Poukwa sé moun-la ki asi foto-la kontan konsa ? Pas yo adan on lasanblé Témwen a Jéova òwganizé. An tan lontan, sèwvitè a Jéova té présé pou yo sanblé, twa fwa an lanné-la, kon Bondyé té mandé-yo. Menmjan-la, nou osi, nou toujou présé pou jou a lasanblé an nou rivé (Détéwonòm 16:16). Kon yo, nou osi, chak lanné nou ni twa lasanblé : dé lasanblé siwkonskripsyon ki ka diré on jouné é on lasanblé réjyonal ki ka diré twa jou. Ki bon biten sé lasanblé-la ka pòté ban nou ?

Lanmou an nou pou frè é sè an nou ka vin pli fò. Tou konm sé Izrayélit-la té ka kontan ba Bondyé glwa « anmitan foulmoun ki sanblé », nou osi, sé èvè on gran jwa nou ka adoré Jéova ansanm pannan lasanblé an nou (Sòm 26:12 ; 111:1). Sé lasanblé-lasa ka ban-nou lokazyon rankontré oben wouvwè Témwen ki adan dòt kongrégasyon é menm sa ki sòti adan dòt péyi. A midi, nou ka rété ansanm pou nou manjé, kifè anbyans-la ka pi bèl ankò é nou ka pwofité pou nou fè konésans èvè dòt moun (Akt 2:42). Lè i ni dé évènman èspirityèl kon séla, noumenm nou ka rèsanti fòs a lanmou-la ki ka ini « tout frè é sè an nou » toupatou si latè (1 Pyè 2:17).

Nou ka pwogrésé èspirityèlman. Sé Izrayélit-la té ka kontan pou on dòt rézon ankò : yo té ka « konprann sé pawòl-la » yo té ka èspliké-yo la, pawòl ki té sòti adan Lézékriti (Nèémya 8:8, 12). Kon yo, nou enmé ansègnman biblik la nou ka risivwè la pannan lasanblé an nou. Chak lasanblé bazé si on tèm ki sòti an Bib-la. Grasa diskou nou ka tann é ti iskètch yo ka jouwé, nou ka aprann kijan pou nou fè volonté a Bondyé an vi an nou. Anplisdisa, sa ka ankourajé-nou dè tann jan sèwten pawmi nou ka réyisi suiv ègzanp a Jézi, magré difikilté ki ni konnyéla la. Pannan sé lasanblé réjyonal la, ni dé pyès téat ki ka ban-nou lenprésyon nou ka viv sèwten istwa ki an Bib-la é ki ka anségné-nou dé lèson ki vréman itil pou nou. A chak lasanblé, ni batèm ki òwganizé pou sa ki vlé montré toutmoun kè yo ofè Bondyé vi a yo.

• Poukwa nou ka kontan lè nou lasanblé ?

• Si ou vin lasanblé ka sa ké pòté ba-w ?