Ès Bondyé toupatou anmenmtan ?
Mi sa Labib ka di
Bondyé pé vwè toutbiten é i kapab fè sa i vlé, la i vlé (Pwovèb 15:3 ; Ébré 4:13). Men Labib pa ka anségné kè Bondyé toupatou anmentan é i pa ka di nonplis kè i adan toutbiten. Okontrè, Labib ka èspliké kè Bondyé sé on moun é kè i ka rété on koté byen prési.
Ki sòt dè kò Bondyé ni : Bondyé sé on lèspri, sa vlé di kè lézimen pé pa vwè-y (Jan 4:24 ; Jan 1:18). Lè Bondyé ka parèt adan sé vizyon-la ki an Bib-la, i pa ka parèt toupatou anmenmtan, men i toujou on koté byen prési (Izayi 6:1, 2 ; Révélasyon 4:2, 3, 8).
Koté-la Bondyé ka rété la : Bondyé ka rété adan on mond èspirityèl ki pi ho ki tousa zyé an nou ka vwè. Koté-lasa pa ni ayen a vwè èvè linivè é latè. Adan mond èspirityèl-lasa, ni ’ on koté Bondyé ka rété adan syèl-la ’ (1 Wa 8:30). Labib ka montré kè on jou sé kréyati èspirityèl la « antré é pran plas douvan Jéova a », sa ka montré kè Jéova ni on koté byen prési i ka rété (Jòb 1:6).
Si Bondyé pa toutkoté anmenmtan, ès i pé vréman sousyé-y dè mwen pèwsonèlman ?
Wi. Bondyé ka sousyé-y vréman dè nouchak. Menmsi i ka rété adan on mond èspirityèl, Bondyé ka rèmawké moun asi latè ki ka fè tousa yo pé pou yo fè-y plézi é i ka aji an favè a yo (1 Wa 8:39 ; 2 Kronik 16:9). An nou vwè kijan Jéova ka montré kè i ka sousyé-y dè séla ki ka adoré-y èvè tout tchè a yo :
Lè ou ka priyé : Toupannan ou ka priyé, Jéova ja ka tann sa ou ka di-y (2 Kronik 18:31).
Lè ou tris : « Jéova toupré a moun tchè a yo fann ; i ka sové moun ki dékourajé » (Sòm 34:18).
Lè ou bizwen on dirèksyon : Grasa a Labib, Jéova « ké édé-w konprann onlo biten » é i « ké fè-w konnèt ki chimen pou-w pran » (Sòm 32:8).
Ès Bondyé toupatou anmenmtan : sa déotwa moun ka pansé asi sa
Sa onlo moun ka kwè : Nou ka touvé Bondyé toupatou adan kréyasyon a-y.
Mi vérité-la : Bondyé pa’a rété ni asi latè ni pondòt koté adan linivè (1 Wa 8:27). Sé vré kè sé zétwal-la é sélézòt biten-la ki adan lanati « ka fè moun konnèt glwa a Bondyé » (Sòm 19:1). Menmjan on awtis ki ka fè penti pa adan tablo a-y, menmjan-la osi Bondyé pa adan sa i kréyé. Pawkont, tablo-la pé aprann-nou dé biten asi moun-la ki fè-y la. Sé menm biten pou Kréyatè-la, « kalité a-y kè ou pé pa vwè », kon puisans a-y, sajès a-y é lanmou a-y, ka parèt byen adan tousa ki alantou an nou (Women 1:20).
Sa onlo moun ka kwè : Fò Bondyé toupatou anmenmtan pou i konnèt toutbiten é pou i toupuisan.
Mi vérité-la : Lèspri sen sé fòs-la Bondyé ka sèvi èvè-y la lèwvwè i ka aji. Grasa lèspri sen a-y, Bondyé pé vwè toutbiten é i pé fè tousa i vlé toutkoté é a nenpòt ki moman. É i pa menm oblijé déplasé-y pou fè sa (Sòm 139:7).
Sa onlo moun ka kwè : Sa nou ka li an Sòm 139:8 ka pwouvé kè Bondyé toupatou anmenmtan. Mi sa nou ka li : « Si an té ka monté an syèl-la, ou té’é la, é si an té ka fè kabann an mwen adan Tonm-la, ou té’é la osi ».
Mi vérité-la : Vèwsé-lasa pa’a palé dè koté-la Bondyé ka rété la. Men i ka èspliké-nou on mannyè ki bèl kè pa ni pon koté ki two lwen pou Bondyé pé sa aji an favè an nou.
a Jéova sé non a Bondyé kon Bib-la ka montré nou-y.
Ay gadé sa osi...
ANSÈGNMAN ENPÒWTAN KI AN BIB-LA
Ès Bondyé ka ègzisté vréman ?
Pran tan étidyé sé prèv-la ki ka montré kè sa lojik dè kwè an Bondyé.
KÈSYON BIBLIK
Lèspri sen : ka sa yé ojis ?
Labib ka palé dè lèspri sen a Bondyé konsi sété « men a-y » é i ni dé rézon valab dè fè sa.
KIMOUN NOU YÉ ?
Mandé on vizit
Palé dè sa Labib ka di asi kèsyon-la ou vlé la, oben aprann plis biten asi Témwen a Jéova.