Toupatou si latè, onlo gouvènman ka oblijé sé moun-la rété a distans yonn dè lòt é yo sispann sé évènman-la ki ka sanblé onlo moun. Sé Témwen a Jéova la ka rèspèkté sé dispozisyon-lasa, toupannan yo ka kontinyé réini-yo san mèt ponmoun andanjé. Pou rivé fè sa, sé lasanblé lokal la mèt-yo ka sèvi èvè aplikasyon ki fèt pou fè vidéokonférans, kon Zoom pa ègzanp, pou yo pé tchenn réinyon a yo.

Pou nou kontinyé réini-nou chak simenn é an tout sékirité, Komité santral la bay akò a-y pou yo achté kont Zoom pou sé lasanblé lokal la èvè lajan a sé don-la. Dispozisyon-lasa té vréman itil pou sé lasanblé-la ki pa té ni lémwayen péyé on kont pou fè vidéokonférans ki ka kouté ant 15€ é 20€ oben plis ankò. Byensouvan, sé lasanblé-lasa té ka sèvi èvè aplikasyon ki gratui men ki pa’a pèwmèt onlo moun konèkté-yo, é ki pa gè otòp nivo sékirité. Tout sé lasanblé-la ki ka sèvi èvè kont Zoom lòwganizasyon ofè-yo, pé réglé sékirité a aplikasyon-la fasilman é onlo moun pé konèkté-yo pou sé réinyon-la. Jòdila, plis ki 65 000 lasanblé adan plis ki 170 péyi ka sèvi èvè dé kont konsa.

An Endonézi, lasanblé a Kairagi, a Manado (Sulawesi di Nò), ki té ka sèvi èvè on aplikasyon a vidéokonférans ki gratui, ka sèvi alèla èvè on kont Zoom lòwganizasyon mèt a dispozisyon a-y. Frè Hadi Santoso ka èspliké : « Alèla, menm sé frè é sè la ki pa’a byen sav mannyé sé aparèy élèktwonik la pé pwofité dè sé réinyon-la, èspésyalman pas yo pa bizwen rèkonèkté-yo ankò plizyè fwa pannan menm réinyon-la. »

An Ékwatè, a Guayaquil, Lester Jijón ki ansyen adan lasanblé a Guayacanes Ès ka rakonté : « Konm onlo frè é sè maléré, sèwten lasanblé pa té’é janmen ni asé lajan pou achté on lisans Zoom pou pèwmèt toutmoun adan lasanblé-la suiv sé réinyon-la. Aprézan, konm sé kont Zoom la yo achté ban nou la ka pèwmèt onlo moun konèkté-yo, nou pé envité kantité moun nou vlé adan sé réinyon-la, san menm mandé-nou si nou pé ké dépasé limit-la. »

An Zanbi, a Lusaka, Johnson Mwanza ki ansyen adan lasanblé a Ngwerere Nò ékri : « Onlo frè é sè ka di kè lèfètkè “lòwganizasyon ofè-yo on kont Zoom, nonsèlman sa ka rapwoché-yo dè frè é sè a yo, men anplis sa ka fè-yo santi kè Jéova enmé-yo é ka pran swen a yo”. »

Sé grasa lajan-la yo ka mèt akoté pou pòté sèkou kè lòwganizasyon pé ofè sé kont Zoom lasa. Lajan-lasa ka vin dè don moun ka fè dè yomenm pou soutyenn aktivité mondyal la. Onlo adan yo ka fèt anlè Entèwnèt asi donate.pr418.com. Mèsi pou sé ofrann-la zò ka fè la dè-tou-kè, ki ka soutyenn osi dòt mannèv pou pòté sèkou adan lèmondantyé (2 Korentyen 8:14).