Grasa étid-la ou ka fè la, ou aprann onlo biten asi Jéova. É pétèt kè tèlman ou vin enmé Jéova, ou ba-y vi a-w é ou pran lèbatèm. Si ou po’o rivé jis la, sèten ou pé’é tadé a fè sa. Men apré ou batizé, fò ou kontinyé fè éfò pou ou vin pibon zanmi èvè Jéova.

1. Poukwa fò ou kontinyé konsolidé lanmityé a-w èvè Jéova ?

Fò ou kontinyé fè éfò pou ou vin pibon zanmi èvè Jéova. Poukwa ? ‘Pou ou pa jen lésé ayen chayé-w olwen’ (Ébré 2:1). Ka ki ké édé-nou rété fidèl a Jéova ? Fò-nou kontinyé pòté bon mannèv an prédikasyon é fò-nou éséyé gadé ki dòt biten nou pé fè pou sèvi Jéova plis ankò (li Filipyen 3:16). Méyè biten nou pé fè an vi an nou sé sèvi Jéova ! (Sòm 84:10).

2. Ki dòt biten pou ou kontinyé fè ankò ?

Ou rivé an bout a liv-lasa, men sé koumansé ou ka koumansé viv antankè disip a Jézikris. Bib-la ka di-nou « mèt nouvo pèwsonalité-la » asi nou (Éfézyen 4:23, 24). Si ou kontinyé étidyé Pawòl a Bondyé é si ou kontinyé ay réinyon, ou ké aprann plis biten asi Jéova é asi kalité a-y. Éséyé vwè ka ou pé fè pou imité pèwsonalité a-y pibyen adan vi a-w. Kontinyé fè tout sé chanjman-la ki fo la pou mèt jwa an tchè a Jéova.

3. Ka Jéova ké fè pou i édé-w pwogrésé ?

Mi sa Labib ka di : « Bondyé [...] ké fin fòwmé-zòt limenm a-y. I ké fè-zòt vin solid, i ké fè-zòt vin fò, ayen pé’é pé déchouké-zòt » (1 Pyè 5:10). Noutout ka jwenn tantasyon. Men Jéova ka ban-nou fòs-la nou bizwen la pou nou rété solid (Sòm 139:23, 24). I ka pwomèt-nou i ké ban-nou lanvi-la é fòs-la nou bizwen la pou nou sèvi-y on mannyè ki fidèl (li Filipyen 2:13).

 AN-NOU FOUYÉ PI FON

4. Kontinyé palé èvè méyè zanmi a-w

Konm ou ka priyé é ou ka étidyé Labib, sa édé-w vin bon zanmi èvè Jéova. Ka ou pé fè pou sé labitid-lasa édé-w vin pibon zanmi èvè-y ?

Li Sòm 62:8 é fè on ti kozé asi kèsyon-lasa :

• Si ou vlé vin pibon zanmi èvè Jéova, ka ou pé fè pou priyé-y pibyen ?

Li Sòm 1:2 é nòt-la, é fè on ti kozé asi kèsyon-lasa :

• Si ou vlé vin pibon zanmi èvè Jéova, ka ou pé fè pou bénéfisyé anplen dè sa ou ka li an Bib-la ?

Lè ou ka étidyé Labib tousèl a-w, ka ou pé fè pou rann sa pi entérésan ? Si ou vlé ni déotwa lidé, gadé VIDÉO-la. Aprésa, fè on ti kozé asi sé kèsyon-la ki ka vin la.

• Pawmi sé lidé-la ki adan vidéo-la, kilès ou té’é pé itilizé ?

• Ka ou té’é enmé étidyé ?

 ON TI RÉZIMÉ

Kontinyé konsolidé lanmityé a-w èvè Jéova é chèché a fè plis pou-y. Konsa, ou ké pé ni tchè-kontan pou touttan !

Ka ou woutyenn

• Poukwa ou pé sèten kè Jéova ké édé-w sèvi-y èvè tout tchè a-w ?

• Kijan ou pé vin pibon zanmi èvè Jéova ?

• Si ou ka chèché a fè plis pou Jéova, kijan sa ké édé-w vin pibon zanmi èvè-y ?