An juiyé é an out 2020, pou prèmyé fwa, tout fanmi entèwnasyonal a frè é sè an nou ké gadé menm pwogram a lasanblé réjyonal la pannan menm péryòd-la. Pou sa té posib, fò yo té anrèjistré pwogram a lasanblé-la é aprésa tradui-y an plis ki 500 lang. An jénéral, pou rivé about a on pwojé konsa, sa ka pran on lanné oben plis ankò. Men akòz dè épidémi a koronaviris-la, sé tradiktè a lasanblé réjyonal 2020 la « Toujou mèt jwa an tchè a zòt ! » té ni mwens ki 4 mwa pou yo té fin travay-la.

Sèwvis-la ki ka édé sé tradiktè-la é sèwvis mondyal la ki ka achté la adan biwo mondyal a Témwen a Jéova bay on pal adan gwo pwojé-lasa. Sèwvis-la ki ka édé sé tradiktè-la rèmawké kè onlo adan sé ékip-la ki ka tradui la té bizwen plis matéryèl pou fè travay-la, èspésyalman dé mikro ki ni on bon kalité. Sèwvis mondyal la ki ka achté la òwganizé-y pou achté 1000 mikro é pou yo pé sa livré-yo apépré 200 koté diféran.

Pou ékonomizé lajan, yo achté tout sé mikro-la ansanm, yo voyé-yotout menm koté-la é yo préparé dé koli pou yo té voyé-yo toupatou asi latè. Konm yo achté-yo an gwo, chak mikro kouté apépré 170 dola amériken (150 €), pri a transpò-la konté adan. Kifè, nou ékonomizé plis ki 20% asi pri-la sa té’é kouté la si nou té achté-yo yonn pa yonn.

Sèwvis mondyal la ki ka achté la achté é voyé sé mikro-la an avril é an mé 2020, alòskè onlo antrèpriz té ka touné o ralanti akòz dè pandémi-la. Magrésa, an fen a mwa-d-mé, lamajorité a sé antenn a tradiksyon la, a sé bétèl-la é sé biwo a tradiksyon la té ja wousouvwè matéryèl-la yo té bizwen la.

Mi sa Jay Swinney, ki rèsponsab a sèwvis mondyal la ki ka achté la, ka di : « Sé sèwvis-la ki adan bétèl-la é sé entrèpriz-la ki kolaboré pou nou té rèsèvwa matéryèl-la travay ansanm-ansanm toutolon a pwojé-la. Menmsi nou sanblé fòs an nou alantou a pwojé-lasa, sé enki grasa lèsprisen a Jéova kè nou rivé about a misyon an nou vit konsa é san sa kouté two chè. »

Nicholas Ahladis, ki ka travay èvè sèwvis-la ki ka édé sé tradiktè-la, ka di : « Lè sé tradiktè-la ki té konfiné la rèsèvwa matéryèl-la, sa ankourajé-yo toubònman. Menmsi yo té séparé dè rèstan a ékip a tradiksyon a yo, yo té pé travay ansanm pou tradui é anrèjistré diskou, fim, é chanté an plis ki 500 lang. »

Pwojé-lasa, men osi onlo dòt, pèwmèt a tout fanmi entèwnasyonal a frè é sè an nou dè bénéfisyé dè pwogram a lasanblé réjyonal 2020 la « Toujou mèt jwa an tchè a zòt ! ». É si nou rivé achté tout matéryèl-la ki té nésésè la, sé grasa don zò ka bay dè-tou-kè anlè donate.pr418.com é pa dòt mwayen ankò.