« An éséyé li Labib, men lè an vwè tousa i té ni a li sa dékourajé-mwen ! » (Briana, 15 an).

 Ès ou ka rèsanti menm biten la ? Awtik-lasa pé édé-w !

•  Poukwa fò ou li Labib ?

•  Ka an pé fè pou an li Labib ?

•  Sa yo ka di dè sa

 Ès tèt a-w ka fè-w mal lè ou ka sonjé kè fò ou li Labib ? Si répons-la sé wi, nou ka konprann-vou. Pétèt kè pou vou, Labib sé on gwo liv ki ni pliski 1 000 paj, ki maké toupiti é ki pa ni pon vidéo adan… i pa’a fè lèpwa douvan télé-la é sé vidéo-la !

 Men éséyé vwè sa ondòt jan : Imajiné ou ka touvé on vyé kòf ki ni trézò adan-y, ès ou pa té’é anvi sav ki trézò ésa ?

 Labib ka touvé-y kon on vyé kòf ki ni trézò-lasa. Adan-y tini onlo trézò ki ké édé-w ni sajès :

•   Pran bon désizyon ;

•   Rété anpé èvè papa-w é manman-w ;

•   Touvé bon zanmi ;

•   Jéré istrès a-w ;

 Poukwa on liv ki ni tousa lanné pé itil ba-w jòdla ? Sé pas « tout Ékriti-la, sé Bondyé ki enspiré-y » (2 Timoté 3 :16). Sa vlé di kè sé konsèy-la ki adan Labib ka vin dè méyè sous-la.

 Lidé n° 1 : Li Labib dépi okoumansman jis an bout a-y. Konsa ou ké sav dè kibiten i ka palé. Tini plizyè mannyè pou li Labib. An-nou vwè 2 ègzanp :

•    Ou té’é pé li sé 66 liv la ki adan Labib adan lòd-la yo yé la, dè Jénèz a Révélasyon.

•    Ou té’é pé li Labib adan lòd-la sé évènman-la fèt-la.

 On ti konsèy : Adan Apendis A7 a Traduction du monde nouveau, nou ka touvé sé évènman-la ki pi enpòwtan la adan vi a Jézi lè i té asi latè adan lòd-la yo fèt la.

 Lidé n° 2 : Chwazi on istwa a Labib ki ka palé dè on pwoblèm ou ka jwenn. Pa ègzanp :

•   Ès ou té’é anvi touvé zanmi ou pé fè konfyans ? Li istwa a Jonatan é David (1 Samiyèl, chapit 18-20). Aprésa, sèvi èvè fich-la ki fèt pou édé-w réfléchi « Comment se faire des amis fidèles ?» pou vwè ki lèson istwa-lasa ka aprann-vou.

•   Ès ou té’é enmé tchenbé douvan sé tantasyon-la ? Li istwa a Jozèf pou vwè kijan i tchenbé douvan tantasyon i jwenn (Jénèz, chapit 39). Aprésa, sèvi èvè sé fich-la ki fèt pou édé-w réfléchi « Comment résister à la tentation ? Joseph — 1^re partie » èvè « Accusé à tort ! Joseph — 2^e partie » pou vwè ki lèson istwa-lasa ka aprann-vou.

•   Ès ou té’é enmé sav kijan lapriyè pé édé-w ? Li istwa a Néémi (Néémi chapit 2). Aprésa, sèvi èvè sé fich-la ki fèt pou édé-w réfléchi « Dieu a répondu à sa prière » pou vwè ki lèson istwa-lasa ka aprann-vou.

 On ti konsèy : Lè ou ka li Labib, chwazi on koté ki kalm pou ou pé sa byen konsantré-w.

 Lidé n° 3 : Chwazi on istwa adan Labib oben on sòm, li-y é aprésa réfléchi asi jan-la ou pé mété-y an pratik adan vi a-w. Apré lèkti a-w, mi sa ou té’é pé mandé-w :

•    Poukwa Jéova mèt enfòwmasyon-lasa adan Labib ?

•    Ka sa ka aprann mwen asi pèwsonalité a Bondyé é anlè jan i ka aji ?

•    Kijan an pé apliké sa an li la adan vi an-mwen ?

 On ti konsèy : Mi on biten ou pé éséyé fè : Maké dat-la ou té’é enmé koumansé pwogram a lèkti a Labib a-w é sèvi èvè pwogram-la ki anlè sit entèwnèt an nou.