Jòdila, Témwen a Jéova ka rèsèvwa plis nouriti èspirityèl an fòwma élèktwonik ki a pon dòt épòk. Men onlo koté asi latè, frè an nou pa ni lémwayen péyé pou ni on konèksyon Entèwnèt. Dòt ka viv dé koté swa Entèwnèt-la ka koupé touttan, swa i oralanti, oswa pa ni ditou.

Men alèla, onlo adan frè é sè an nou pé téléchawjé sé piblikasyon élèktwonik la menmsi yo pa ni Entèwnèt. Kijan sa posib ?

Grasa on bwatyé JW. Sé on ti aparèy yo ka ba sé lasanblé-la ki dé koté Entèwnèt-la pa’a pasé byen. Adan bwatyé-lasa, ou ka touvé : on routè kè yo achté an men a on antrèpriz, on lojisyèl kè Sèwvis enfòwmatik a Bétèl-la dévlopé, é piblikasyon élèktwonik é vidéo ki disponib asi jw.org. Chak bwatyé ka kouté apépré 75 dola amériken (anviwon 64 €).

Adan Sal di Wayòm la, sé frè é sè la ka konèkté aparèy élèktwonik a yo an wifi anlè bwatyé JW la, é aprésa yo ka téléchawjé sé piblikasyon-la é sé vidéo-la. Menm séla ki ni dé aparèy ki ansyen oben ki ka kouté bon maché pé konèkté-yo. Men si on lasanblé pa ni Entèwnèt, kijan yo ka fè pou bwatyé JW la ni sé dènyé piblikasyon-la ? Dè tanzantan, filyal-la ka voyé klé USB ba sé lasanblé-la, kè yo pé branché anlè sé bwatyé JW la. Anlè sé klé USB lasa, ni dènyé biten ki sòti asi jw.org. Chak klé ka kouté aprépré 4 dola amériken (anviwon 3 €).

Kijan bwatyé JW la édé sé frè-la ? Nathan Adruandra, on papa ki ka viv an Répiblik démokratik a Kongo, ka èspliké : « Pannan lontan an éséyé téléchawjé fim-la “Ô Jéhovah, en toi j’ai placé ma confiance !” é fim-la Souvenez-vous de la femme de Lot. Men an pa jen rivé, é sa dékourajé-mwen. Alèla an pé téléchawjé sé vidéo-lasa anlè téléfòn an mwen, é sa ka édé-nou antankè paran anségné timoun an nou plibyen. »

On frè ki édé plizyè lasanblé o Nijérya a enstalé bwatyé JW la, di konsa : « Pou sé frè-la, bwatyé JW la sé on kado èspésyal Jéova fè-yo. Yo kontan toubònman kè alèla yo pé téléchawjé fasilman piblikasyon é vidéo ki adan bwèt a zouti pou anségné la. »

Yo ja voyé plis ki 1 700 bwatyé pou frè an nou an Afrik, an Oséani, é an Amérik di Sid, é yo prévwa voyé-yo pou onlo dòt lasanblé ankò. Ola yo ka pran lajan-la pou fè sa ? Sé grasa ofrann ki fèt pou aktivité mondyal la. Onlo adan yo ka fèt anlè Entèwnèt asi donate.pr418.com. Mèsi pou sé ofrann-la zò ka fè la dè-tou-kè.