« Pli an té ka grandi é pli atirans an mwen pou jenngason kon mwenmenm té ka vin fò. Pawmi tout sé konba-la an ja menné la, sé-y ki té pli rèd la. An té ka kwè kè sé santiman-lasa té’é pasé on jou men yo la jousalè é yo ka chouboulé-mwen toujou » (David, 23 an).

 David sé on jenn krétyen ki vlé fè Bondyé plézi, men ès i pé fè-y plézi alòskè andidan-y i ni on atirans pou moun ki ni menm sèks ki-y ? Lè misyé ka fè makonmè é lè madanm ka fè zanmi, ka Bondyé ka pansé dè sa ?

•  Ka Labib ka di asi sa ?

•  Ès sa vlé di kè… ?

•  Ka nou pé di asi... ?

 Sa sé moun-la ka pansé asi pratik sèksyèl lasa pé diféran dapré kilti a yo, oben dapré épòk-la yo ka viv la. Men sé krétyen-la pa ka lésé sa sé moun-la ka kwè an jénéral enfliyansé-yo. Yo pa kon dé moun « kè tout van a ansègnman ka chayé an tout sans » (Éfézyen 4:14). Sé krétyen-la ka apiyé-yo asi sé prensip-la ki an Bib-la pou yo pé sav si lè moun ka fè makonmè oben lè yo ka fè zanmi, sé on biten ki ka fè Bondyé plézi. É sé prensip-lasa ka gidonné osi sa yo ka pansé adan tout kalté domenn.

 Labib ka palé dè rèlasyon sèksyèl ant 2 moun ki ni menm sèks-la é sa i ka di asi sa klè toubònman. Mi sa pawòl a Bondyé ka di :

•  « Fò pa ou ni rèlasyon sèksyèl èvè on misyé menmjan ou ka ni rèlasyon sèksyèl èvè on madanm. Sé on biten ki ka répigné-w » (Lévitik 18:22).

•  « Sé pousa Bondyé lagé-yo [...] anba pouvwa a sa tchè a yo anvi, [...] anba pouvwa a anvi sèksyèl kè yo ni é kè yo pa ka métrizé, pas madanm a yo lésé rèlasyon sèksyèl ki natirèl pou ni rèlasyon sèksyèl ki pa natirèl » (Women 1:24, 26).

•  « Alò zò pa sav kè moun ki pa jis pé ké érité wayòm a Bondyé ? Pa pri adan sa : moun ki ka fè péché sèksyèl, moun ki ka adoré idòl, moun ki ka fè adiltè, nonm ki ka kouché èvè nonm, moun ki vòlè, moun ki toujou anvi ni plis ki sa yo ja ni, moun ki bwasonè, moun ki ka jiré moun é moun ki ka kouyonné moun pou pran lajan a yo pé ké érité wayòm a Bondyé » (1 Korentyen 6:9, 10).

 An réyalité, prensip a Bondyé valab pou toutmoun, ki nou ni rèlasyon sèksyèl èvè moun ki ni menm sèks ki nou oben ki nou ni rèlasyon sèksyèl èvè moun ki pa ni menm sèks ki nou. Anfinaldikont, noutout dwètèt métrizé-nou dépi nou ka santi nou anvi fè on biten ki pé ké fè Bondyé plézi (Kolosyen 3:5).

 Ès sa vlé di kè Labib ka ankourajé-nou hay séla ki ni rèlasyon sèksyèl èvè moun ki ni menm sèks ki yo ?

 Non. Anfèt, Labib pa ka ankourajé-nou hay ponmoun kèlkèswa sa moun-la désidé fè adan domenn sèksyèl. Okontrè mi sa i ka di : « Chèché a viv anpé èvè toutmoun », kèlkèswa vi-la moun-la ka menné la (Ébré 12:14). Lè yo ka agrésé sé moun-la ki ka fè makonmè oben ki ka fè zanmi, oben lè yo ka fè-yo tout kalté méchansté, sé on biten ki pa bon ditou-ditou.

 Ès sa vlé di kè sé krétyen-la dwètèt lévé kont sé lwa-la ki ka otorizé moun ki ni menm sèks mayé ?

 Adan Labib, sa Bondyé désidé sé kè sé sèlman on misyé é on madanm ki pé mayé ansanm (Matyé 19:4-6). Lè moun ka fè déba asi mayé a 2 moun ki ni menm sèks, a pa on kèsyon moral men sé on kèsyon politik. É Labib ka di sé krétyen-la pa mélé-yo adan politik (Jan 18:36). Kifè, sé krétyen-la pa’a soutyenn lwa a sé gouvènman-la ki ni on rapò èvè mayé a 2 moun ki ni menm sèks é sé lwa-la ki ka défann sé pratik sèksyèl lasa. Men yo pé’é pran pozisyon kont sa sé gouvènman-la désidé anrapò èvè sa nonplis.

 Men ka nou pé di asi on moun ki ni rèlasyon sèksyèl èvè ondòt moun ki ni menm sèks ki-y ? Ès i pé chanjé ?

 Wi. Jistèman, sé sa sèwten moun ki té ka viv o prèmyé syèk rivé fè ! Labib ka di kè moun ki ka fè makonmè oben moun ki ka fè zanmi pé ké érité dè wayòm a Bondyé. Aprésa mi sa i ka ajouté : « Sé konsa déotwa adan zòt té yé » (1 Korentyen 6:11).

 Ès sa vlé di kè moun ki té ka fè makonmè oben moun ki té ka fè zanmi enn oubliyé atirans-la yo té ni la pou moun ki ni menm sèks ki yo ? Non. Mi sa Labib ka di : « Mété nouvo pèwsonalité-la anlè zòt, pèwsonalité-la ki ka wouvin nèf grasa konésans ègzak la » (Kolosyen 3:10). Sé piti-a-piti on moun ka rivé chanjé.

 Men ka nou pé di asi on moun ki anvi suiv prensip a Bondyé anrapò èvè domenn-lasa men ki ka goumé kont atirans-la i ni la pou moun ki ni menm sèks ki-y ?

 Kèlkèswa mové lanvi i pé ni, on moun pé chwazi pa fè-yo grandi oben i pé désidé pa suiv lidé a-y. Kijansa ? Labib ka di : « Kontinyé lésé lèspri sen gidé-zòt é zò pé’é fè sa chè a zòt bizwen fè-zòt fè » (Galat 5:16).

 Bib-la pa ka di kè moun-la pé’é ni pon mové lanvi ankò. Men si i ka fè tousa i pé pou vin pli fò èspirityèlman é kè pou sa i ka li Labib é i ka priyé toutlè, i ké pé ni fòs-la i bizwen la pou goumé kont sa chè a-y anvi fè-y fè.

 An-nou wouvin asi ègzanp a David. Sé sa limenm konstaté, siwtou lè i di paran a-y ki konba i té ka menné. Mi sa i di : « An santi on gwo pwa sòti asi zépòl an mwen. Si an té palé-yo dè sa pli granbonnè, vi an mwen té’é pli bèl lèwvwè an té pli jenn. »

 Anfinaldikont, lèwvwè nou ka apliké prensip a Jéova, sa ka mèt plis jwa an tchè an nou. Nou sèten kè prensip a Jéova « jis », « ka mété onlo jwa an tchè a moun », é kè « moun ki ka rèspèkté-yo ka jwenn on gwo rékonpans » (Sòm 19:8, 11).