SÉ JENN-LA KA MANDÉ-YO
Lè sé moun-la ka gadé jan an abiyé, ka sa ka aprann-yo asi mwen ?
Poukwa fò ou pran tan réfléchi asi sa ou ka mèt asi-w ? Pas jan-la ou ka chwazi abiyé-w ka montré ki jan dè moun ou yé. Ki mésaj lenj a-w ka ba sé moun-la ?
Mi twa gwo zatrap é mi kijan pou ou pa pri adan yo
Zatrap no 1 : Lè ou ka lésé sé médya-la di-w kijan pou-w abiyé.
Mi sa Theresa, on jennmoun, ka di : « Dépawfwa, an ka vin enmé on sèwten mòd senplèman pas an vwè onlo piblisité ki té ka palé dè-y. Lèwvwè yo ka mèt douvan zyé a-w onlo imaj a moun ki ni on sèwten lenj oben on biten pou fè bèbèl asi yo, sa rèd dè pa fè kon yo. »
Piblisité pa ka touché yenki sé jennfi-la. Mi sa liv-la The Everything Guide to Raising Adolescent Boys ka di anrapò èvè sa : « Sé gason-la osi pé anvi suiv sa ki lanmòd. É menmsi yo toupiti toujou, ja ni piblisité ki fèt èspésyalman pou atiré-yo. »
Méyè chwa-la : Labib ka di : « On moun ki pa ni èkspéryans ka kwè tousa moun ka di, men nonm-la ki ka pran prékosyon a-y ka véyé chak pa i ka fè » (Pwovèb 14:15). Annakò èvè prensip-lasa, pran tan analizé byen konm i fo sa ou ka vwè adan sé piblisité-la. Pa ègzanp, lè ou ka vwè piblisité pou lenj ki « sèksi » ou pé mandé-w :
« Si an mèt-mwen ka suiv mòd-lasa, an réyalité, kimoun ki ké bénéfisyé dè sa ? »
« Ki jan dè vi yo ké kwè an ka menné ? »
« Ès sa ka korèsponn vréman a sa an yé é a sa an ka pansé ? »
On ti konsèy asi lanmòd : Pannan on simenn, gadé byen sé piblisité-la é sélézòt médya-la ki èspésyalis adan lanmòd. Ki jan dè vi yo ka ankourajé ? Ès dèyè do a sé piblisité-lasa pa ni on mésaj pou ou ni lenprésyon kè ou bizwen suiv mòd-lasa ? Mi sa Karen, on jennmoun ka di asi sa : « Ni on présyon ki fò toubònman pou ou pé sa ni lenj ki pawfè, pou istil a-w pawfè é pou-w pé sa fyèw dè montré jan kò a-w “pawfè”. Lè séla ki ka fè sé piblisité-la ka konprann sa, yo ka rivé atiré sé jenn-la fasilman. »
Zatrap no 2 : Lè ou ka suiv lanmòd jis pou fè kon toutmoun.
Manuel, on jennmoun, ka di : « Si on lenj lanmòd, ou pé sèten toutmoun ké mété-y. É si ou pa’a mété-y vou osi, yo ké jijé-w. » Mi sa Anna, on jennmoun ki dakò èvè sa, ka di : « A moman-lasa, a pa suiv lanmòd ki enpòwtan men sa ki ka konté sé fè kon toutmoun. »
Méyè chwa-la : Mi sa Labib ka di : « Pa lésé mond-lasa aji anlè zòt ankò » (Women 12:2). Annakò èvè konsèy-lasa, analizé sé lenj-la ou ka mèt asi-w la é pozé-w sé kèsyon-lasa :
« An jénéral, ka ki ka fè-mwen chwazi tèl ou tèl lenj ? »
« Ès an ka mò pou ni on lenj dè mak ? »
« Ès òbjèktif an mwen sé fè-moun vwè kijan an byen sapé ? »
On ti konsèy asi lanmòd : Olyé ou kwè kè sé sèlman 2 posibilité ki tini — swa ou lanmòd (é ou sé moun a toutmoun) oben swa ou pa lanmòd (é ponmoun pa’a kapté-w ankò) — réfléchi asi twazyèm posibilité-lasa : aprann ni konfyans adan-w pou-w pa lésé sa lézòt ka pansé aji anlè-w. Pli ou ké santi-w alèz, mwens ou ké anvi suiv lézòt.
Zatrap no 3 : Lè ou ka pansé « pli i sèksi, pli i bon ».
« Franchman, délè, ou ka byen anvi pòté on ti lenj byen sèksi, kon pa ègzanp on lenj ki kout kout kout, ki on jan two séré oben on lenj ki ka montré ou ni fòm », sé sa Jennifer ka di.
Méyè chwa-la : Mi sa Labib ka di : « Fò pa bèlté a zòt vin dè sa moun ka vwè [...] men pisimé i vin dè sa zò yé andidan (1 Pyè 3:3, 4) Annakò èvè konsèy-lasa, sonjé sa ki ka rann-vou pi bèl : on lenj moun ka vwè oben on bèl pèwsonalité ?
On ti konsèy asi lanmòd : Pi bèl « lenj » ou pé mété anlè-w sé modèsti. Sé vré, jòdijou sé on kalité ki ra, men pran on ti tan pou réfléchi asi ègzanp-lasa :
Ès sa ja rivé-w palé èvè on moun ki non sèlman ka palé twòp men anplisdisa ki ka palé yenki dè-y ? Sa ki pi tris sé kè moun-lasa pa menm ka rann-li kont kè ponmoun pa asi-y ankò !
Lenj a-w, é sa ou ka di adan ti kozé a-w, pé bay lenprésyon kè sé-w tousèl ki enpòwtan é piti-a-piti ponmoun pé’é kapté-w ankò.
Lè ou ka abiyé-w on mannyè ki pa korèk, sa ka détenn asi pèwsonalité a-w. Sé konsi lenj a-w ka di toutmoun « gadé-mwen », é sa pé bay lenprésyon kè ou pa ni konfyans adan-w oben kè ou ka sonjé yenki vou, oben lé dé alafwa. Yo pé rivé a kwè kè ou paré a fè nenpòt biten pou moun (menm moun ki ni mové lentansyon) pé sa gadé-w.
Olyé ou éséyé fè toutmoun vwè-w, fè sa ou pé pou ni modèsti. Mi sa on jennfi non a-y sé Monika ka di : « Modèsti, sa pa vé di abiyé kon mami a-w. Men sa vé di kè ou ka rèspèkté-w é kè ou ni rèspé pou lézòt. »
Ay gadé sa osi...
SA YO KA DI DÈ SA
Sa yo ka di dè sa : Jan ou ka vwè aparans a-w
Poukwa sa rèd pou sé jenn-la dè kontinyé ni ékilib asi jan yo ka vwè aparans a yo ? Ka ki pé édé-yo ?
