Komité santral la sé on ti gwoup-moun ki konpozé èvè krétyen ki mati é ki ka ba Témwen a Jéova adan lèmondantyé on dirèksyon. Sé manb a Komité santral la ka jéré 2 travay anmenmtan :

•   Sé yo ki ka préparé ansègnman biblik la ki ka parèt adan sé piblikasyon-la, adan sé réinyon-la é adan sé lékòl-la ki fèt pou Témwen a Jéova (Lik 12:42).

•   Yo ka dirijé travay a prédikasyon la toupatou asi latè é yo ka jéré sé don-la osi.

 O prèmyé syèk, sé « sé apòt-la é sé ansyen-la » ki té Jérizalèm ki té ka pran sé désizyon enpòwtan la pou tout sé krétyen-la (Akt 15:2). Komité santral la ka suiv modèl-lasa jòdijou. Menmjan ki sé apòt-la é sé ansyen-la dan lèpasé, séla ki ka fè pawti a Komité santral la pa chèf a òwganizasyon an nou. Yo ka lésé Labib gidonné-yo é yo ka admèt kè Jéova chwazi Jézikri konm Chèf a lasanblé-la (1 Korentyen 11:3 ; Éfézyen 5:23).

 Mi manb a Komité santral la : Kenneth Cook, Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, é Jeffrey Winder. Yo ka travay adan biwo mondyal a Témwen a Jéova ki Warwick (Nouyòk).

 Komité santral la mèt anplas 6 komité pou yo pé sa òwganizé aktivité a Témwen a Jéova. Chak manb a Komité santral la ka fè pawti a yonn oben a plizyè adan sé komité-lasa.

•   Komité a sé koòwdinatè-la : Sé-y ki ka okipé dè sé kèsyon-la ki anrapò èvè lajistis. Sé-y ki ka jéré osi sé iwjans-la ki ka touché Témwen a Jéova (katastwòf natirèl, pèwsékisyon parapòt a kwayans a yo, é dòt biten ankò...).

•   Komité pou pèwsonèl-la : Sé-y ki ka jéré travay a sé volontè-la ki ka pòté bon mannèv adan chak biwo nasyonal.

•   Komité pou édisyon-la : Sé-y ki ka jéré fabrikasyon é transpò a sé piblikasyon-la. Sé-y ki ka okipé osi dè konstriksyon a sé batiman-la ki fèt pou adoré Jéova men osi dè sé biwo a tradiksyon la é dè sé biwo nasyonal la.

•   Komité pou sèwvis-la : I ka òwganizé travay a prédikasyon a « bon nouvèl a Wayòm-la » (Matyé 24:14).

•   Komité pou ansègnman-la : Sé-y ki ka préparé nouriti èspirityèl la pou sé réinyon-la, sé lékòl-la é sé pwogram odyo é vidéo la.

•   Komité pou rédaksyon-la : Sé-y ki ka préparé ansègnman ki ka parèt adan piblikasyon papyé oben asi sit Entèwnèt a Témwen a Jéova. I ka dirijé osi travay a tradiksyon-la.

 Non sèlman Komité santral la ka travay rèd adan sé diféran komité-lasa men anplisdisa i ka réini-y chak simenn pou ègzaminé sa Témwen a Jéova adan lèmondantyé bizwen. Pannan sé réinyon-lasa, sé manb a Komité santral la ka gadé sa Labib ka di é yo ka lésé lèspri sen gidé-yo pou yo pé sa pran désizyon. É lè yo ka pran sé désizyon-lasa, yo ka fè ansòt pou yotout tonbé dakò (Akt 15:25).

 Sé dé krétyen yo pé fè konfyans é ki ka édé Komité santral la adan sé diféran komité-la (1 Korentyen 4:2). Adan sé diféran komité-la yo ka travay adan yo la, yo ka sèvi èvè kapasité a yo é èkspéryans a yo pou yo pé sa fè travay-la yo ka mandé-yo fè la. Chak simenn, yo ka pawtisipé adan réinyon a komité a yo. Menmsi a pa yo ki ka pran sé désizyon-la, yo ka bay konsèy é enfòwmasyon ki ni onlo valè. Anplisdisa, yo ka fè sa ki fo pou mèt anplas désizyon a komité-la é yo ka gadé ki rézilta é ki pwogré sa bay. Komité santral la pé voyé-yo diféran koté adan lèmond pou pawtisipé a sèwten évènman kon sé lasanblé jénéral la ki ka fèt chak lanné oben lè moun ki fè Lékòl a Galaad ka rèsèvwa diplòm a yo.