Menmsi fò-nou maché anba bwa oben fò-nou sipòté on klima ki rèd, nou ka fè tousa nou pé pou nou pa jen manké on réinyon. Sé vré, lavi pa toujou fasil, nou fatigé apré on jouné travay, men sa pa ka anpéché-nou ay réinyon pou nou èvè frè é sè an nou. Men poukwa nou ka fè tousa éfò pou nou ay réinyon ?

Sa ka fè-nou di byen. Lapòt Pòl di sé kongrégasyon-la : « Voyé zyé yonn asi lòt » (Ébré 10:24). I té vlé nou pran on tan pou sonjé frè é sè an nou, é kè yonn aprann konnèt lòt. Lè nou ka aprann konnèt moun ki an kongrégasyon-la pli byen, nou ka rann-nou kont kè ni sa ki ja pasé onlo penn é péripési. Défwa, yo rivé a bout a on difikilté nou ka travèsé konnyéla la, donk yo pé édé-nou rivé a bout a difikilté-lasa.

Lanmityé an nou solid. Lè nou kay réinyon, a pa senplèman èvè dé moun nou konnèt konsa nou ka rètouvé-nou, men sé èvè dé « zanmi-frè ». Adan dòt okazyon, nou ka pasé dé bon moman ansanm é nou ka anmizé-nou on fason ki pwòp. Ki éfé sa ni asi nou lè nou ka frékanté dòt Témwen a Jéova ? Nou ka aprann aprésyé-nou plis ankò, kifè nou ka vin enmé-nou pli fò. Alò, lè yonn adan nou ni on pwoblèm, nou ka édé-y volontyé, pas nou kréyé on lyen ki solid èvè-y, pas nou sé dé zanmi-frè (Pwovèb 17:17). Nou ka frékanté tout frè é sè an nou adan kongrégasyon-la, é sa ka montré kè « sé menmjan-la nou ka sousyé-nou yonn dè lòt » (1 Korentyen 12:25, 26).

Nou ka ankourajé-w chwazi zanmi a-w pawmi moun ki ka fè volonté a Jéova. Sé pawmi Témwen a Jéova ou ké touvé dé zanmi konsa. Pa lésé anyen anpéché-w réini èvè nou !

• Poukwa sa bon pou nou dè réini-nou èvè frè é sè an nou ?

• Kitan ou té ké vlé fè konésans èvè moun ki an kongrégasyon an nou ?