Wi. Labib ka ban-nou dé rézon solid dè kwè kè Bondyé ka ègzisté. Dapré Labib, fò pa nou enn kwè sa sé rèlijyon-la ka di, men fò-nou fè fwa an nou grandi é pou sa fò-nou sèvi èvè « kapasité nou ni pou rézoné » é « entélijans » an nou (Women 12:1 ; 1 Jan 5:20). Mi déotwa prèv ki bazé asi Labib :

•   Lèfètkè linivè ka ègzisté, kè i byen òwganizé é kè i ni lavi adan-y, sa ka pwouvé kè ni on Kréyatè. Mi sa Labib ka di : « Tout kaz ni on moun ki fè-y, men moun-la ki fè tout biten sé Bondyé » (Ébré 3:4). Menmsi rézònman-lasa tousenp, onlo moun ki fè gran lékòl ka touvé-y fò toubònman. a

•   Dépi nou fèt, nou bizwen sav poukwa nou asi latè é ki sans pou nou ba vi an nou. Bizwen-lasa tèlman fò kè sé konsi on moun toujou fen alòskè i sòti manjé. Kifè, menmsi nou ni tousa ki fo pou nou viv, nou ké toujou santi ka manké-nou on biten. Anrapò èvè sa, Labib ka palé dè séla « ki ka rann-yo kont kè yo bizwen Bondyé gidé-yo », kivédi yo anvi konnèt Bondyé é adoré-y (Matyé 5:3 ; Révélasyon [oben Apocalypse an fwansé] 4:11). Lèfètkè nou ni sé bizwen-lasa adan nou ka montré kè Bondyé ka ègzisté, men yo ka montré osi kè Kréyatè an nou enmé-nou é kè i vlé rasazyé lanvi kè nou ni dè konnèt-li é adoré-y (Matyé 4:4).

•   Adan Labib, nou ka touvé dé pwofési kè yo maké lontan alavans é ki ni onlo détay. Lè nou ka gadé jan sé pwofési-lasa réyalizé konm i fo é adan mwenn ti détay, nou ka tou konprann kè yo pa ka vin dè nonm, men dè on sous ki pli ho (2 Pyè 1:21).

•   Sé nonm-la ki maké Labib té konnèt dé biten asi lasyans kè moun ki té ka viv a menm épòk ki yo pa té konnèt ditou. Pa ègzanp, an tan lontan onlo moun té ka kwè ké Latè té pozé asi zannimo kon éléfan, kochon sovaj, bèf é dòt zannimo ankò. Pawkont, Labib ka di kè Bondyé « ka sispann latè, san ayen pou tchenbé-y » (Jòb 26:7). Labib ka palé osi dè fòwm a Latè on mannyè ki prési lè i ka di kè Latè « kon on boul » (Izayi 40:22). Kijan nou pé èspliké kè sé nonm-la ki maké Labib té annavans parapòt a épòk a yo ? Onlo moun ka pansé kè sa pi lojik dè kwè kè sa yo té sav té ka vin dè Bondyé.

•   Labib ka réponn a onlo kèsyon ki difisil é lè on moun pa’a touvé répons ki fyab a sé kèsyon-lasa sa pé menné-y a kwè kè Bondyé pa ka ègzisté. Pa ègzanp, si Bondyé plen lanmou é kè i toupuisan, poukwa lèmal é lasoufrans ka ègzisté ? É poukwa pli souvan ki rarman, larèlijyon ka pousé sé moun-la fè sa ki mal olyé dè fè sa ki byen ? (Tit 1:16).