Labib ka palé dè dé gwoup-moun ki ni rèsponsabilité adan kongrégasyon-la : « sé ansyen-la » é « sé asistan ministéryèl la » (Filipyen 1:1). An prensip, ni plizyè ansyen é plizyè asistan ministéryèl adan chak kongrégasyon. Ka sé asistan ministéryèl la ka fè ban nou ?

Yo ka édé sé ansyen-la. Kèlkèswa laj a yo, sé asistan ministéryèl la enmé Jéova, ou pé fè-yo konfyans é yo sèryé an travay a yo. Adan kongrégasyon-la, é pannan sé réinyon-la, yo ka travay pou tout biten pasé byen. Konsa sa ka pèwmèt sé ansyen-la konsantré-yo asi rèsponsabilité prensipal a yo : anségné kongrégasyon-la é pran swen a-y.

Yo ka rann-yo itil. Lè moun ka vin an réinyon, ni sèwten asistan ministéryèl ki ka akéyi-yo. Ni sa ki ka okipé dè sonorizasyon-la pou toutmoun tann byen pannan réinyon-la. Ni dòt osi ki ka jéré kont a kongrégasyon-la, ki ka ba sé frè-la piblikasyon yo bizwen, oben téritwa pou yo ay préché. Ou pé vwè-yo ka nétwayé oben réparé on biten adan Sal di Wayòm la. Délè, sé ansyen-la pé mandé-yo édé frè é sè ki ja ni on laj. Kèlkèswa rèsponsabilité a yo, sé asistan ministéryèl la ka travay èvè tout kè a yo, é sé pousa osi, adan kongrégasyon-la, tout moun ka rèspèkté-yo (1 Timoté 3:13).

Yo ka ban-nou on bèl ègzanp. Lè yo ka chwazi on frè pou i vin asistan ministéryèl, sé pas i ka manifèsté bèl kalité èspirityèl. An réinyon, lè on asistan ministéryèl ka bay on diskou, fwa an nou ka vin pli fò. An prédikasyon, sé yo osi ki antèt, kifè nou ka vé suiv ègzanp a yo. Pas yo ka kolaboré èvè sé ansyen-la, sa ka mété on bon anbyans an kongrégasyon-la é nou ka pli soudé (Éfézyen 4:16). Rivé on lè, sèwten asistan ministéryèl ké asé kalifyé pou yo vin ansyen.

• Ki kalité on asistan ministéryèl dwètèt ni ?

• Ka yo ka fè pou kongrégasyon-la fonksyonné byen ?