Konmen Témwen a Jéova ou konnèt ? Pétèt séla ou konnèt la, sé vwazen a-w, kolèg a-w, kanmarad-lékòl a-w. Oben ni sa ki ja ni lokazyon palé dè Labib èvè-w. Men kimoun nou yé ègzaktèman ? Poukisa nou ka palé toutmoun dè kwayans an nou ?

Nou sé dé moun kon toutmoun. Noutout pa ni menm nivo sosyal la é nou pa ni menm kilti-la. Adan nou, ni sa ki té ka pratiké on dòt rèlijyon, ni dòt ankò ki pa té ka kwè ditou an Bondyé. Men, noutout, nou pran tan an nou pou ègzaminé byen konm i fo sa Labib ka anségné (Akt 17:11). Nou té dakò èvè sa nou aprann. Donk sé pousa nou chwazi adoré Jéova.

Étidyé Labib ka pòté onlo ban nou. Kon toutmoun, nou ni pwoblèm an nou é féblès an nou osi. Men nou konstaté kè, lè nou ka fè éfò pou apliké prensip a Labib touléjou, vi an nou lontan pli bèl (Sòm 128:1, 2). Sé on rézon ki fè nou ka palé dè bèl biten nou dékouvè an Bib-la.

Nou ka viv an awmoni èvè prensip a Bondyé. Lè nou ka apliké prensip a Labib nou ka santi-nou byen é sa ka ankourajé-nou rèspèkté lézòt é montré-nou onèt é janti. Lè nou ka apliké sé prensip-lasa, sa ka rann-nou solid é itil ba lasosyété. Sa ka ankourajé-nou ni on fanmi soudé é sa ka édé-nou maché dwèt. Konm nou sèten Bondyé pa ka fè préférans, nou ka konsidéré kè nou sé on fanmi èspirityèl entèwnasyonal, kè ayen pa ka séparé, ni pwoblèm a ras, ni pwoblèm politik. Nou sé dé moun kon toutmoun, men ansanm, nou ka fòwmé on pèp vréman èspésyal (Akt 4:13 ; 10:34, 35).

• An ki sans nou pé di Témwen a Jéova sé dé moun kon toutmoun ?

• Ki prensip Témwen a Jéova aprann adan Labib ?