Adan òwganizasyon an nou, pa ni pon klèwjé nou ka péyé. Men, kon o prèmyé syèk, ni dé nonm ki ka sèvi Jéova fidèlman ki la pou dirijé kongrégasyon-la. Nou ka kriyé-yo « ansyen » (Akt 20:28). Yo kalifyé pou yo pran swen a kongrégasyon-la. É si yo ka fè sa, a pa pas yo ka santi-yo oblijé, men yo ka fè-y dè bonkè é a pa pou ni ayen on fason ki malonnèt non plis, men yo ka pòté bon mannèv (1 Pyè 5:1-3). Men ka yo ka fè pou nou ?

Yo ka pran swen an nou é yo ka pwotéjé-nou. Sé ansyen-la ka gidé kongrégasyon-la, yo ka pwotéjé-y é yo ka édé-y rété anba bra a Jéova. Piskè yo byen konprann sé Bondyé ki ba-yo wòl enpòwtan lasa, yo pa ka dominé an chèf asi nou ; men yo plito ka travay pou nou santi-nou byen é pou tchè an nou kontan (2 Korentyen 1:24). Menmjan on bèwjé ka pran swen a chak ti mouton ki an twoupo a-y, menmjan-la sé ansyen-la ka fè on éfò pou konnèt chak moun ki an kongrégasyon-la (Pwovèb 27:23).

Yo ka montré-nou kijan pou nou fè volonté a Bondyé. Chak simenn, sé ansyen-la ka dirijé réinyon a kongrégasyon-la pou édé-nou rann fwa an nou pi solid (Akt 15:32). Anplisdisa, lè sé pou préché, sé nonm fidèl-lasa douvan. Yo kay èvè nou an prédikasyon é yo ka montré-nou diféran métòd ki ni pou préché.

Yo ka ankourajé-nou. Pou édé-nou pwogrésé èspirityèlman, sé ansyen-la ka rann-nou vizit a kaz an nou, oben yo ka pran on moman pou kozé èvè nou an Sal di Wayòm la. Objèktif a yo, sé édé-nou é ban-nou rékonfò nou bizwen grasa Labib (Jak 5:14, 15).

Anplis dè sa yo ka fè an kongrégasyon-la, onlo ansyen ka travay pou yo gangné vi a yo é fò-yo pran swen a fanmi a yo. Sa ka mandé onlo tan é onlo vijilans osi. Sé pousa sé frè-lasa, « ki ka travay rèd », mérité nou rèspèkté-yo (1 Tésalonisyen 5:12, 13).

• Ki wòl sé ansyen-la ni an kongrégasyon-la ?

• Kijan yo ka édé-nouchak pèwsonèlman ?