Kèlkètan avan i mò, Jézi anonsé : « Bon nouvèl a wayòm-la, yo ké préché-y toupatou ni moun ka rété asi latè, pou-y sèvi témwagnaj ba tout sé nasyon-la ; é aprésa lafen ké vin » (Matyé 24:14). Men ki métòd yo té ké itilizé pou préché asi toutlatè ? Yo té ké bazé-yo asi modèl-la Jézi lésé la (Lik 8:1).

Nou ka éséyé jwenn sé moun-la a kaz a yo. Jézi aprann disip a-y préché bon nouvèl-la kaz an kaz (Matyé 10:11-13 ; Akt 5:42 ; 20:20). Sé prèmyé krétyen-la té ka préché adan on téritwa byen délimité (Matyé 10:5, 6 ; 2 Korentyen 10:13). Menmjan-la, jòdila, prédikasyon an nou byen òwganizé : chak kongrégasyon ka préché adan on zòn byen délimité. Sé grasa sa nou ka rivé akonpli misyon-la Jézi ban-nou la : préché é bay on témwagnaj afon (Akt 10:42).

Nou ka fè éfò pou nou jwenn moun toupatou nou pé touvé-yo. Jézi té ka préché toupatou i té pé jwenn moun, ki sé té bòdlanmè oben la moun té kay chèché dlo (Mawk 4:1 ; Jan 4:5-15). Nou osi, nou ka chèché a ni on ti konvèwsasyon si Labib toupatou sa posib : an lari-la, la sé moun-la ka travay la, adan on pawk, etc. Nou ka préché pa téléfòn osi. É lè nou ni lokazyon, nou ka préché ba vwazen an nou, kolèg an nou, kanmarad-lékòl an nou é ba moun ki an fanmi an nou. Grasa éfò-la nou ka fè la, plizyè milyon moun asi latè ja tann « bon nouvèl a délivrans [an nou] » (Sòm 96:2).

Èvè kimoun ou té ké vlé palé dè bon nouvèl a Wayòm a Bondyé, é dè sa sa vlé di pou dèmen ? Mésaj-lasa pé ba moun ki ka tann-li onlo èspwa. Pa gadé-y pou-w ! Dépi ou pé, pawtajé-y èvè dòt moun !

• Ki « bon nouvèl » nou dwètèt anonsé ?

• Jézi itilizé diféran métòd pou-y té préché ; kijan Témwen a Jéova ka imité-y ?