LÈSON 55
Soutyenn lasanblé lokal a-w
Adan lèmondantyé, ni plizyè milyon moun ki ka adoré Jéova. Kifè, ni plizyè milyé lasanblé lokal. Tout sé Témwen-lasa byen kontan ansègnman-la é fòwmasyon-la yo ka ba-yo la. Sa ka pousé-yo soutyenn lasanblé lokal la dè-tou-kè. Ès ou ka rèsanti menm jwa-lasa adan lasanblé a-w ?
1. Kijan ou pé sèvi èvè fòs a-w é èvè tan a-w pou ou pé soutyenn lasanblé lokal a-w ?
Toutmoun an lasanblé-la pé fè on biten ki itil. Pa ègzanp, ès ni moun ki andikapé oben ki ja ni on bèl laj adan lasanblé a-w ? Pétèt ou pé ba-yo on pal pou édé-yo pran réinyon a yo. Pétèt osi, ou pé ay fè konmisyon ba yo, oben pasé on ti balyé an kaz-la (li Jak 1:27). Anplisdisa, nou pé bay on pal pou nétwayé sal di Wayòm la oben pou fè antrètyen a-y. Pa ni ponmoun ki ka oblijé-nou fè sa. Si nou ka ‘ofè-nou volontyé’ konsa, sé pas nou enmé Bondyé é nou enmé frè é sè an nou (Sòm 110:3).
Lè on moun ja batizé, ni dòt biten i pé fè ankò. Sé frè-la ki ni sé kalité-la ki maké an Bib-la pé travay pou lasanblé-la antankè asistan, é plita antankè ansyen. Ki on frè, ki on sè pé pran sèwvis pyonyé. Konsa i ka pé fè on pibon travay an prédikasyon. Ni sèwten Témwen ki ka òwganizé-yo pou ay konstwi batiman ki ké sèvi pou adoré Jéova. É ni dòt ki ka déménajé pou ay édé on lasanblé ki bizwen on pal.
2. Kijan ou pé sèvi èvè lajan a-w é byen matéryèl a-w pou soutyenn lasanblé-la ?
Nou pé « onoré Jéova èvè sa [nou] ni dè méyè » (Pwovèb 3:9). Nou pé sèvi èvè lajan an nou oben byen matéryèl an nou pou soutyenn lasanblé lokal la é travay a prédikasyon-la ki ka fèt toupatou asi latè. Nou kontan sa toubònman ! (li 2 Korentyen 9:7). Sé ofrann-la nou ka fè la ka sèvi pou pòté sèkou osi. Ni onlo Témwen ki pran labitid « mèt on ti dèkwa dè koté » pou fè on ofrann (li 1 Korentyen 16:2). Pou sa, yo ka sèvi èvè sit-la donate.pr418.com oben èvè sé bwat a ofrann la ki ka touvé-yo la nou ka adoré Jéova. Lè nou ka fè sé don-lasa, nou ka montré Jéova kè nou enmé-y. Sé vréman on bèl mannyè pou nou montré-y sa !
AN-NOU FOUYÉ PI FON
An-nou palé dè plizyè biten nou pé fè pou soutyenn lasanblé-la.
3. Nou pé sèvi èvè byen matéryèl an nou
Jéova é Jézi enmé sila ki ka bay èvè jwa. Jézi palé dè on vèv ki té malérèz é ki fè tousa i té pé pou bay on lajan. Li Lik 21:1-4 é fè on ti kozé asi sé kèsyon-lasa :
-
Ès nou oblijé bay onlo lajan pou fè Jéova plézi ?
-
Ka Jéova é Jézi ka rèsanti lè nou ka bay èvè tout tchè an nou ?
Si ou vlé ni plis enfòwmasyon pou sav kijan nou ka sèvi èvè sé ofrann-la, gadé VIDÉO-la. Aprésa, fè on ti kozé asi kèsyon-la ki ka vin la.
-
Kijan ofrann an nou ka édé sé lasanblé-la toupatou asi latè ?
4. Nou pé bay on pal
An tan a Labib, sèwvitè a Jéova té ka pòté bon mannèv pou antrètyenn é pou réparé sé koté-la yo té ka adoré-y la. Savédi kè a pa enki lajan yo té ka bay. Li 2 Kronik 34:9-11 é fè on ti kozé asi kèsyon-lasa :
-
Chak Izraélit té pé bay on pal pou réparé tanp a Jéova. Ankijan ?
Si ou vlé vwè kijan sé Témwen a Jéova la ka suiv ègzanp a sé Izraélit-la jòdijou, gadé VIDÉO-la. Aprésa, fè on ti kozé asi sé kèsyon-la ki ka vin la.
-
Poukwa sa enpòwtan kè sal di Wayòm la rété pwòp é an bon léta ?
-
Kijan ou pé bay on pal ?
5. Sé frè-la pé chèché a fè plis adan lasanblé-la
Labib ka ankourajé sé frè-la a fè tousa yo pé pou soutyenn lasanblé-la. Gadé VIDÉO-la é fè on ti kozé asi kèsyon-la ki ka vin la.
-
Ka Ryan fè pou i té fè plis adan lasanblé-la ?
Labib ka di-nou ki kalité on frè dwèt tini pou i vin asistan oben ansyen. Li 1 Timoté 3:1-13 é fè on ti kozé asi sé kèsyon-lasa :
-
Ki kalité on frè dwèt tini si i vlé vin asistan oben ansyen ?
-
Ki kalité fanmi a-y dwèt tini ? (gadé sé vèwsé 4 é 11 la).
-
Lè sé frè-la ka fè éfò pou travay sé kalité-lasa, kijan sa ka fè tout lasanblé-la dibyen ?
MI SA YO TÉ’É PÉ MANDÉ-W : « Adan rèlijyon a zòt, ola zò ka pran lajan-la ? »
-
Ka ou té’é réponn ?
ON TI RÉZIMÉ
Lè nou ka sèvi èvè tan an nou, fòs an nou oben lajan an nou pou édé lasanblé-la, sa ka fè Jéova plézi toubònman.
Ka ou woutyenn
-
Kijan nou pé sèvi èvè tan an nou é fòs an nou pou édé lasanblé-la ?
-
Kijan nou pé sèvi èvè byen matéryèl an nou é èvè lajan an nou pou édé lasanblé-la ?
-
Ka ou té’é byen enmé fè pou édé lasanblé-la ?
AY GADÉ SA OSI
Èskè jòdijou Bondyé ka mandé-nou péyé ladim ?
Ka sa vlé di « chèché a fè plis » adan lasanblé-la ?
« “Aspires-tu à une fonction de surveillant” ? » (Tou dè Gad a 15 sèptanm 2014 an fransé)
Sé Témwen-la ka fè gwo sakrifis pou pòté piblikasyon ba frè é sè a yo.
Ès Témwen a Jéova ka fè moun péyé pou on lantèwman oben on mayé ?
« Èvè ki lajan sé Témwen a Jéova la ka finansé aktivité a yo ? » (on awtik ki asi jw.org)
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
