Témwen a Jéova ka pòté sèkou adan plis ki 200 péyi, ki adan domenn èspirityèl, ki adan domenn matéryèl. Men pawmi sé péyi-lasa, enki 35 apépré ka rèsèvwa asé ofrann lokal pou péyé pwòp dépans a yo. Kijan yo ka fè pou péyé sé dépans-la sé koté-la ki pli maléré la ?

Komité santral la ka ègzaminé ka sé Témwen a Jéova la bizwen toupatou si latè pou kontinyé adoré Jéova é préché bon nouvèl-la. Yo ka kalkilé konmen lajan ki ké nésésè, é yo ka dépansé lajan-lasa konm i fo. Si on filyal ka rèsèvwa plis lajan ki sa i bizwen pou okipé dè sé aktivité-la ki ka fèt anlè téritwa a-y, i ka mèt sa ki anplis a dispozisyon a sé péyi-la ki pa ni asé. Lè sa ka fèt konsa, nou ka suiv ègzanp a sé prèmyé krétyen-la. Yonn té ka édé lòt, pou « tout biten vin a menm nivo-la » (2 Korentyen 8:14). Yo sèvi èvè sa yo té ni anplis pou konblé mank a sélézòt krétyen-la ki té ni mwens.

Ka frè an nou ki rèsèvwa lajan kè sélézòt filyal-la té ni anplis ka rèsanti ? An Tanzani, pa ègzanp, on koté plis ki lanmwatyé a popilasyon-la ka viv èvè mwens ki 2 € chakjou, yo sèvi èvè lajan kè sélézòt filyal-la té ni anplis pou woufè on Sal di Wayom kè lasanblé a Mafinga ka itilizé. Mi sa lasanblé-la maké : « Dépi yo woufè sal-la, ni lontan plis moun ki ka vin réinyon ! Nou ni onlo rèkonésans pou òwganizasyon a Jéova é pou fanmi entèwnasyonal a frè é sè an nou ki donan, davwa yo pèwmèt-nou pwofité dè on bèl koté konsa pou adoré Jéova. »

Sèwten adan frè an nou o Èsrilanka soufè pas pa té ni asé manjé akòz dè épidémi a Covid-19 la. Imara Fernando é jenngason a-y, Enosh, adan yo. Men grasa ofrann a dòt péyi, yo rèsèvwa sèkou-la yo té bizwen la. Asi on kat yo fè yomenn, mi sa yo maké : « Nou ka di sé frè-la mèsi pou lanmou-la yo montré-nou la pannan sé moman difisil lasa. Nou kontan toubònman nou ka fè pawti a fanmi-lasa, é nou ka kontinyé priyé Jéova pou i édé tout frè an nou pannan sé dènyé jou-lasa. »

Kèlkanswa la frè é sè an nou ka viv, yo ka santi-yo pousé a pawtajé sa yo ni. Enosh, pa ègzanp, fabriké on ti bwèt a ofrann pou limenm, pou li osi pé sa édé fanmi ki bizwen èd. Guadalupe Álvarez ka montré menm létadèspri-lasa, i donan. I ka viv on koté o Mèksik, menm pli piti pèy-la, pa ni onlo moun ki ka touché sa, ni menm ki ka rèsèvwa on pèy chak mwa. Magrésa, i ka bay sa i pé. I ékri : « An ka di Jéova mèsi pou bonté a-y é pou lanmou fidèl a-y. An sav ofrann an mwen ké jwenn ta lézòt é i ké sèvi pou édé frè an mwen ki an difikilté. »

Sé filyal-la ki ka voyé lajan sé koté-la ki bizwen la kontan dè fè sa. Mi sa Anthony Carvalho, ki ka sèvi adan Komité a filyal a Brézil, ka di : « Pannan plizyè lanné, nou té bizwen lajan a sélézòt péyi-la pou soutyenn aktivité-la adan péyi an nou. Grasa èd-lasa, nou vwè aktivité-la pwogrésé on mannyè ki èstraòwdinè. Alèla, sitiyasyon an nou chanjé, é nou jous ni privilèj-la dè édé lézòt. Frè an nou ka pran tan gadé aktivité a prédikasyon-la ki ka fèt toupatou si latè, é yo ka réfléchi pou vwè ka yo pé fè konnyéla pou édé antankè disip a Jézi ki paré a fè sakrifis. »

Ki méyè biten sé Témwen a Jéova la pé fè pou soutyenn frè é sè a yo ki bizwen èd ? A pa lè yo ké voyé lajan dirèktèman ba filyal a dòt péyi, men sé lè yo ka fè ofrann pou aktivité mondyal la. Sa posib grasa bwèt a ofrann a lasanblé-la ki maké « Œuvre mondiale » oben asi donate.pr418.com. Nou ka aprésyé tout sé don-lasa toubònman.