Témwen a Jéova pa ka fété anivèwsè a nésans pas pou yo, sé fèt-lasa pa ka fè Bondyé plézi. Adan Labib, ou pa’a touvé pon komandman ki ka di dirèktèman kè fò pa nou fété anivèwsè a nésans. Pawkont, i ka édé-nou réfléchi asi sèwten biten ki fèt, pou nou konprann ka Bondyé ka pansé asi sé fèt-lasa. An-nou vwè 4 pwen é an-nou dékouvè ka Labib ka di asi sa.

1.   Odépa sé dé moun ki pa té ka adoré Bondyé ki té ka fété anivèwsè a nésans. On liv ka di-nou kikoté sé fèt-lasa sòti : yo té ka kwè kè jou a anivèwsè a on moun, « mové lèspri é jan sé mové lèspri-la ka aji asi moun té pé fè[-y] ditò » é kè si jou-lasa « zanmi a-y té owa-y é kè yo té ka swété-y bon biten, sa té pé pwotéjé-y » (Funk & Wagnalls Standard Dictionary of Folklore, Mythology, and Legend). Liv-la Coutumes et usages des anniversaires (an anglé) ka di kè, an tan lontan, sa té « enpòwtan toubònman dè ni sèwten enfòwmasyon asi jou a nésans a on moun pou-w pé sa ba-y oròskòp a-y » bazé asi on « syans mistik, lastroloji ». Tibwen pli lwen nou ka li : « Onlo moun ka kwè kè sé bouji anivèwsè la ni on pouvwa majik é kè yo kapab réyalizé sa ou ka mandé ».

    Men dapré Labib, fò pa nou mannyé lamaji, fò pa nou chèché sav alavans sa ki ké fèt dèmen, fò pa nou ni ayen a vwè èvè tousa ki anrapò èvè sé démon-la « é dòt biten konsa » (Galat 5:19-21 ; Détéwonòm 18:14). Dayè pou yonn, on rézon ki fè kè Bondyé kondanné vil a Babilòn, sé paskè moun ki té ka rété la té ka sèvi èvè lastroloji pou sav alavans sa ki ké fèt dèmen (Izayi 47:11-15). A pa toutlè Témwen a Jéova ka chèché a sav ola on koutim sòti. Men lèwvwè Labib ka bay enfòwmasyon ki klè asi sa, yo ka tchenn kont dè sa.

2.   Sé prèmyé krétyen-la pa té ka fété sé anivèwsè a nésans la. Dapré on ansiklopédi, sé prèmyé krétyen-la « té ka kwè kè sé anivèwsè a nésans la, sé té on koutim ki payen » (The World Book Encyclopedia). Labib ka montré-nou kè tout sé krétyen-la dwètèt suiv ègzanp a sé apòt-la é ta sélézòt disip-la, kè Jézi anségné dirèktèman (2 Tésalonisyen 3:6).

3.   Sèl fèt sé krétyen-la oblijé sélébré pa ka konsèwné on nésans men plito mò a on moun : ta Jézi (Lik 22:17-20). Sa pa ka siwprann-nou pas Labib ka di kè « jou on moun ka mò pibon ki jou i fèt » (Éklézyas 7:1). Avan i té mò, Jézi fè-y on non kivédi on bèl répitasyon douvan Bondyé. Jou a mò a Jézi té ni plis valè ki jou a nésans a-y (Ébré 1:4).

4.   Labib pa’a palé dè pon sèwvitè a Bondyé ki fété anivèwsè a nésans a-y. A pa oubliyé yo oubliyé palé dè sa, pas Labib ka palé dè 2 anivèwsè a nésans yo fè pou onoré dé moun ki pa té ka sèvi Bondyé. Men pou chak sé fèt-lasa, i pa ka palé dè yo an byen (Jénèz 40:20-22 ; Mawk 6:21-29).

 Kon tout paran ki enmé timoun a yo, Témwen a Jéova ka montré pitit a yo kè yo enmé-yo toutolon a lanné-la : yo ka ba-yo kado, yo ka prévwa anmizman ba yo èvè zanmi a yo é dòt biten ankò. Yo ka fè tousa yo pé pou yo suiv ègzanp pawfé a Bondyé ki ka ba timoun a-y onlo bon biten é ki ka fè sa volontyé (Matyé 7:11). Timoun a Témwen a Jéova pa ka santi ka manké-yo on biten. Sé sa sé témwagnaj-la ki ka vin la ka montré :

•   « Sa pi bèl dè ni on kado lè nou pa ka atann-nou » (Tammy, 12 an).

•   « Menmsi an pa ni kado jou a anivèwsè an mwen, papa é manman toujou ka pwofité dè dòt lokazyon pou achté on ti kado ban mwen. An pli enmé-y konsa pas an pa ka atann-mwen » (Gregory, 11 an).

•   « Ou ka konpranndèdi kè on ti 10 minit, déotwa bisui é on chanson, sé sa ki on fèt alò ? Fò ou vin akaz pou an montré-w ka ki on vré fèt ! » (Éric, 6 an).