Chak lanné, ni dé santèn dè milyé moun ki ka pran batèm, kifè nou bizwen dèplizanplis koté pou nou adoré Jéova. Sé pousa sé sèwvis lokal la pou dévlopé é konstwi (LDC) toupatou si latè té ja prévwa konstwi oben woufè anèf pliski 2700 koté nou ka adoré Bondyé, pannan lanné a sèwvis 2020 *.

Malérèzman, pandémi a Covid-19 la chalviré tout sé pwojé-lasa. Pou pé sa pwotéjé frè é sè an nou, é suiv sa sé gouvènman-la ka mandé, Komité pou édisyon-la, on komité a Komité santral la, arété lamajorité a sa yo té ka prévwa konstwi toupatou si latè. Magrésa, pannan lanné a sèwvis 2020, yo rivé konstwi oben woufè anèf pliski 1700 koté nou adoré Jéova, avan pandémi-la koumansé. Anplisdisa, yo bout apépré on santèn pwojé ki té lyanné èvè aktivité a sé filyal-la. An-nou gadé kijan dé adan sé pwojé-lasa sèvi frè é sè an nou toubònman.

Filyal a Lèkamwoun. Sé ansyen batiman a filyal-la, ki té a Douala, té two piti, é yo té mérité gwo travo pou woumèt-yo byen annòd. Komité pou édisyon-la té ja ni lidé woufè sé batiman-lasa anèf, men sé travo-la tousèl té’é kouté pli chè ki sa sé batiman-la té vo. Yo té ja réfléchi osi pou vwè si fò yo té achté on nouvo téren, oben si fò yo té achté é woufè anèf batiman ki té ja ka ègzisté. Men anfinaldikont, yo pa fè ni yonn, ni lòt.

Anmenmtan, sé frè-la vin sav kè o nò a Douala, lalwa té ka prévwa konstwi on wout ki té’é pasé toupré a yonn adan sé sal dasanblé an nou la. Lari-lasa té kay pèwmèt rivé san pwoblèm anlè téren-la, é sa té’é pli fasil pou branché sé batiman-la asi sé diféran rézo-la. Sé ègzaktèman sa filyal-la té bizwen. Sé pousa Komité santral la bay akò a-y pou konstwi nouvo batiman asi on mòso a téren a sal dasanblé la.

Témwen a Jéova é antrèpriz travay ansanm-ansanm asi pwojé-lasa. Grasa métòd-lasa, sé travo-la ay pli vit, é yo dépansé mwens lajan. An réyalité, pwojé-la kouté lontan mwen chè ki sa yo té prévwa. Yo ékonomizé apépré 1 700 000 éwo. On titak tan avan pandémi-la koumansé, fanmi a Bétèl-la té pé enstalé-y adan sé nouvo batiman-la.

Konnyéla, sé Bétélit-la o Kamwoun lontan pli alèz a yo, é yo ka travay adan dé kondisyon ki lontan pli agréyab. Pou yo, nouvo filyal-lasa, sé on kado ka vin dè Jéova. Mi sa on frè é madanm a-y ka di : « Nou vréman anvi travay pli rèd ankò pou montré nou konnèt ki valè kado-lasa ni, é kijan nou ka aprésyé-y. »

Antèn a tradiksyon la an Tojolabal (Mèksik). Sa té ja ka fè onpakèt lanné kè ékip a tradiksyon la an Tojolabal té ka travay adan filyal a Lamérik santral, toupré Mèksiko. Men sé siwtou a Altamirano é a Las Margaritas, dé vil ki apépré a 1000 kilomèt dè filyal-la, kè yo ka palé lang-lasa. Kifè, sé tradiktè-la pa té ka rivé suiv byen jan lang-la té ka chanjé. É pou pé sa touvé dé frè é sè kalifyé toupré, pou pé sa vin tradui é fè anrèjistrèman an Tojolabal, sé té tout on bab pou filyal-la.

Sé pousa Komité pou rédaksyon-la, on komité a Komité santral la, désidé déplasé ékip a tradiksyon la pou fè-y vin adan on réjyon yo ka palé lang-lasa. Pou pé sa atenn òbjèktif-lasa, filyal désidé achté on batiman é woufè-y anèf. Sa té kay kouté lontan mwen chè ki konstwi oben louwé biwo.

Mi sa on tradiktè di pou èspliké ki byenfé sa pwokiré-y : « An sèvi antankè tradiktè adan filyal-la pannan dis lanné, men an pa jen jwenn an sèktè-la pa menm on fanmi ki té ka palé lang an mwen. Konnyéla, antèn a tradiksyon an nou anmitan a sèktè-la la yo ka palé Tojolabal. Pa ni on jou ka pasé san an jwenn on moun ki ka palé Tojolabal. Sa pèwmèt-mwen aprann nouvo mo, é an ka travay pibyen. »

Pannan lanné a sèwvis 2021, si sitiyasyon-la favorab, nou ka prévwa konstwi oben woufè anèf 75 antèn a tradiksyon é sant pou fè lékòl biblik. Ni uit gwo pwojé anrapò èvè sé filyal-la ki ké kontinyé fè douvan, kon pa ègzanp sa biwo mondyal la prévwa konstwi a Ramapo, adan Léta a Nouyòk, é filyal a Lawjantin é a Litali, kè nou ka prévwa déplasé. Anplisdisa, nou bizwen pliski 1000 nouvo sal di Wayòm, ni 6000 koté nou ka adoré Bondyé ki pa adapté é kè fò-nou ranplasé, é ni 4000 sal di Wayòm pou nou woumèt annòd.

O nou ka pran lajan pou tout sé pwojé-lasa ? Pannan frè Lázaro González, ki adan filyal a Lamérik santral, té ka palé dè pwojé a antèn a tradiksyon la an Tojolabal, i réponn a kèsyon-lasa. Mi sa i di : « Adan téritwa a filyal an nou, délè lajan-la ka tibwen kout. Alò si a pa té frè é sè an nou toupatou si latè ki té ka édé-nou, nou pa té’é jen pé konstwi antèn a tradiksyon adan lang a péyi-la. Grasa ofrann frè é sè an nou toupatou si latè ka fè, konnyéla sé tradiktè-la pli pré a sé moun-la ki ka palé lang a yo la. Nou ka di fanmi entèwnasyonal an nou on mèsi ka sòti an fon a tchè an nou, pou mannyè yo donan. » É sé vré, zò ka fè don pou aktivité mondyal a prédikasyon-la, siwtou anlè sit-la donate.pr418.com, é sé grasa sa nou ka rivé konstwi sa nou té prévwa.