sé kèsyon-lasa :

• An tan a sé prèmyé krétyen-la, kimoun ki té ka dirijé travay a prédikasyon-la ?

• Kijan Pyè é Jan réyaji lè sélézòt apòt-la di-yo ka pou yo té fè ?

Pawmi tout aktivité kè Komité santral la ka òwganizé, sé prédikasyon-la ki pi enpòwtan. Gadé VIDÉO-la.

 Jézi di kè prédikasyon-la ni onlo enpòwtans. Li Mawk 13:10 é fè on ti kozé asi sé kèsyon-lasa :

• Poukwa Komité santral la ka ba prédikasyon-la tousa enpòwtans ?

• Poukwa « èsklav fidèl é prévwayan la » dwèt òwganizé travay-lasa asi tout latè ?

5. Èsklav fidèl é prévwayan la ka di-nou ki chimen pou nou pran

Komité santral la ka di tout sé krétyen-la toupatou asi latè ki dirèksyon pou yo pran. Lè i ka pran on désizyon, kijan i ka fè ? An-nou vwè kijan komité santral la té ka fè an tan a sé prèmyé krétyen-la. Li Akt 15:1, 2 é fè on ti kozé asi sé kèsyon-lasa :

• Dapré sé vèwsé-lasa, ki pwoblèm sé prèmyé krétyen-la jwenn ?

• Owa kimoun Pòl, Bawnabé, é dòt krétyen ankò ay chèché on solisyon ?

Li Akt 15:12-18, 23-29 é fè on ti kozé asi kèsyon-lasa :

• Ka komité santral la fè pou Bondyé té gidé-y pou i té pran on bon désizyon ? (gadé sé vèwsé 12, 15, é 28 la).

Li Akt 15:30, 31 é 16:4, 5, é fè on ti kozé asi sé kèsyon-lasa :

• Kijan sé prèmyé krétyen-la réyaji lè komité santral la di-yo ki dirèksyon pou yo té pran ?

• Davwa yo obéyi, kijan Jéova béni-yo ?

Li 2 Timoté 3:16 é Jak 1:5, é fè on ti kozé asi kèsyon-lasa :

• Jòdijou, lè Komité santral la bizwen pran on désizyon, ola i k’ay chèché enfòwmasyon ?

 ON TI RÉZIMÉ

Komité santral la, sé « èsklav fidèl é prévwayan la » kè Kris mèt anplas. I ka di tout sé krétyen-la ki chimen pou yo pran é i ka ba-yo nouriti èspirityèl la.

Ka ou woutyenn

• Kimoun ki mèt « èsklav fidèl é prévwayan la » anplas ?

• Kijan Komité santral la ka pran swen an nou ?

• Ès ou ka di kè Komité santral la sé « èsklav fidèl é prévwayan la » ?