Lèspri sen sé fòs-la Bondyé ka sèvi èvè-y la lèwvwè i ka aji (Miché 3:8 ; Lik 1:35). Lè Bondyé ka voyé lèspri a-y, sa vlé di kè i ka fè énèwji a-y travay pou akonpli volonté a-y kèlkèswa koté-la i ka voyé-y la (Sòm 104:30 ; 139:7).

 Adan Labib, pou tradui mo ébré-la rouah é mo grèk-la pneuma, yo ka sèvi èvè « lèspri ». Pli souvan ki rarman, yo ka itilizé sé dé mo-lasa pou palé dè fòs-la Bondyé ka sèvi èvè-y la lèwvwè i ka aji, lèspri sen (Jénèz 1:2). Men Labib ka sèvi èvè yo pou palé dè dòt biten osi :

•   Souf-la (Abakik 2:19 ; Révélasyon 13:15)

•   Van-la (Jénèz 8:1 ; Jan 3:8)

•   Fòs-la ki adan tout sé kréyati-la é ki ka pèwmèt-yo viv (Jòb 34:14, 15)

•   Létadèspri a on moun oben mannyè i ka rézonné (Nonb 14:24)

•   Sé lèspri-la kon Bondyé é sé zanj-la (1 Wa 22:21 ; Jan 4:24)

 Tout sé biten-lasa sé dé biten nou pa’a vwè, men pawkont nou ka vwè rézilta a aksyon a yo. Alò, lèspri a Bondyé « kon van-la, nou pé pa vwè-y, nou pé pa touché-y é i puisan » (Dapré An Expository Dictionary of New Testament Words, W. Vine).

 Dépawfwa, Labib ka palé dè lèspri sen a Bondyé konsi sé « men-ay » oben « dwèt a-y » (Sòm 8:3 ; 19:1 ; Lik 11:20 ; gadé Matyé 12:28). Menmjan on awtizan ka sèvi èvè men a-y é dwèt a-y pou fè travay a-y, menmjan-la osi Bondyé sèvi èvè lèspri sen a-y pou pwodui dé biten kon :

•   Linivè (Sòm 33:6 ; Izayi 66:1, 2)

•   Labib (2 Pyè 1:20, 21)

•   Sé mirak-la sèwvitè a-y fè dan lèpasé é mannèv yo pòté adan prédikasyon-la (Lik 4:18 ; Akt 1:8 ; 1 Korentyen 12:4-11)

•   Bèl kalité a séla ki ka obéyi-y (Galat 5:22, 23)

Lèspri sen a pa on moun

 Lè i ka palé dè lèspri a Bondyé konsi sété « men-ay », « dwèt a-y » oben « souf a-y », Labib ka montré kè lèspri sen a pa on moun (Ègzòd 15:8, 10). Men a on awtizan pé pa travay si entélijans a-y é kò a-y pa ka gidonné yo. Menmjan-la, sé Bondyé ki ka gidonné lèspri sen a-y pou i pé sa aji (Lik 11:13). Labib ka konparé lèspri a Bondyé èvè dlo osi é dépawfwa i ka lyanné-y èvè dé biten kon lafwa oben lakonésans. Tout sé konparézon-lasa ka montré-nou byen kè lèspri sen a pa on moun (Izayi 44:3 ; Akt 6:5 ; 2 Korentyen 6:6).

 Labib ka ban-nou non a Bondyé, Jéova, é ta gason a-y, Jézikri. Men nou pa’a touvé non a lèspri sen pon koté (Izayi 42:8 ; Lik 1:31). Labib ka palé dè Étyèn, on krétyen yo pèwsékité é kè yo tchouyé akòz dè fwa a-y. Grasa on mirak, i rèsèvwa on vizyon a sa ki té ka fèt an syèl-la. Adan vizyon-lasa, i pa vwè 3 moun men 2 moun tousèl. Mi sa Labib ka di : « Men li, ki té ranpli èvè lèspri sen, rété ka fiksé syèl-la é i vwè glwa a Bondyé é Jézi doubout adwat a Bondyé » (Akt 7:55). Sé lèspri sen, fòs-la Bondyé ka sèvi èvè-y la, ki pèwmèt Étyèn vwè vizyon-lasa.

 Sa onlo moun ka kwè : Dapré 1 Jan 5:7, 8, « Lèspri » oben lèspri sen sé on moun, on pawti a Latrinité. Sé sa tradiksyon a Labib a Crampon ka di.

 Mi vérité-la : Mi sa nou ka li adan tradiksyon a Crampon an 1 Jan 5:7, 8 : « Papa-la, Vèwb-la é Lèspri-la ; é sé twa-lasa ka fè yonn. É i ni twa ka témwagné asi latè ». Men, èspésyalis a Labib rann-yo kont kè lapòt Jan pa té maké sé mo-lasa, kivédi yo pa ka fè pawti a tèks a Labib kon i té maké odépa. Adan menm lidé la, mi sa pwofésè Bruce Metzger maké :« Sé mo-lasa pa ka fè pawti a tèks orijinal la é yo pa ni plas a yo adan Nouvo Tèstaman-la ; sa sèten » (Dapré A Textual Commentary on the Greek New Testament).

 Sa onlo moun ka kwè : Labib ka palé dè lèspri sen konsi sé on moun, donk sa ka pwouvé kè sé on moun.

 Mi vérité-la : Dépawfwa, Labib ka palé dè lèspri sen konsi sété on moun, men sa pa vlé di kè sé on moun. Pa ègzanp, lè i maké sa Jézi di, lapòt Jan palé dè lèspri sen konsi sété on moun lè i di kè sé on « asistan » ki ka bay prèv, ka gidé, ka palé, ka tann, ka anonsé dé biten, ka glorifyé é ka wousouvwè (Jan 16:7-15). Labib ka palé osi dè dòt biten konsi sé dé moun kon sajès-la, lanmò é péché-la (Pwovèb 8:3 ; Women 5:17, 21). Pa ègzanp, Labib ka di dè sajès-la kè i « ka hélé tout fòs a-y an lari-la » é i ka di osi kè péché-la ka dousiné, kè i ka tchouyé é kè i ka ba-w anvi ni sa ki pa ta-w (Pwovèb 1:20 ; Women 7:8, 11).

 Sa onlo moun ka kwè : Batizé on moun an non a lèspri sen sa ka pwouvé kè lèspri sen sé on moun.

 Mi vérité-la : Dépawfwa, Labib ka sèvi èvè èsprésyon-la « an non a » pou palé dè pouvwa oben dè otorité (Détéwonòm 18:5, 19-22 ; Èstè 8:10). Lè on moun batizé an non a lèspri sen sa vlé di kè i ka rèkonnèt pouvwa a lèspri sen é osi kè Bondyé ka sèvi èvè-y pou fè volonté a-y.

 Sa onlo moun ka kwè : Apòt a Jézi é dòt disip ki té ka viv o prèmyé syèk té ka kwè kè lèspri sen sété on moun.

 Mi vérité-la : A pa sa Labib é Listwa ka di. Mi sa nou ka li adan Encyclopædia Britannica : « Yo koumansé anségné kè lèspri sen sé on moun apa é on dyé lèwvwè sé labé-la sanblé Constantinople, an 381 », kivédi pliski 250 lanné apré mò a dènyé apòt-la.