Wi. Bondyé ka sousyé-y dè moun ki ka sèvi-y é ki malad. Mi sa nou ka li an Bib-la asi yonn adan sèwvitè a-y : « Jéova ké soutyenn-li [...] toupannan i malad. » (Sòm 41:3). Si ou ka soufè èvè on maladi ki pa’a géri, sé 3 ti lidé la ki ka vin la pé itil pou-w :

1.   Mandé Bondyé fòs pou sipòté sitiyasyon-la. Ou pé wousouvwè « lapé ki ka vin dè Bondyé, ki ka dépasé tousa on moun pé konprann ». Konsa ou ké mwen enkyèt é ou ké pé sipòté maladi-la pli fasilman (Filipyen 4:6, 7).

2.   Fò-w pozitif. Mi sa Labib ka di : « Lè on moun ni tchè-kontan sa ka édé-y géri, men lè on moun tris, sa ka fè-y pèd tout fòs a-y » (Pwovèb 17:22, Bible en français courant). Fò-w sa ri. Si ou fè sa, sa ké mèt tibwen jwa an tchè a-w lè sa pa kay. Anplisdisa, sé on bon rimèd.

3.   Fè èspérans a-w vin pli fò. Lè ou ni on èspwa ki solid sa pé édé-w ni tchè-kontan menmsi ou ni on maladi ki pa’a géri (Women 12:12). Dapré sa Labib ka di, talè « pa ni ponmoun an péyi-la ki ké di : “An malad” » (Izayi 33:24). A moman-lasa, Bondyé ké géri tout sé maladi-la sé dòktè-la pa kapab géri jòdijou. Olyé moun vyéyi, sé jenn yo ké vin jenn. Pa ègzanp, gadé sa Labib ka di asi moun ki ja ni on bèl laj : « Chè a-y ké vin pli frèch ki lè i té timoun ; i ké viré kon lèwvwè i té jenn » (Jòb 33:25, Darby an fwansé).

 Noté sa : Menmsi yo sèten kè Bondyé ka édé-yo vréman, sé Témwen a Jéova la ka fè tousa ki fo pou swagné-yo (Mawk 2:17). Men yo pa’a di ponmoun ki trètman pou yo pran an pawtikilyé. Pas pou yo, sé chakmoun ki dwèt fè pwòp chwa a yo adan domenn-lasa.