Labib té anonsé kè, apré mò a Jézi, pawmi sé prèmyé krétyen-la, té ké ni sa ki té ké mété-yo ka anségné mansonj. Yo té ké tòd sans a vérité-la ki an Bib-la (Akt 20:29, 30). É sé ègzaktèman sa ki rivé. Yo mélanjé sa Jézi té anségné èvè sa dòt rèlijyon ki pa té krétyen té ka anségné. Sa fin pa bay enpé rèlijyon ki ka sanm sa yo ka suiv Jézi, men ki an réyalité pa ka fè sa i mandé (2 Timoté 4:3, 4). Men alò konnyéla, kijan nou pé sèten kè nou rivé konprann sa Labib ka anségné vréman ?

Moman-la té rivé. Jéova té anonsé : « An tan a lafen, ké tini vré konésans-la an abondans » (Danyèl 12:4). An 1870, on piti gwoup-moun ki té ka chèché lavérité rann-yo kont kè onlo rèlijyon té ka anségné lèkontrè a sa Labib ka di. Kifè, gwoup-lasa chèché a konprann sa Labib té ka di odépa. É Jéova édé-yo.

Yo pran tan étidyé Labib byen konm i fo. Gwoup-lasa (non a yo sété Étidyan a Labib) té ka itilizé on métòd pou étidyé, on métòd nou ka itilizé jòdila ankò : Yo té ka étidyé Labib tèm pa tèm. Délè, yo té ka rivé asi on pasaj ki té rèd a konprann, alò yo té ka chèché dòt vèwsé pou yo té pé sa èspliké-y. Dépi yo té rivé a on konklizyon ki té ka kolé èvè rèstan a Bib-la, yo té ka maké-y. Pas yo té ka sèvi èvè Bib-lamenm pou yo té èspliké on pasaj adan-y, yo woumèt onlo vérité dèwò : vérité asi non a Bondyé, asi Wayòm a-y, asi sa Bondyé ni lentansyon fè pou latè é pou lézòm, asi sa ki ni apré lanmò é asi lèspwa a larézirèksyon. Rézilta, yo touvé-yo libéré dè onlo kwayans é dè onlo vyé mès (Jan 8:31, 32).

An 1879, Étidyan a Labib rann-yo kont kè moman-la té rivé pou yo té fè toutmoun konnèt lavérité. Sé pou sa yo koumansé pibliyé La Tour de Garde annonce le Royaume de Jéhovah, on jounal nou ka pibliyé jousalè. Jòdila, nou ka fè moun konnèt vérité-la ki an Bib-la adan pliski 240 péyi é téritwa é adan pliski 750 lang. Sé prèmyé fwa nou ka vwè vré konésans-la an gran kantité konsa !

• Apré mò a Jézi, ka vérité-la ki an Bib-la divini ?

• Kijan vérité-lasa wouparèt ?