Ni sèwten moun ki té batizé Témwen a Jéova é ki arété préché é délè yo pa’a menm réini-yo èvè lasanblé lokal a yo ankò. Ès nou ka ba-yo do oben mèt-yo akoté ? Awa ! Okontrè, nou ka éséyé édé-yo é nou ka fè sa nou pé pou fè fwa a yo wouvin fò.

 É si aprézan on moun ka fè on péché ki grav ? Yo pa ka enn èskominyé-y konsa. Men si on Témwen a Jéova ka pran labitid dézobéyi sé lwa-la ki an Bib-la é si i pa ka rèpanti-y, a moman-lasa i ké èskominyé. Labib klè asi sa menm : « Woté méchan-la anmitan a zòt » (1 Korentyen 5:13).

 Men vinvwè yo èskominyé on misyé men kè madanm a-y é timoun a-y Témwen a Jéova toujou ? Sé vré, sa ké ni konsékans asi jan-la fanmi-la ka pratiké rèlijyon a-y, men misyé-la ka rété papa a sé timoun-la é mari a madanm-la. Kifè, yo ké kontinyé viv an fanmi kon dabitid é yo ké aji èvè lanmou yonn èvè lòt.

 On moun ki èskominyé pé asisté a réinyon an nou. Si i vlé, Témwen a Jéova ki kalifyé pé édé-y pou i pé sa wouvin Témwen li osi. On moun èskominyé ki ka montré kè i anvi suiv prensip a Bondyé èvè tout tchè a-y é ki ka lagé tousa i té ka fè ki té mové, pé wouvin on Témwen a Jéova.