Dépi nanni-nannan, Jéova vlé kè tout fanmi pran on moman tan pou, ansanm, yo fè lanmityé a yo èvè-y vin pli fò é pou fanmi-la menm vin pli soudé (Détéwonòm 6:6, 7). Sé pousa Témwen a Jéova ka prévwa on moman an simenn-la pou yo fè étid familyal a yo, sètadi pou yo adoré Bondyé an fanmi. Adan on anbyans agréyab, yo ka palé dè diféran sijé èspirityèl ki ka korèsponn èvè sa yo bizwen. Menmsi ou ka viv tousèl, ou pé pran on tan pou Bondyé, pa ègzanp ou pé étidyé on sijé biblik ki ka fè-w plézi.

On moman pou rapwoché-zòt dè Jéova. « Rapwoché-zòt dè Bondyé, é i ké rapwoché-y dè zòt » (Jak 4:8). Ou ka aprann konnèt Jéova pli byen lè ou ka dékouvè, adan Pawòl a-y, ki jan dè moun i yé é kijan i ka aji. On fason tousenp pou koumansé étid familyal la, sé dè li Labib ansanm. Pou sa, chak simenn, zò pé suiv pwogram a lèkti a Labib yo ka bay pou réinyon-la yo ka kriyé Vi é Ministè. Chakmoun pé li on mòso é toutmoun ka kouté. Aprésa, zòchak pé di ka zò aprann.

On moman pou fanmi-la vin pli soudé. Lè on mari èvè madanm a-y, on papa é on manman èvè timoun a yo, ka étidyé labib ansanm, fanmi-la ka vin pli soudé. Nòwmalman, fò étid-la fèt adan on anbyans agréyab, trankil, é fò toutmoun présé pou moman-lasa rivé. Sèlon laj a sé timoun-la, sé paran-la ka chwazi dé sijé ki itil pou yo. Pou sa, yo ka itilizé awtik ki adan La Tour de Garde, adan Réveillez-vous !, oben asi sit entèwnèt an nou, jw.org. Pa ègzanp, si sé timoun-la ka jwenn on pwoblèm lékòl, yo ka palé dè sa ansanm pou yo vwè kijan yo pé rézoud-li. Mi on dòt lidé : É si zò té ka gadé on émisyon asi JW Télédiffusion ? (on chenn télé nou ni asi entèwnèt ; adrès a sit-la sé : tv.pr418.com). Lè zò fin gadé émisyon-la, zò pé diskité dè sa zò vwè. Ni dé paran osi ki byen enmé chanté kantik ki an pwogram a sé réinyon-la é ki ka touvé sa entérésan dè manjé on tibiten apré moman èspirityèl lasa.

Adoré Jéova chak simenn pannan bèl ti moman-lasa ka pèwmèt tout fanmi-la pran plézi étidyé Pawòl a Bondyé. Asiré pa pétèt, Jéova ké béni tout éfò zò ké fè an sans-lasa (Sòm 1:1-3).

• Poukwa fò prévwa on moman pou étid familyal la ?

• Ka léparan pé fè pou rann moman-lasa agréyab pou tout fanmi-la ?