Lè yo ka di « Sal di Wayòm », ou ka tann « Wayòm ». Donk, ou ka tou konprann sé on koté nou ka bay on ansègnman biblik ki ka mèt Wayòm a Bondyé an valè. Dayè, sé té tèm a prédikasyon a Jézi (Lik 8:1).

Sé la moun ki ka sèvi Bondyé ka òwganizé aktivité èspirityèl a yo. Sé an Sal di Wayòm a yo Témwen a Jéova ka òwganizé-yo pou yo ay préché bon nouvèl-la (Matyé 24:14). Tout sé sal-la pa menm grandè-la, yotout pa fèt menmjan-la, men yotout tou senp. Byen souvan, ni plizyè kongrégasyon ka réini adan menm sal-la. Dépi kèlkètan, parapòt a kantité moun ki vin Témwen a Jéova, kantité kongrégasyon ki ni mété-y ka ògmanté tèlman vit kè fò-nou té konstwi plizyè milyé Sal di Wayòm chak lanné (apépré 5 pa jou). Kijan nou rivé fè sa ? (Matyé 19:26).

Nou ka konstwi sé sal-la grasa don moun ka fè. Nou ka voyé lajan-la ba chak biwo nasyonal é biwo-la ka mété-y a dispozisyon a kongrégasyon ki bizwen konstwi oben ranjé sal a yo.

Sé Témwen a Jéova ki ka konstwi sé sal-la yomenm é yo ka fè sa gratuitman. Adan onlo péyi, yo ka fòwmé sa yo ka kriyé ékip pou konstriksyon a Sal di Wayòm. Sé ékip-la ka pasé kongrégasyon an kongrégasyon, menm la i pa ni onlo moun ka rété, pou édé frè é sè a yo konstwi Sal di Wayòm a yo. Adan dòt péyi, yo ka mandé déotwa Témwen kalifyé òwganizé travay-la pou konstwi oben rénové Sal di Wayòm adan on réjyon byen prési. Menmsi ni onlo Témwen awtisan é kalifyé ki ka vin bay on pal asi sé chantyé-la, sé sé Témwen- la ki ka réini adan sal-la ki ka fè pli gwo a travay-la. An réyalité, si tousa posib, sé grasa lèspri sen a Jéova é grasa pèp a-y ki ka mèt tout énèrji a-y an travay-la (Sòm 127:1 ; Kolosyen 3:23).

• Koté-la nou ka adoré Bondyé la, poukwa nou ka kriyé-y « Sal di Wayòm » ?

• Kijan nou ka rivé konstwi Sal di Wayòm toupatou si latè ?