1. Kisa Jéova ka bay chak moun annan so sèrvitèr fidèl-ya ?

A KÉ lanmou, Jéova ka bay chak moun annan so sèrvitèr fidèl-ya roun plas annan so asanblé. Nou ka fè diféran bagaj annan asanblé-a, mé nou tout itil é nou tout bézwen nou konpanyen. A roun lidé enpòrtan apot Pòl té lé anprann nou.

2. Dapré Éphésiens 4:16, poukisa nou divèt wè valò nou konpanyen é travay ansanm ké yé ?

² Annan vèrsé sa artik-a ka apiyé asou-a, Pòl ka montré ki nou pyès pa pouvé di rounòt sèrvitèr Jéova : « Mo pa bézwen to » (1 Cor. 12:21). Pou i gen lapè annan asanblé-a nou divèt wè valò nou konpanyen é travay ansanm ké yé (li Éphésiens 4:16). Lò tout moun ka travay ansanm annan asanblé-a, tout moun ka santi lanmou yé konpanyen é asanblé-a ka divini pi fò.

3. Kisa nou ké wè annan sa artik-a ?

³ Annan ki bagaj nou pouvé montré ki nou ka rèspèkté moun-yan annan nou asanblé ? Annan sa artik-a, pou koumansé nou ké wè kouman ansyen-yan pouvé montré yé ka rèspèkté ròt ansyen-yan. Apré sa, nou ké wè kouman nou pouvé montré nou frè ké nou sò-ya ki pa maryé ki nou kontan yé. Pou fini, nou ké wè kouman nou pouvé montré nou lanmou pou sa-ya ki pa ka byen palé nou lang.

4. Dapré Romains 12:10, kisa chak ansyen divèt fè ?

⁴ A ké lèspri sen Jéova yé ka chwazi sé ansyen-yan annan tout asanblé-ya. Mé yé tout pa vayan annan tout bagaj-ya (1 Cor. 12:17, 18). Roun ran pa ansyen dépi lontan, a pou sa yé pa gen bokou èspéryans. Rounòt ran pa pouvé fè bokou bagaj ankò kou anvan paské yé ka vin vyé ouben paské yé malad. Pourtan, pyès ansyen pa divèt fè rounòt ansyen santi ki i pa ka sèrvi anyen, paské a kousidiré i té ka di : « Mo pa bézwen to. » Chak ansyen divèt swiv konsèy Pòl bay annan Romains 12:10 (li).

5. a) Kouman ansyen-yan ka montré yé ka rèspèkté ròt ansyen-yan ? b) Poukisa sa enpòrtan pou ansyen-yan kouté yé konpanyen lò yé ka fè yé réinyon ?

⁵ Ansyen-yan ka montré yé ka rèspèkté ròt ansyen-yan lò yé ka pran tan byen kouté yé. Yé divèt fè sa èspésyalman lò yé ka fè yé réinyon pou palé di bagaj enpòrtan. Poukisa ? Gadé sa La Tour de Garde 1^é òktòb 1988-a té ka di: « Ansyen-yan ka asèpté ki Jézi pouvé sèrvi lèspri sen-an pou idé nenpòrt ki ansyen annan asanblé-a sonjé roun prensip ki annan Labib-a pou yé pouvé savé sa pou yé fè ouben ki désizyon enpòrtan pou yé pran annan nenpòrt ki sitiasyon (Actes 15:6-15). Lò ansyen-yan annan yé réinyon, a pa rounsèl ansyen Jéova ka bay so lèspri sen. »

6. Kouman ansyen-yan pouvé travay ansanm, é poukisa a roun bon bagaj pou asanblé-a ?

⁶ Roun ansyen ka montré i ka rèspèkté ròt ansyen-yan lò i pa ka kouri palé an prémyé lò yé ka fè yé réinyon. A pa li rounso ki ka palé pannan réinyon-an, é i pa ka pansé ki a li ki toujou gen rézon. Lò i ka di sa i ka pansé, i pa ka fè ròklò. I ka pran tan byen kouté sa ròt-ya ka di. É pi enpòrtan-an, i toujou ka montré ki prensip annan Labib-a ka alé ké  sitiasyon-an é i toujou paré pou fè sa « èsklav fidèl ké avizé-a » ka di fè (Mat. 24:45-47). Lò ansyen-yan ka montré yé kontan é yé ka rèspèkté yé konpanyen pannan yé réinyon, lèspri sen Bondjé la ké yé é ka idé yé pran désizyon ki ké fè asanblé-a vini pi fò (Jacq. 3:17, 18).

7. Kouman Jézi té ka wè sa-ya ki pa té maryé ?

⁷ Annan asanblé-a i gen mouché ké madanm maryé, fanmi, mé i gen osi roun patché moun ki pa maryé. Kouman nou divèt wè nou frè ké nou sò-ya ki pa maryé ? Annou wè kouman Jézi té ka wè sa-ya ki pa té maryé. Lò i té asou latè-a, i pa maryé. I rété li rounso é tout so tan i pasé l’ annan travay Bondjé té voyé l’ fè-a é i mété tout so lidé asou sa. I pa janmen anprann so disip ki yé té divèt maryé ouben rété yé rounso. Parkont, i di ki roun ran té ké désidé pa maryé (Mat. 19:11, 12 ; Gadé nòt-a « se sont faits eunuques eux-mêmes » asou Matthieu 19:12). Jézi té ka rèspèkté sa-ya ki pa té maryé. Pou li yé pa té gen mwens valò pasé sa-ya ki té maryé, kousidiré i té ka manké yé roun bagaj.

8. Kisa Pòl ankourajé krétyen-yan fè annan 1 Corinthiens 7:7-9 ?

⁸ Kou Jézi, apot Pòl osi rété li rounso pannan tout tan i préché-a. I pa janmen di ki roun krétyen pa té gen drwa maryé. I di ki a roun bagaj chak moun té divèt désidé pou so kò. Mé kanmenm, i ankourajé krétyen-yan doumandé yé kò si yé té pouvé rété san maryé pou sèrvi Jéova (li 1 Corinthiens 7:7-9). Pòl pa té ka méprizé krétyen-yan ki pa té maryé. I jis bay Timoté, roun jenn frè ki pa té maryé, travay enpòrtan pou fè pou Jéova * (Phil. 2:19-22). Atò, sa ka anprann nou ki a pa paské roun frè maryé ki i ké fè roun travay pi byen pasé roun frè ki pa maryé (1 Cor. 7:32-35, 38).

9. Kisa nou divèt konprann asou zafè maryé ouben rété san maryé ?

⁹ Ni Jézi ni Pòl pa di ki krétyen-yan divèt maryé ouben rété yé rounso. Atò, kouman nou divèt wè sa zafè maryé ouben rété san maryé ? La Tour de Garde 1^é òktòb 2012-a ka byen di kouman nou  divèt wè sa : « Pou byen di, toulédé [sa lé di maryaj-a ké rété san maryé-a] sa dé kado Bondjé bay nou. [...] Pou Jéova, sa-ya ki pa maryé pa divèt ni ronté ni gen lanpenn. » A pou sa nou divèt rèspèkté plas frè ké sò-ya ki pa maryé annan asanblé-a.

10. Kouman pou nou montré nou ka rèspèkté nou frè ké sò-ya ki pa maryé ?

¹⁰ Kouman pou nou montré nou ka rèspèkté santiman ké sitiasyon nou frè ké sò-ya ki pa maryé ? A pou nou sonjé ki sèrten frè ké sò ki pa maryé désidé rété konsa. Ròt té ké lé maryé, mé yé pòkò trouvé bon moun-an. Ròt ankò pédi yé madanm ouben yé mari. Ki yé chwazi ki yé pa chwazi rété san maryé, ès frè ké sò-ya annan asanblé-a divèt doumandé yé poukisa yé pa maryé ouben propozé yé idé yé trouvé roun moun pou maryé ? A vré, roun krétyen ki pa maryé pouvé doumandé yé idé l’ trouvé roun moun. Mé si i pa doumandé anyen kisa i ké rousanti si roun moun propozé li idé li trouvé roun moun pou i maryé ? (1 Thess. 4:11 ; 1 Tim. 5:13). Men sa déztrwa frè ké sò fidèl ki pa maryé ka di asou sa.

11-12. Kisa ki pouvé dékourajé sa-ya ki pa maryé ?

¹¹ Roun rèsponsab sirkonskripsyon ki pa maryé é ki ka byen fè so travay ka di ki pou li, lò to pa maryé to pouvé fè bokou bagaj. Mé i ka di ki, lò frè ké sò ka doumandé l’ poukisa i pa maryé, sa ka dékourajé l’ menm si i savé a idé yé ka chaché idé li. Roun frè ki pa maryé ki ka travay annan roun Bétèl ka di : « Sèrten frè ké sò ka fè kousidiré yé gen lanpenn pou sa ki pa maryé. Lò yé ka fè sa, rété san maryé ka plis sanblé roun fardo pasé roun kado. »

¹² Roun sò ki pa maryé ki ka travay annan roun Bétèl ka di : « Sèrten frè ké sò ka pansé ki tout sa ki pa maryé ka chaché roun moun pou maryé, ouben ki tout sa ki pa maryé ka pansé ki chak kou nou ka fè roun bagaj ansanm ké frè ké sò pou anmizé kou roun okazyon pou trapé roun moun. Roun jou, Bétèl-a voyé mo fè roun travay annan rounòt koté. Mo rivé roun jou aswè i té gen réinyon. Sò-a koté mo té ka rété-a di mo ki annan so asanblé i té gen dé frè ki pa té maryé é ki té gen mo laj. I byen di mo ki i pa té ka éséyé trouvé roun moun pou mo. Mé nou pa té fin rivé lasal ki i té ja mennen mo alé wè sa dé frè-ya. Mo pa menm bézwen di kouman nou toulétrwa té jennen. »

13. Ki bèl èkzanp ankourajé roun sò ki pa maryé ?

¹³ Rounòt sò ki bétélit ka di : « Mo konnèt pyonyé ki pa maryé, ki gen yé ti laj é ki byen kontan yé sitiasyon. Yé ka mété tout yé lidé asou yé sèrvis pou Jéova, yé toujou paré pou idé ròt moun-yan, yé kontan sa yé ka fè é yé ka idé yé asanblé bokou. Yé ka wè yé sitiasyon kou Jéova ka wè l’. Yé pa ka santi ki yé miyò ki ròt-ya paské yé rété san maryé é yé pa ka santi yé ka manké roun bagaj paské yé pa maryé ouben yé pa gen timoun. » Sa bèl toubonnman lò annan asanblé-a, chak moun ka rèspèkté ké bay yé konpanyen lònò. Pyès moun pa ka méprizé to. Pyès moun pa ka jalou to. Pyès moun pa ka fè kousidiré to pa la. Pyès moun pa ka poté to anlè. To savé yé kontan to.

14. Kouman nou pouvé montré ki nou ka rèspèkté sa-ya ki pa maryé ?

¹⁴ Nou frè ké sò ki pa maryé pa lé nou gen lanpenn pou yé ; yé simyé nou kontan yé pou yé bèl kalité. Atò, annou  montré yé nou kontan yé fidélité. Si nou ka fè sa, yé pa ké janmen santi kousidiré nou té ka di yé : « Mo pa bézwen to » (1 Cor. 12:21). Yé ké pito wè ki, nou ka rèspèkté yé é ki yé gen roun plas enpòrtan annan asanblé-a.

15. Kisa sèrten frè ké sò ka désidé fè pou fè plis annan prédikasyon-an ?

¹⁵ Dépi plizyèr lannen, bokou frè ké sò désidé anprann roun nouvo lang pou fè plis annan prédikasyon-an. Pou fè sa, yé té divèt chanjé bagaj annan yé lavi. Yé lésé roun asanblé koté yé té ka palé yépa lang pou alé annan rounòt asanblé koté yé ka palé rounòt lang paské sa asanblé-a té bézwen plis moun pou préché (Actes 16:9). Si sa krétyen-yan pran sa désizyon-an a paské yé té lé fè plis pou Jéova. Détan, sa ka pran plizyèr lannen pou yé rivé palé lang yé ka palé annan yé nouvo asanblé-a, mé magré sa yé ka idé asanblé-a bokou. Yé bèl kalité ké yé èspéryans ka fè ki asanblé-a ka divini pi fò é pi solid. Nou kontan sa frè ké sò-ya ki ka fè sakrifis !

16. Kisa ansyen-yan ka gadé pou désidé si roun frè pouvé divini ansyen ouben asistan ?

¹⁶ Ansyen-yan pa pouvé désidé ki roun frè pa pouvé divini ansyen ouben asistan sèlman paské frè-a pòkò ka byen palé lang asanblé-a. Pou savé si roun frè paré, ansyen-yan ka gadé kisa Labib-a ka di asou fason ansyen-yan ké asistan-yan divèt fika ; yé pa ka gadé si i ka byen palé lang-a (1 Tim. 3:1-10, 12, 13 ; Tite 1:5-9).

17. Kisa sèrten fanmi divèt chwazi lò yé ka désidé chanjé péyi ?

¹⁷ Sèrten fanmi krétyen désidé alé annan rounòt péyi pou chapé anba tribilasyon yé té ka jwenn annan yé koté ouben pou trapé roun travay. Souvan, lò timoun-yan ka alé lékòl, a lang péyi-a yé ka tandé. É pou yé trapé roun travay, manman ké papa-a ké pitèt divèt anprann sa lang-a osi. Détan, koté yé ka rété-a i gen roun asanblé ouben roun group annan yépa lang. Lò a sa, sa krétyen-yan divèt chwazi : ès sa miyò pou yé alé annan roun asanblé annan lang péyi-a ouben roun asanblé annan yépa lang ?

18. Dapré Galates 6:5, kouman nou pouvé montré ki nou ka rèspèkté désizyon chèf fanmi-a ?

¹⁸ A chèf fanmi-a ki divèt désidé annan ki asanblé fanmi-a ké alé. Sa bagaj-a pa ka gadé pyès ròt moun. A pou sa i divèt doumandé so kò sa ki miyò pou so fanmi (li Galates 6:5). Nou divèt rèspèkté désizyon i pran-an. Nenpòrt ki désizyon i pran, a pou nou asèpté l’ é annou montré sa fanmi-a ki nou kontan rousouvwè yé annan asanblé-a (Rom. 15:7).

19. Détan, kisa roun chèf fanmi divèt doumandé Jéova ?

 ¹⁹ Annou wè aprézan rounòt sitiasyon. Détan, sèrten fanmi ka alé annan roun asanblé koté yé ka palé lang manman ké papa-a, mé timoun-yan pa ka byen palé sa lang-a. Poukisa ? Paské yé ka rété annan roun koté yé ka palé lang péyi-a, é timoun-yan ka alé lékòl annan sa lang-a. A pou sa sa pouvé rèd pou yé konprann réinyon-yan é vini pi pròch di Jéova. Annan sa sitiasyon-an, roun chèf fanmi divèt doumandé Jéova idé li konprann sa i divèt fè pou idé so timoun vini pi pròch di Jéova ké so pèp. Swa i ké divèt idé so timoun konprann so lang pi byen, swa i ké divèt alé annan roun asanblé koté yé ka palé roun lang timoun-yan ka byen konprann. Ki i désidé alé ouben rété, asanblé koté li ké so fanmi ké fika ké divèt rèspèkté yé é montré yé ki yé kontan yé.

20. Kouman nou pouvé montré nou ka rèspèkté nou frè ké sò-ya ki ka anprann roun lang ?

²⁰ Nou fin wè poukisa, annan roun patché asanblé, i gen frè ké sò ki ka fè tousa yé pouvé pou anprann roun lang. Mé sèrten annan yé pòkò ka rivé byen palé sa lang-a. Nou pa lé rété asou sa. Nou lé rété asou yé lanmou pou Jéova é kouman yé lé fè so volonté. Si a sa nou ka fè, nou ké kontan yé ké tout nou tchò é nou ké rèspèkté yé. Nou pa ké di yé : « Mo pa bézwen to » paské yé pa ka palé nou lang byen.

21-22. Ki gran lònò nou gen ?

²¹ Nou gen bokou rékonésans pou Jéova paské i bay nou chak roun travay ki gen bokou valò pou fè annan so asanblé. Ki to sa roun frè ouben roun sò, ki to maryé ouben to rounso, ki to jenn ouben ki to vyé, si to ka palé roun lang byen ouben si to pa ka palé l’ byen, to gen bokou valò pou Jéova é pou to frè ké to sò-ya (Rom. 12:4, 5 ; Col. 3:10, 11).

²² Annou kontinyé swiv tout bèl léson nou anprann gras a èkzanp Pòl pran, lò i konparé asanblé-a ké kò-a. Annou chaché wè tousa nou pouvé fè pou ankourajé nou frè ké nou sò-ya, é pou montré yé ki nou kontan yé é ki nou ka rèspèkté yé. Konsa nou ké montré ki nou plas ké sa di ròt-ya annan asanblé Jéova-a, gen bokou valò pou nou !