On òwganizasyon o Zétazini (L’agence fédérale américaine de contrôle et de prévention des maladies) fè on ankèt owa on gwoup jenn ki té ni ant 15 é 19 an. Pliski lanmwatyé a sé jenn-la di kè yo té ja ni lokazyon ni rèlasyon sèksyèl pa bouch (kivédi karésé sèks a on jennfi oben sèks a on jenngason èvè bouch-la oben èvè lang-la). Sharlene Azam, on madanm ki ékri liv-la Les relations buccogénitales : la nouvelle façon de se dire bonne nuit (angl.), ka èspliké : « Si zò ka palé sé jenn-la dè rèlasyon sèksyèl pa bouch, yo ké di-w kè a pa on biten ki si grav ki sa. Anfèt, pou yo, a pa vréman rèlasyon sèksyèl. »

•  Kijan ou ka vwè sa ?

•  Ka ki ka fèt vréman ?

•  Poukwa sa enpòwtan ?

 Réponn wi oben non a sé kèsyon-la ki ka vin la :

1.   Ès on jennfi pé tonbé ansent apré i karésé èvè bouch a-y sèks a on jenngason ?

   1.   Wi

   2.   Non

2.   Rèlasyon sèksyèl pa bouch ès sa pé rann-vou malad ?

   1.   Wi

   2.   Non

3.   Rèlasyon sèksyèl pa bouch ès sé vréman rèlasyon sèksyèl ?

   1.   Wi

   2.   Non

 Konparé répons a-w èvè séla ki ka vin-la :

1.   Ès on jennfi pé tonbé ansent apré i karésé èvè bouch a-y sèks a on jenngason ?

    Mi répons-la : Non. Sé pousa onlo moun ka kwè kè rèlasyon sèksyèl pa bouch pa danjéré, men yo ka tronpé-yo.

2.   Rèlasyon sèksyèl pa bouch, ès sa pé rann-vou malad ?

    Mi répons-la : Wi. On moun ki ni rèlasyon sèksyèl pa bouch pé trapé véri asi sèks a-y, on épatit (A oben B), on enfèksyon sèksyèl yo ka kriyé blennorragie an fwansé, on èwpès, on sifilis oben viris-la ki ka bay sida-la (VIH).

3.   Ès on rèlasyon sèksyèl pa bouch sé vréman on rèlasyon sèksyèl ?

    Mi répons-la : Wi. Tousa ki anrapò èvè itilizasyon a sèks a ondòt moun — kon pa ègzanp on rèlasyon sèksyèl nòwmal, on rèlasyon sèksyèl pa bouch oben pa fès, oben lè on moun ka karésé sèks a ondòt moun pou fè-y pran plézi — tout sé biten-lasa sé rèlasyon sèksyèl.

 Mi déotwa vèwsé a Labib ki ni on rapò èvè rèlasyon sèksyèl pa bouch :

 Mi sa Labib ka di : « Pas mi sa Bondyé vlé : [...] fò pa zò fè pon péché sèksyèl » (1 Tésalonisyen 4:3).

 Mo-la yo sèvi èvè-y la odépa pou tradui « péché sèksyèl », yo ka itilizé-y pou palé dè tout kalté rèlasyon sèksyèl andéwò a mayé. Mo-lasa ka sèvi pou palé dè rèlasyon sèksyèl ki nòwmal, dè rèlasyon sèksyèl pa bouch oben pa fès. Yo ka itilizé-y osi lè on moun ka karésé sèks a ondòt moun pou fè-y pran plézi. On konduit sèksyèl ki pa pwòp ka menné konsékans ki grav. Pli grav la, sé kè Bondyé ké ba moun-lasa do (1 Pyè 3:12).

 Mi sa Labib ka di : « Moun-la ki ka fè péché sèksyèl ka péché kont pwòp kò a-y » (1 Korentyen 6:18).

 Lè on moun ni rèlasyon sèksyèl pa bouch sa pé ni vyé konsékans asi santé a-y, asi lanmityé a-y èvè Bondyé a-y é menm asi santé mantal a-y. Mi sa liv-la Comment parler de sexualité avec vos enfants (angl.) ka di : « A pa sèlman apré on rèlasyon sèksyèl ki nòwmal on moun pé règrété sa ki fèt, pé santi-y frajil oben pé ni lenprésyon kè yo sèvi èvè-y. Tout sé vyé santiman-la ki ka chouboulé on moun lèwvwè i mal viv on rèlasyon sèksyèl nòwmal, i pé rèsanti-yo osi apré nenpòt ki kalté rèlasyon sèksyèl kè i mal viv osi. On rèlasyon sèksyèl ka rété on rèlasyon sèksyèl. »

 Mi sa Labib ka di : « Mwen, Jéova, an sé Dyé a-w, sila ki ka anségné-w pou byen a-w » (Izayi 48:17).

 Ès ou ka kwè kè lwa a Bondyé anrapò èvè rèlasyon sèksyèl sé vréman pou byen a-w ? Oben ès ou ka kwè kè yo ka privé-w dè on biten ? Pou édé-w réponn a sé kèsyon-lasa, éséyé imajiné on chimen ki ni onlo vwati asi-y é ki ni onlo pano osi : pano pou di-w a ki vitès pou-w woulé, pano pou di-w fò ou arété é dòt pano ankò. Ès ou ka pansé kè sé pano-lasa ka limité libèté a-w oben kè yo ka pwotéjé-w ? Ka ki té’é pasé si ki vou, ki sélézòt moun-la ki ka kondui la, pa té ka rèspèkté sé pano-lasa ?

 Sé menm biten pou prensip a Bondyé. Si ou pa’a tchenn kont dè yo, ou ké rékòlté sa ou simé (Galat 6:7). Mi sa liv-la La sexualité intelligente (angl.) ka di : « Pli ou ka mèt akoté sa ou ka kwè oben sa ki vréman enpòwtan ba-w pou fè dé biten ki ka jenné-w, mwens ou ké rèspèkté-w. » Pawkont, si ou ka rèspèkté prensip a Bondyé, ou ké montré kè ou sé vréman on moun ki fò. É pli enpòwtan la, konsyans a-w ké rété nèt (1 Pyè 3:16).