Pou onlo moun, lakwa sé senbòl a tout moun ki krétyen. Nou, Témwen a Jéova, nou krétyen men nou pa ka sèvi èvè lakwa pou adoré Bondyé. Pou ki rézon ?

 Dabò pou yonn, sé paskè dapré Labib, Jézi pa mò asi on kwa men i mò asi on poto. Anplisdisa, Labib ka ba sé krétyen-la on lòd ki klè : « Chapé kò a zòt pou pa adoré idòl ». Kivédi, pa sèvi èvè lakwa pou adoré Bondyé (1 Korentyen 10:14 ; 1 Jan 5:21).

 Jézi di on biten ki enpòwtan toubònman : « Sé konsa toutmoun ké sav zò sé disip an mwen : si zò ni lanmou yonn pou lòt » (Jan 13:34, 35). Jézi montré kè a pa lakwa oben adoré idòl ki ka fè si on moun sé on krétyen, men sé plito on lanmou ki kapab pousé on moun a bay vi a-y pou lézòt.