Non a Bondyé, on non ki sen, maké asi chak Sal di Wayòm a Témwen a Jéova. Alò pou nou, pran swen a yo pou yo rété pwòp, byen prézantab é an bon léta, sé on gran privilèj é sé on biten enpòwtan pas nou vlé sèvi Bondyé konm i fo. Toutmoun pé pawtisipé.

Nou ka nétwayé volontyé apré on réinyon. Apré chak réinyon, sé frè é sè la kontan fè on ti nétwayaj pou yo lésé Sal di Wayòm la byen pwòp é byen ranjé. Régilyèwman, nou ka fè on pli gwo nétwayaj. On ansyen oben on asistan ministéryèl ka fè on lis a tousa ki ni a fè, é konsa i pé òwganizé travay-la. Sèlon sa ki mérité fèt, ni sa ki volontè pou baléyé, pasé aspiratè, woté pousyè, pasé sèwpiyè, nétwayé sé vit-la, sé glas-la é sé twalèt la, pou vidé sé poubèl-la, ranjé sé chèz-la é nétwayé alantou a Sal-la. Omwen on fwa an lanné-la, nou ka pran on jou pou fè on nétwayaj afon. Lè timoun an nou ka nétwayé èvè nou, nou ka aprann-yo rèspèkté koté-la nou ka adoré Bondyé la (Éklézyas 5:1).

Nou ka bay on pal lè ni dé réparasyon a fè. Chak lanné, nou ka vérifyé léta a chak Sal di Wayòm, andidan kon andèwò. Sèlon sa nou konstaté, nou ka fè sèwten réparasyon pou sé sal-la rété adan on bon léta ; konsa nou pa ka fè dépans initil (2 Kronik 24:13 ; 34:10). On Sal di Wayòm byen pwòp é adan on bon léta, sé on koté ki alahotè pou adoré Bondyé. Lè nou ka fè antrètyen a Sal-la, nou ka montré nou enmé Jéova fò é kè koté-la nou ka adoré-y la ni on gran valè pou nou (Sòm 122:1). Anplisdisa, sa ka bay on bèl témwanyaj an kawtyé-la (2 Korentyen 6:3).

• Poukwa nou pa dwètèt néglijé koté-la nou ka adoré Bondyé la ?

• Ki dispozisyon nou ka pran pou Sal di Wayòm an nou rété pwòp ?