Dépi lontan, onlo moun ka rèkonnèt kè Jéova ka fòwmé Témwen a-y. On Témwen a Jéova ki ka pasé onlo tan ka préché pé risivwè on fòwmasyon èspésyal pou i pé sa « akonpli ministè a-[y] afon » (2 Timoté 4:5).

Lékòl pou lé pyonyé. Lè i fin prèmyé lanné sèwvis a-y, on pyonyé pèwmanan ka suiv on fòwmasyon ki ka diré sis jou. Dabitid, fòwmasyon-lasa ka fèt adan on Sal di Wayòm toupré kaz a-y. Objèktif a fòwmasyon-la sé édé pyonyé-la rapwoché-y dè Jéova plis ankò, édé-y vin pli éfikas lè i ka préché é édé-y kontinyé sèwvis a-y fidèlman.

Lékòl pou évanjélizatè a Wayòm-la. Sé on fòwmasyon ki ka diré dé mwa. I fèt èspésyalman pou fòwmé pyonyé ki ja ni on sèwten èkspéryans é ki paré a lésé la yo yé la, pou ay sèvi nenpòt koté yo bizwen-yo. Adan on sans, sé konsi yo té ka di : « Mi mwen ! Voyé-mwen ». Konsa, yo ka suiv ègzanp a Jézikri ki sé pli gran Évanjélizatè ki ja viv asi latè (Izayi 6:8 ; Jan 7:29). Pou ay viv lwen kaz a-w, défwa sa ka mandé kè ou senplifyé vi a-w. Sèlon la ou ké ay la, kilti-la, klima-la, nouriti-la pa oblijé ni ayen a vwè èvè sa ou té abityé. Pétèt osi fò-w ké aprann on dòt lang. Grasa lékòl-lasa, frè é sè ki mayé oben ki sélibatè é ki ni ant 23 é 65 an, ka kiltivé bèl kalité èspirityèl ki ké itil la yo ké voyé-yo la. Lè yo fin lékòl-lasa, yo pli kalifyé, yo sé dé « zouti-filé » an men a Jéova é an men a òwganizasyon a-y.

Lékòl biblik a Giléad. An lang ébré, « Giléad » vé di « Pil wòch [ki ka sèvi] Témwen ». Dépi lékòl-lasa wouvè an 1943, i ja voyé pliski 8000 misyonè (kivédi moun ka préché adan on dòt péyi) pou yo pé sa bay on bon témwagnaj « jis an bout a latè » (Akt 13:47). Prèmyé fwa moun ki fè Lékòl a Giléad rivé o Pérou, pa té ni pon kongrégasyon adan péyi-lasa. Jòdila, ni pliski 1000. Lè misyonè an nou koumansé préché o Japon, té ni mwens ki dis Témwen. Jòdila, ni pliski 200000. Lékòl-la ka diré 5 mwa é pannan 5 mwa-lasa, ou ka étidyé Pawòl a Bondyé an profondè. Lékòl a Giléad ka fèt si envitasyon é sé pyonyé èspésyal, misyonè, moun ki ka sèvi o Bétèl, sèwvitè a siwkonskripsyon èvè madanm a yo ki ka fè-y. Konsa yo ka risivwè on fòwmasyon sèryé pou konsolidé travay a prédikasyon-la ki ka fèt dan lèmondantyé.

• Adan ki objèktif yo ka fòwmé sé pyonyé-la ?

• Kimoun ki pé suiv Lékòl pou évanjélizatè a Wayòm-la ?