1.  Ka ki Gran Babilòn-la ?

2.  Kitan Mési-la té pou vin ?

3.  Métòd ki ka sèvi èvè san pou swangné

4.  Lè moun-mayé ka séparé

5.  Kijan ou té’é pé réyaji lè ou douvan on sitiyasyon ki ni on rapò èvè on fèt

6.  Maladi on moun pé ba lézòt

7.  Afè anrapò èvè lajan é èvè lalwa

 1. Ka ki Gran Babilòn-la ?

Poukwa nou pé di kè « Gran Babilòn-la » ka rèprézanté tout sé fo rèlijyon-la ? (Révélasyon 17:5). An-nou réfléchi asi sé pwen-lasa :

• I ka aji toupatou si latè. Labib ka di kè Gran Babilòn-la ‘sizé asi pèp, foulmoun é nasyon’ é kè i « ka dominé asi sé wa-la ki asi latè » (Révélasyon 17:15, 18).

• A pa on òwganizasyon politik é a pa on sosyété ki ka fè onpakèt lajan nonplis. « Sé wa-la ki asi latè la » é « sé machann-la » ké vivan toujou apré yo ké détwi-y (Révélasyon 18:9, 15).

• I ka anpéché moun rapwoché-yo dè Bondyé. Lè Labib ka palé dè-y i ka di kè i sé on « pwòstitiyé » pas i ka alyansé-y èvè sèwten gouvènman pou yo ba-y lajan oben pou yo pwokiré-y dòt bénéfis (Révélasyon 17:1, 2). I ka kouyonné moun ki sòti adan tout nasyon. É i tchouyé milyon é milyon moun (Révélasyon 18:23, 24).

Wouviré adan lèson 13, pwen 6

 2. Kitan Mési-la té pou vin ?

Labib té anonsé kè Mési-la té’é vin an bout a on péryòd ki té’é diré 69 simenn (li Danyèl 9:25).

• Kitan sé 69 simenn-la koumansé ? An 455 avan épòk an nou (av. é. n.), lè Néémi té gouvènè é lè i rivé Jérizalèm pou i té rèkonstwi vil-la (Danyèl 9:25 ; Néémi 2:1, 5-8).

• Konmen tan sé 69 simenn-la diré ? Adan sèwten pwofési ki an Bib-la, on jou ka rèprézanté on lanné (Nonb 14:34 ; Ézékyèl 4:6). Kifè, on simenn ka rèprézanté sèt lanné. Sa ka pèwmèt-nou konprann kè sé 69 simenn-la diré 483 lanné (69 x 7).

• Kitan sé 69 simenn-la bout ? Si nou ka pati an 455 avan épòk an nou, é nou ka konté 483 lanné, nou ka rivé an 29 a épòk an nou a (a. é. n.). É jistèman, sé lanné-lasa Jézi batizé é i vin Mési-la ! (Lik 3:1, 2, 21, 22).

Wouviré adan lèson 15, pwen 5

 3. Métòd ki ka sèvi èvè san pou swangné

Dépawfwa, pou sé mèdsen-la swangné on moun ki malad, yo ka sèvi èvè pwòp san a-y. Men a pa tout sé métòd-la yo ka itilizé la on krétyen pé aksèpté. Pa ègzanp, on krétyen pa ka bay san a-y é i pa ka aksèpté kè yo pran san a-y pou yo viré sèvi èvè-y pou yo opéré-y (Détéwonòm 15:23).

Men pétèt on krétyen ké aksèpté on prizdèsan oben dòt métòd ankò kè yo ka kriyé an fransé hémodialyse, hémodilution, récupération du sang épanché oben usage d’un cœur-poumon artificiel b. Sé chak krétyen ki ké désidé kijan yo ké sèvi èvè san a-y pannan on opérasyon, pannan i ka fè on lègzamen oben pannan i ka fè on trètman. Tout sé mèdsen-la pa’a sèvi èvè sé tèknik-lasa menmjan-la. Kifè, avan on krétyen aksèpté fè on opérasyon, on lègzamen oben on trètman, i ké chèché a sav ègzaktèman kijan yo ké sèvi èvè san a-y. Fò chak krétyen pozé-y sé kèsyon-lasa :

• Vinvwè yo ka fè san an mwen pasé adan plizyè tiyo é kè i pa’a siwkilé adan kò an mwen pannan on sèwten tan. Èskè konsyans an mwen ké di-mwen kè san-lasa ka fè pawti a kò an mwen toujou é kè an pa bizwen ‘vidé-y atè-la’ ? (Détéwonòm 12:23, 24).

• Vinvwè yo pran tibwen adan san an mwen pou yo nétwayé-y oben pou yo mélanjé-y èvè on médikaman é kè yo ka wouviré mété-y an kò an mwen apré. Ès konsyans an mwen ké bat-mwen parapòt a sa an aprann an Bib-la oben ès i ké pèwmèt-mwen aksèpté tèknik-lasa ?

Wouviré adan lèson 39, pwen 3

 4. Lè moun-mayé ka séparé

Labib pa ka ankourajé moun ki mayé séparé é si janmen yo séparé, i ka di on mannyè ki klè kè yo ponyonn pa andwa woumayé (1 Korentyen 7:10, 11). Men ni sèwten krétyen ki touvé-yo adan diféran sitiyasyon ki pousé-yo lésé moun-la yo té mayé èvè-y la.

• On mari vé pa ba madanm a-y é timoun a-y sa yo bizwen pou viv : On misyé vé pa ba fanmi a-y bwè é manjé, é i vé pa okipé dè yo menm. Kifè madanm a-y é timoun a-y pa menm ni on dèkwa pou yo viv (1 Timoté 5:8).

•   Lè yonn ka ba lòt-la bon kou : Sé lè yonn adan sé 2 moun-mayé la ka pran bon kou é kè i ka santi kè santé a-y oben vi a-y andanjé (Galat 5:19-21).

• Lè on krétyen ka santi kè lanmityé a-y èvè Jéova andanjé poudèbon : Yonn adan sé 2 moun-mayé la ka anpéché lòt-la sèvi Jéova kon i ka mandé (Akt 5:29).

Wouviré adan lèson 42, pwen 3

 5. Kijan ou té’é pé réyaji lè ou douvan on sitiyasyon ki ni on rapò èvè on fèt

Sé krétyen-la pa’a fété pon fèt ki pa’a fè Jéova plézi. Men adan sèwten sitiyasyon sé chak krétyen ki ké désidé kijan i ké réyaji. É sé dapré sa i aprann an Bib-la i ké lésé konsyans a-y gidé-y. Mi déotwa ègzanp.

• Si on moun ka swété-w « jwayé Nowèl » é « bònané ». Ou pé di-y mèsi tou senplèman. Men dépawfwa, ni dé moun ki vlé sav poukwa ou pa ka fété sé fèt-lasa. A moman-lasa, ou pé ba-yo on èsplikasyon.

• Sé péryòd a fèt é moun-la ou mayé èvè-y la ka envité-w adan on bwè-é-manjé èvè fanmi a-y. Si konsyans a-w ka di-w kè ou pé alé, pétèt kè ou té’é pé èspliké moun-la ou mayé èvè-y la kè si pannan rèpa-lasa yo ka suiv mès-é-labitid kè Jéova pa enmé, ou pé’é mélanjé-w adan sa.

• Patwon a-w ka ba-w on lajan anplis pou Nwèl oben pou sé fèt-la yo ka fété an fen a lanné-la. Ès fò ou di ou vé pa ? Pa oblijé. Si ou aksèpté lajan-la, ès patwon a-w ké ni lenprésyon kè ou ka fété fèt-lasa ? Oben ès i ka ba-w lajan-lasa jis pou i montré-w kè i ka aprésyé travay-la ou ka fè la ?

• Sé péryòd a fèt é on moun ka ba-w on kado. Lèwgadé i ka di-w : « An sav ou pa’a fété. Men mi on ti kado ba-w. » Pétèt kè moun-lasa sé janti i janti èvè-w. Men pétèt osi, sé tèsté i ka tèsté-w pou i vwè si fwa a-w solid oben pétèt sé on mwayen i ka chèché pou fè-w fété fèt-lasa. Lè ou ké pran tan réfléchi asi sa, ou ké sav si ou ka pran kado-lasa an men a-y. Chakfwa nou ka pran on désizyon, fò-nou sèten kè konsyans an nou pé’é bat-nou é kè nou ka rété fidèl a Jéova (Akt 23:1).

Wouviré adan lèson 44, pwen 1

 6. Maladi on moun pé ba lézòt

Konm nou enmé lézòt, nou ka fè atansyon pou nou pa kontaminé-yo èvè on maladi kè nou ni. Ki nou sèten kè nou ni maladi-la, ki nou ni lenprésyon kè nou trapé-y, nou ka pran tout prékosyon an nou. Lè nou ka aji konsa, nou ka suiv on komandman ki an Bib-la é ki ka di : « Fò ou enmé pwochen a-w kon voumenm » (Women 13:8-10).

Lè on moun ni on maladi é kè i sav kè i pé rivé a ba ondòt moun li, kijan i pé montré kè i enmé pwochen a-y ? On moun ki kontaminé pé ké pran asi-y pou pran on moun an dé bra a-y oben pou bo-y nonplis. Si sèwten moun désidé kè yo pé’é envité moun-la ki kontaminé la akaz a yo, davwa yo vlé pwotéjé fanmi a yo, fò pa sa kontraryé-y. Avan i pran batèm, i ké fè on ti kozé èvè koòwdinatè a komité a sé ansyen-la pou palé-y dè sitiyasyon a-y. Konsa, yo ké fè tousa ki fo pou i pa kontaminé sélézòt moun-la ki kay batizé la. Si on krétyen ka pansé kè i trapé on maladi é kè i pé ba dòt moun li, avan i koumansé frékanté on moun pou mayé èvè-y, i ké fè on prizdèsan. Konsa, i ké sèten kè i pé’é kontaminé ponmoun. Si i fè sa, i ké montré kè i pa ka ‘chèché yenki pwòp entéré a-y, men osi ta lézòt’ (Filipyen 2:4).

Wouviré adan lèson 56, pwen 2

 7. Afè anrapò èvè lajan é èvè lalwa

Lè nou ka fè on afè èvè on moun, menmsi sé èvè on krétyen, pisimé nou fè ansòt pou nou maké sa anlè on papyé pou nou pa trapé pwoblèm èvè ponmoun (Jérémi 32:9-12). Kanmenmsa, sa pé rivé kè sèwten krétyen trapé pwoblèm ki anrapò èvè lajan oben ki anrapò èvè ondòt biten. Adan on ka konsa, fò-yo pòté mannèv pou yo réglé pwoblèm-lasa antrè yo é adan lapé.

Men ka pou nou fè lèwvwè sitiyasyon-la grav, pa ègzanp lèwvwè ni mansonj oben madrag adan sa ? (li Matyé 18:15-17). Jézi ban-nou 3 étap pou nou suiv :

1. Éséyé réglé pwoblèm-la antrè zòt (gadé vèwsé 15 la).

2. Si zò pa’a rivé about, mandé yonn oben 2 krétyen ki ni èkspéryans édé-zòt (gadé vèwsé 16 la).

3. Si magrésa, zò pa touvé on solisyon, a moman-lasa, zò pé kriyé sé ansyen-la (gadé vèwsé 17 la).

An jénéral, lèwvwè sé krétyen-la ni on pwoblèm antrè yo, yonn pa’a menné lòt douvan tribinal paskè sa pé rivé a sali non a Bondyé é répitasyon a lasanblé-la osi (1 Korentyen 6:1-8). Men adan sèwten sitiyasyon, pétèt kè nou ké oblijé menné afè-la douvan on tribinal. Sé pé pou on divòs, pou on tèstaman, pou on pansyon alimantè, pou désidé owa kimoun sé timoun-la ké viv, pou fè asirans an nou ban-nou on lajan oben sianka antrèpriz an nou koulé. On krétyen pé mandé lalwa rézoud on pwoblèm kon séla nou sòti vwè la, pou sa pa fè twòp dézòd. Adan on ka konsa, nou pé pa di kè i pa suiv sé konsèy-la ki an Bib-la.

Si on krétyen okouran kè ni on ka ki fèt é kè i ay di lapolis sa, nou pé pa di kè i pa suiv sé konsèy-la ki an Bib-la. Si i ay rapòté kè ni on gwo vòl ki fèt, kè yo agrésé on moun, kè yo fè malpwòpté èvè on timoun oben kè yo maltrété-y, kè yo vyolé on moun oben kè yo tchouyé on moun, a pa on péché i fè.

Wouviré adan lèson 56, pwen 3