1. Kisa David di asou imilité Jéova-a ?

ÈS NOU pouvé vréman di ki Jéova a roun moun ki gen imilité ? Wi ! David di : « To ka bay mo to boukliyé pou i protéjé mo, é to imilité ka fè mo vin pi gran » (2 Sam. 22:36 ; Ps. 18:35). Pitèt David té ka sonjé jou profèt Samiyèl vini koté so papa pou chwazi prochen rwa Israyèl-a. David té gen sèt frè é a li ki té dèrnyé-a. Mé a li Jéova chwazi pou ranplasé rwa Sayil (1 Sam. 16:1, 10-13).

2. Kisa nou ké wè annan sa artik-a ?

² Asiré pa pitèt David té ké dakò ké sa ki marké asou Jéova annan Psaume 113:6-8, koté nou ka li : « I ka bésé pou gadé syèl-a ké latè-a, sa-la ki toupiti i ka fè l’ soti annan lapousyè. I ka fè maléré-a [...] asiz ké grotchap-ya. » Pou koumansé, nou ké anprann plizyèr bagaj enpòrtan asou zafè imilité-a. É pou fè sa nou ké wè plizyèr sitiasyon koté Jéova montré so imilité. Apré sa nou ké wè kisa èkzanp rwa Sayil, profèt Danyèl ké Jézi ka anprann nou asou zafè rékonnèt nou limit.

3. Kouman Jéova ka aji ké nou, é kisa sa ka montré ?

³ Lò nou ka gadé kouman Jéova ka aji ké so sèrvitèr enparfè asou latè-a, nou ka wè ki i gen imilité. Déja, i ka asèpté nou adoré l’, mé anplis i ka wè nou kou so zanmi (Ps. 25:14). É pou nou pouvé divini so zanmi, i bay so Pitit an sakrifis pou nou péché. Asiré pa pitèt Jéova ka pardonnen  é i ka konprann soufrans ròt moun !

4. Kisa Jéova bay nou, é poukisa ?

⁴ Jéova ka montré so imilité rounòt fason ankò. Lò i fè nou, i bay nou posibilité chwazi sa nou ké fè di nou lavi. Anyen pa té ka blijé l’ fè sa. Mé i té lé fè nou kou li menm é bay nou libèrté di chwazi. Menm si a li ki fè nou, sa nou ka chwazi enpòrtan pou li : i lé nou adoré l’ paské nou kontan l’ é paské nou savé ki obéyi l’ bon pou nou (Deut. 10:12 ; Is. 48:17, 18). A pa ti rékonésans nou gen pou Jéova lò nou ka wè li montré so imilité konsa !

5. Kouman Jéova ka montré nou a kisa ki roun moun ki gen imilité ? (gadé zimaj-a anlè prémyé paj-a).

⁵ Jéova ka montré nou a kisa ki roun moun ki gen imilité asou fason i ka fè ké nou. I pa gen pyès moun ki gen plis sajès pasé li. Magré sa, i paré asèpté lidé ròt moun ka bay li. Parèkzanp, i lésé so Pitit Jézi idé li kréyé tout bagaj (Prov. 8:27-30 ; Col. 1:15, 16). É menm si i tou-pwisan, i ka bay ròt moun rèsponsabilité. Parèkzanp, i mété Jézi Rwa Rwayonm-an, é kanta 144 000 moun-yan ki ké dirijé ké so Pitit, i ké bay yé osi rèsponsabilité (Luc 12:32). Asiré pa pitèt, i fòrmé Jézi pou i divini Rwa ké Granprèt (Héb. 5:8, 9). É i ka fòrmé osi sa-ya ki ké divini rwa ké li. Mé i pa ka rété la pou véyé kouman yé ka fè yé travay. Poukisa ? Paské i ka fè yé konfyans é paské i savé yé ké fè sa i lé (Rév. 5:10).

6-7. Kouman chèf fanmi-ya, ansyen-yan ké manman ké papa pouvé imité Jéova ?

⁶ Si nou Papa ki annan syèl-a ki pa bézwen pyès moun idé l’ ka bay  ròt moun-yan rèsponsabilité, kimoun nou sa pou nou pa bay ròt moun-yan rèsponsabilité ? Ès to sa roun chèf fanmi ouben roun ansyen ? Si a sa, pou imité Jéova, a pou to bay ròt moun-yan rèsponsabilité épi menm si to anvi, pa rété la pou véyé kouman yé ka fè travay to bay yé-a. Lò to ka swiv èkzanp Jéova, travay-a ka fèt, mé to ka fòrmé ròt-ya osi é to ka idé yé gen plis konfyans annan sa yé ka fè (Is. 41:10). Sa ki gen rèsponsabilité, kisa yé pouvé anprann di Jéova ankò ?

⁷ Labib-a ka montré ki Jéova lé savé sa so zanj-ya ka pansé (1 Rois 22:19-22). Papa ké manman, kouman zòt pouvé fè kou Jéova ? Lò sa posib, doumandé zòt timoun yé lidé asou fason pou fè roun travay zòt gen pou fè. É si i bon, kouté sa yé ka di zòt fè.

8. Kouman Jéova montré so pasyans ké Abraam ké Sara ?

⁸ Nou ka wè imilité Jéova annan fason i ka montré so pasyans. Parèkzanp, si roun annan so sèrvitèr ka di li ké rèspè ki i pa dakò ké roun désizyon i pran, i ka pran pasyans ké li. Lò Jéova désidé krazé Sodòm ké Gomòr, Abraam di li kouman i té enkyèt é Jéova pran tan kouté l’ (Gen. 18:22-33). Sonjé osi kouman i fè ké Sara, Abraam so madanm. I pa té yèg é i pa faché lò i wè Sara ari paské zanj-a di li ki i té ké gen roun timoun menm si i té ja gen roun bon ti laj (Gen. 18:10-14). I aji ké Sara ké rèspè.

9. Kisa paran-yan ké ansyen-yan pouvé anprann ké èkzanp Jéova ?

⁹ Si to sa roun manman, roun papa, ouben roun ansyen, kisa èkzanp Jéova pouvé anprann to ? Doumandé to kò : « Kouman mo ka réyaji lò roun moun ki gen pou kouté mo ka di mo ki i pa dakò ké roun désizyon mo pran ? » Ès to ka kouri di li sa i ka di pa bon ? Ouben ès to ka éséyé konprann sopa lidé ? Lò sa ki gen rèsponsabilité ka imité Jéova, fanmi ké asanblé-ya ka jwenn patché bénédiksyon. Nou wè kisa imilité Jéova ka anprann nou. Annou wè aprézan kisa èkzanp déztrwa moun annan Labib-a ka anprann nou asou zafè rékonnèt nou limit.

10. Kouman Jéova, nou pi « Gran Ansényan »-an, ka ansényé nou ?

¹⁰ Pou ansényé nou, Jéova nou pi « Gran Ansényan »-an, ka bay nou annan so Paròl èkzanp pou nou swiv ké èkzanp pou nou pa swiv (Is. 30:20, 21). Nou pouvé anprann patché bagaj si nou ka pran tan réfléchi asou istwè moun annan Labib-a ki montré ki yé té gen bèl kalité. Parèkzanp, yé té ka rékonnèt yé limit. Mé nou pouvé anprann patché bagaj osi ké sa ki rivé ké sa-ya ki pa té gen sa kalité-ya (Ps. 37:37 ; 1 Cor. 10:11).

11. Kisa mové èkzanp Sayil ka anprann nou ?

¹¹ Sonjé sa ki rivé rwa Sayil. Lò i té jenn, Sayil té ka rékonnèt so limit é i té pè asèpté plis rèsponsabilité (1 Sam. 9:21 ; 10:20-22). Mé roun tibi tan apré i divini rwa, i pa rété a so plas : i fè roun bagaj i pa té gen drwa fè. Roun jou i té ka antann profèt Samiyèl, i koumansé bon ké zafè antann-an. Pasé i rékonnèt so limit é konté asou Jéova pou sové so pèp, i bay roun sakrifis i pa té gen drwa fè. A konsa i pédi so lanmityé ké Jéova é i pa  té rwa ankò (1 Sam. 13:8-14). Nou ka montré nou gen sajès si nou ka pran èkzanp asou sa ki rivé l’ é si nou ka rété a nou plas.

12. Kouman Danyèl montré i té ka rékonnèt so limit ?

¹² Profèt Danyèl pa té kou Sayil, i bay nou roun bon èkzanp pou nou swiv. Pannan tout so lavi i montré i té gen imilité, ki i té ka rékonnèt so limit é i toujou chaché konsèy òbò Jéova. Parèkzanp lò Jéova itilizé li pou di Nabikodonozòr kisa so rèv té lé di, i pa fè kousidiré a li ki té gen sa pouvwar-a. Paské i té ka rékonnèt so limit, i di ki a Jéova ki té gen sa pouvwar-a (Dan. 2:26-28). Kisa sa ka anprann nou ? Si nou frè ké nou sò ka trouvé ki nou vayan lò nou ka fè diskour ouben nou vayan annan prédikasyon-an, a sa moman-an nou lé fè yé konprann ki a gras a Jéova nou ka rivé fè sa. Nou ka rékonnèt ki si i pa té ka idé nou, nou pa té ké pouvé rivé fè menm bagaj-ya. A konsa nou ka montré ki nou ka rékonnèt nou limit (Phil. 4:13). Konsa nou ké imité Jézi.

13. Kisa sa Jézi ka di annan Jean 5:19, 30 ka anprann nou asou zafè rékonnèt nou limit ?

¹³ Jézi té sa Pitit Bondjé é i té parfè. Mé i toujou konté asou so Papa (li Jean 5:19, 30). É i pa janmen éséyé vòlò so plas. Philippiens 2:6 ka anprann nou ki i « pa janmen sonjé vòlò so plas, sa lé di divini Bondjé li menm ». Jézi té sa roun Pitit ki toujou té ka kouté so Papa : i té ka konprann ki so pouvwar té gen limit é i té ka rèspèkté so Papa paské a li ki té sa so chèf.

14. Kouman Jézi réyaji lò Salomé doumandé li roun favèr pou so pitit-ya ?

¹⁴ Sonjé kouman Jézi réyaji lò Salomé vini doumandé li roun favèr. I té lé so dé pitit-ya, Jak ké Jan, asiz roun a so drèt é ròt-a a so goch annan Rwayonm-an. A pa li ki té pou désidé bay sa privilèj-a. Atò i réponn li lanmenm ki a so Papa rounso ki té pouvé désidé sa (Mat. 20:20-23). A konsa i montré i té ka rèspèkté limit pouvwar so Papa té bay li. I té ka rékonnèt so limit. I pa té janmen ka alé pi lwen ki sa Jéova té lé i fè (Jean 12:49). Kouman nou pouvé fè kou li ?

15-16. Kouman nou pouvé fè sa 1 Corinthiens 4:6 ka di nou fè ?

 ¹⁵ Pou imité fason Jézi té ka rékonnèt so limit, a pou nou swiv sa konsèy nou ka li annan 1 Corinthiens 4:6 : « Pa alé pi lwen ki sa ki marké. » A pou sa, lò yé ka doumandé nou nou lidé asou roun bagaj, nou pa ké apiyé asou noupa lidé é nou pa ké di prémyé bagaj ki ka vini annan nou lèspri. Mé nou ké montré yé ki konsèy nou ka jwenn annan Labib-a é annan nou piblikasyon-yan. A konsa nou ka montré ki nou ka konprann nou gen limit. Bondjé Tou-Pwisan-an bay nou roun « lalwa ki drèt ». Paské nou ka rékonnèt nou limit, nou ka rékonnèt ki sa lalwa-a gen plis valò pasé nenpòrt ki ròt lidé (Rév. 15:3, 4).

¹⁶ Lò nou ka rékonnèt nou limit nou ka bay Jéova lònò. Mé a pa pou sa rounso nou ka rékonnèt nou limit. Kou nou ké wè l’, si nou gen imilité é si nou ka rékonnèt nou limit sa ké idé nou gen tchò kontan ké viv byen ké ròt-ya.

17. Poukisa moun-yan ki gen imilité é ki ka rékonnèt yé limit toujou kontan ?

¹⁷ Souvan moun-yan ki gen imilité é ki ka rékonnèt yé limit gen plis tchò kontan. Poukisa ? Paské, lò nou ka rékonnèt nou limit, nou gen rékonésans pou tousa moun-yan pouvé fè pou idé nou. Sonjé istwè sa 10 moun-yan ki té gen lalèp. Rounsèl annan yé rouvin di Jézi mèrsi paské i té géri so vyé maladi. I té ka konprann ki i pa té ké jen rivé géri tousèl. Sa mouché-a ki té gen imilité é ki té ka rékonnèt so limit té gen rékonésans paské Jézi té idé li, a pou sa i louwé Bondjé (Luc 17:11-19).

18. Lò nou gen imilité é lò nou ka rékonnèt nou limit, poukisa sa ka idé nou viv byen ké ròt moun-yan ? (Romains 12:10).

 ¹⁸ Souvan, roun moun ki gen imilité é ki ka rékonnèt so limit ka viv byen ké ròt moun-yan é gen bon zanmi. Poukisa ? Paské i ka rékonnèt ki yé gen bèl kalité é paské i ka fè yé konfyans. I kontan wè yé rivé byen fè travay yé bay yé fè-a é i ka kouri félisité yé (li Romains 12:10).

19. Poukisa nou divèt rayi fè gran larjò ?

¹⁹ Parkont, roun moun ki ka fè gran larjò pa ka rivé félisité ròt moun-yan ; i simyé moun-yan félisité l’. I ka konparé so kò ké ròt-ya, i toujou ka chaché savé kilès ki pi fò é i ka éséyé fè ròt-ya antré annan sa. Pasé i idé roun moun anprann fè roun travay é bay li rèsponsabilité, i simyé fè so bagaj li menm paské dapré li moun-an pa ké fè travay-a byen. A roun moun ki toujou ka chaché monté pi rot é ki jalou (Gal. 5:26). Roun moun konsa pa ka rivé gen bon zanmi. Si nou gen roun ganm ka fè gran larjò, annou priyè Jéova san nou pa séré anyen pou li, pou i idé nou ‘chanjé fason nou ka pansé-a’ pou sa défo-a pa pran rasin annan nou tchò (Rom. 12:2).

20. Poukisa nou divèt gen imilité épi rékonnèt nou limit ?

²⁰ Èkzanp Jéova ka bay nou bèl toubonnman ! Nou ka wè so imilité annan fason i ka fè ké so sèrvitèr-ya, é nou lé fè kou li. I gen sa ki té gen lònò maché ké Jéova é yé té ka rékonnèt yé limit. Nou lé pran èkzanp asou yé osi. Annou kontinyé bay Jéova lònò ké laglwar i mérité-a (Rév. 4:11). A konsa nou ké pouvé maché ké nou Papa ki annan syèl-a, ki kontan sa ki gen imilité é ki ka rékonnèt yé limit.