Bondyé vlé nou viv éré, anpé é pou toujou, asi on tè transfòwmé an paradi.

Pétèt ou ka mandé-w : « An kijan sa ké pé fèt ? ». Men Labib ka asiré-nou kè grasa Wayòm a Bondyé sa ké posib. Bondyé vlé toutmoun asi latè aprann plis asi Wayòm a-y, é asi sa i ni lentansyon fè (Sòm 37:11, 29 ; Izayi 9:7).

Bondyé vlé sa ki bon pou nou.

On bon papa toujou vlé sa ki méyè pou timoun a-y. Menmjan-la osi, Papa an nou ki an syèl-la vlé tchè an nou kontan pou létèwnité (Izayi 48:17, 18). I ka fè-nou on pwomès : « Sila ki ka fè volonté a Bondyé ké rété la pou touttan » (1 Jan 2:17).

Bondyé vlé nou suiv chimen i trasé.

Labib ka fè-nou sav kè Kréyatè an nou vlé fè-nou konnèt ki « chimen i trasé » pou nou pé sa maché « adan santyé a-y » (Izayi 2:2, 3). I òwganizé « on pèp pou non a-y », pou pèwmèt toutmoun asi latè konnèt volonté a-y (Akt 15:14).

Bondyé vlé nou ini pou nou adoré-y.

Vré rèlijyon-la pa ka divizé moun, okontrè i ka ini-yo grasa on lanmou sensè yo ka manifèsté yonn pou lòt (Jan 13:35). Jòdijou, kimoun ka anségné tout kalité moun, ki madanm ki misyé, kijan pou yo sèvi Bondyé ansanm-ansanm ? Ou ké touvé répons-la adan bwochi-lasa.