Èskè sé pwofési-la anrapò èvè Mési-la ka montré kè Jézi sé té Mési-la ?

KOUTÉ-Y AN

Mi sa Labib ka di

Wi. Lèwvwè Jézi té asi latè, i réyalizé onlo pwofési anrapò èvè « Mési-la, Gid-la », sila ki té ké « sovè a mond-la » (Danyèl 9:25 ; 1 Jan 4:14). É menm apré mò a-y, i kontinyé réyalizé sèwten pwofési (Sòm 110:1 ; Akt 2:34-36).

Ka lèmo « Mési » vlé di ?

Mo ébré-la Mashiah (Mési) é mo grèk la ki ka korèsponn èvè-y la Khristos (Kris) vlé di menm biten-la. Yo toulédé vlé di « Wen ». Kifè, « Jézikris » vlé di « Jézi, Wen-la » oben « Jézi, Mési-la ».

An tan a Labib, on moun té wen lè yo té ka vidé luil asi tèt a-y pou montré kè yo té ba-y on otorité pou i akonpli on misyon èspésyal (Lévitik 8:12 ; 1 Samiyèl 16:13). Jéova chwazi Jézi antankè Mési. Sé on wòl ki té ka ba Jézi on gran otorité (Akt 2:36). Men pousa, Bondyé pa vidé luil asi tèt a-y. I sèvi èvè lèspri sen a-y pou i té chwazi Jézi (Matyé 3:16).

Èskè ni plizyè moun ki réyalizé sé pwofési-la anrapò èvè Mési-la ?

Non. Lè nou ka gadé jan sé pwofési-la ki an Bib-la ka akonpli, nou ka konstaté kè sa ka konsèwné onsèl Mési oben onsèl Kris. Men Bib-la avèti-nou ; i di-nou kè « ni fo Kris é fo pwofèt ki ké parèt, é ki ké fè gwo mirak é biten ki èstraòwdinè pou kouyonné jous sé moun-la Bondyé chwazi la, si sa posib » (Matyé 24:24).

Ès fò Mési-la parèt talè ?

Non. Labib anonsé kè Mési-la sé té ké on désandan a David, wa a Izrayèl (Sòm 89:3, 4). An tan lontan, sé Juif-la té ka maké non a tout désandan a yo anlè plizyè rèjis. Pawkont, tout sé rèjis-la ki té ni non a désandan a David disparèt. I ka sanm sa yo détwi-yo lè sé Women-la anvayi Jérizalèm an 70 a épòk an nou a. Dépi sa, ponmoun pa ni pon prèv a dispozisyon a-y pou di kè i sé on désandan a David. Men an tan a Jézi, sé rèjis-lasa té la toujou ; kifè menm lènmi a-y pa té pé di kè i pa té on désandan a David (Matyé 22:41-46).

Konmen pwofési ki ni anrapò èvè Mési-la adan Bib-la ?

Pa ni mwayen sav ègzaktèman konmen pwofési ki ni anrapò èvè Mési-la. Sé moun-la pa’a sèvi èvè menm métòd-la pou konté sé pwofési-la ki an Bib-la. É lidé-lasa valab menm pou sé pasaj-la ki ka palé dè Mési-la on mannyè ki klè. Pa ègzanp, Izayi 53:2-7 ka anonsé plizyè biten diféran anrapò èvè Mési-la. Sèwten moun ké di kè tout pasaj-lasa sé onsèl pwofési alòskè dòt ké di kè chak ti détay ki adan-y sé on pwofési.

Déotwa pwofési ki anrapò èvè Mési-la é kè Jézi réyalizé

Pwofési	La ou ké touvé-y an Bib-la	Lè i akonpli
Désandan a Abraam	Jénèz 22:17, 18	Matyé 1:1
Désandan a Izaak, gason a Abraam	Jénèz 17:19	Matyé 1:2
I té’é sòti adan on tribi a Izrayèl non a-y sé Jida	Jénèz 49:10	Matyé 1:1, 3
I té’é sòti an fanmi a wa David	Izayi 9:7	Matyé 1:1
Sé on vyèwj ki té’é manman-y	Izayi 7:14	Matyé 1:18, 22, 23
I té’é fèt a Bétléèm	Miché 5:2	Matyé 2:1, 5, 6
Yo té’é kriyé-y Émannyèl b	Izayi 7:14	Matyé 1:21-23
I té’é fèt adan on fanmi ki pa ni granzafè	Izayi 53:2	Lik 2:7
Yo té’é tchouyé enpé piti timoun apré i fèt	Jérémi 31:15	Matyé 2:16-18
Yo té’é kriyé-y pou i sòti an Éjipt	Ozé 11:1	Matyé 2:13-15
Yo té’é kriyé-y « Nazaréyen » c	Izayi 11:1	Matyé 2:23
Ni on mésajé ki té’é pasé avan-y	Malaki 3:1	Matyé 11:7-10
Yo té’é chwazi-y antankè Mési an 29 a épòk an nou d	Danyèl 9:25	Matyé 3:13-17
Bondyé té’é fè moun sav kè sé Gason a-y	Sòm 2:7	Akt 13:33, 34
I té’é enmé kaz a Pap’a-y onlo	Sòm 69:9	Jan 2:13-17
I té’é anonsé onlo bon nouvèl	Izayi 61:1	Lik 4:16-21
Ministè a-y an Galilé sé té ké on gran limyè	Izayi 9:1, 2	Matyé 4:13-16
I té’é fè mirak kon Moyiz	Détéwonòm 18:15	Akt 2:22
I té’é di sa Jéova voyé-y di kon Moyiz	Détéwonòm 18:18, 19	Jan 12:49
I té’é géri onlo moun	Izayi 53:4	Matyé 8:16, 17
I pa té’é fè gran wach pou fè moun vwè-y	Izayi 42:2	Matyé 12:17, 19
I té’é aji èvè konpasyon épi moun ki ka soufè	Izayi 42:3	Matyé 12:9-20 ; Mawk 6:34
I té’é fè moun konnèt jistis a Bondyé	Izayi 42:1, 4	Matyé 12:17-20
On Konséyé èstraòwdinè	Izayi 9:6, 7	Jan 6:68
I té’é fè moun konnèt non a Bondyé	Sòm 22:22	Jan 17:6
I té’é sèvi èvè ègzanp pou anségné	Sòm 78:2	Matyé 13:34, 35
On Chèf	Danyèl 9:25	Matyé 23:10
Onlo moun pa té’é kwè adan-y	Izayi 53:1	Jan 12:37, 38
On wòch ki té’é fè moun tribiché	Izayi 8:14, 15	Matyé 21:42-44
Onlo moun pa té’é ba-y pon valè	Sòm 118:22, 23	Akt 4:10, 11
Yo té’é hay-li san pon rézon	Sòm 69:4	Jan 15:24, 25
I té’é rantré Jérizalèm asi on boukèt é moun té’é pòté-y anlè	Zakari 9:9	Matyé 21:4-9
Sé timoun-la té’é ba-y louwanj	Sòm 8:2	Matyé 21:15, 16
I té’é vin an non a Jéova	Sòm 118:26	Jan 12:12, 13
On bon zanmi a-y té’é trayi-y	Sòm 41:9	Jan 13:18
Yo té’é trayi-y pou 30 pyès-monné annawjan e	Zakari 11:12, 13	Matyé 26:14-16 ; 27:3-10
Zanmi a-y té’é lagé-y	Zakari 13:7	Matyé 26:31, 56
Moun té’é manti asi-y pou akizé-y	Sòm 35:11	Matyé 26:59-61
I pa té’é di pon mo lè yo té’é akizé-y	Izayi 53:7	Matyé 27:12-14
Yo té’é kraché asi-y	Izayi 50:6	Matyé 26:67 ; 27:27, 30
Yo té’é ba-y kou an figi	Miché 5:1	Mawk 15:19
Yo té’é ba-y koudfwèt	Izayi 50:6	Jan 19:1
I pa té’é viré kont sé moun-la ki té’é ba-y kou la	Izayi 50:6	Jan 18:22, 23
Ni déotwa chèf politik ki té’é monté konplo kont li	Sòm 2:2	Lik 23:10-12
Yo té’é kloué-y asi on poto é pousa yo té’é kloué 2 men a-y é 2 pyé a-y	Sòm 22:16	Matyé 27:35 ; Jan 20:25
Yo té’é fè on tiraj o sò pou sav kimoun ki té’é pran lenj a-y	Sòm 22:18	Jan 19:23, 24
Yo té’é mété-y an ran a moun ki fè péché	Izayi 53:12	Matyé 27:38
Yo té’é voyé mépri ba-y é yo té’é jiré-y	Sòm 22:7, 8	Matyé 27:39-43
I té’é soufè pou péché an nou	Izayi 53:5, 6	1 Pyè 2:23-25
I té’é ni lenprésyon kè Bondyé lagé-y	Sòm 22:1	Mawk 15:34
Yo té’é ba-y bwè vinèg é on biten anmè	Sòm 69:21	Matyé 27:34
I té’é swèf, on ti moman avan i mò	Sòm 22:15	Jan 19:28, 29
I té’é mèt lèspri a-y an men a Bondyé	Sòm 31:5	Lik 23:46
I té’é bay vi a-y	Izayi 53:12	Mawk 15:37
I té’é péyé ranson-la pou fè péché-la disparèt	Izayi 53:12	Matyé 20:28
Yo pa té’é kasé pon zo a-y	Sòm 34:20	Jan 19:31-33, 36
Yo té’é pèsé-y	Zakari 12:10	Jan 19:33-35, 37
Yo té’é téré-y adan on tonm a moun rich	Izayi 53:9	Matyé 27:57-60
Bondyé té’é résisité-y	Sòm 16:10	Akt 2:29-31
Yo té’é ranplasé moun-la ki té’é trayi-y la	Sòm 109:8	Akt 1:15-20
I té’é sizé adwat a Bondyé	Sòm 110:1	Akt 2:34-36

a Mi sa on ansiklopédi ka di : « Sé pannan yo té ka détwi Jérizalèm kè sé rèjis-la ki té ni non a sé tribi é sé fanmi juif la disparèt. Nou sèten dè sa a san pou san » (Cyclopedia a McClintock é Strong).

b Non ébré la Émannyèl vlé di « Bondyé èvè nou ». Non-lasa an plas a-y pou palé dè wòl-la Jézi jouwé la antankè Mési. Jézi té asi latè é lè i té la, i fè yenki bon biten. Sa montré kè Bondyé èvè sèwvitè a-y (Lik 2:27-32 ; 7:12-16).

c Lèmo « Nazaréyen » dwèt ka vin dè mo ébré la nétsèr, ki vlé di « rijton ».

d Si ou vlé sav kijan Labib ka èspliké kè sé an 29 a épòk an nou kè Mési-la té’é rivé, gadé awtik-la « La prophétie de Daniel prédit l’arrivée du Messie ».

e Pwofési-lasa ka touvé-y adan liv a Zakari. É poutan, Matyé, on misyé ki maké on liv an Bib-la, ka di kè sé pwofèt Jérémi ki anonsé-y (Matyé 27:9). Délè, sé liv a Jérémi yo té ka mèt prèmyé douvan adan on pawti a Lézékriti yo té ka kriyé « sé Pwofèt-la » (Lik 24:44). I ka sanm sa, sé dè pawti-lasa Matyé té ka palé lè i di kè sé « Jérémi » ki anonsé pwofési-lasa. É liv a Zakari ka touvé-y adan pawti-lasa.

Ay gadé sa osi...

SA LABIB KA APRANN-VOU

Éséyé nouvo métòd an nou pou étidyé Labib

Bénéfisyé dè on lèson biblik san péyé èvè on Témwen a Jéova.

KÈSYON BIBLIK