1. Ki lònò nou gen ?

A PA ti lònò nou gen lò nou annan asanblé Jéova-a ! Nou kontan lajwa ké lapè nou gen lò nou ka adoré Jéova ansanm ké nou frè ké sò-ya annan asanblé-a. Mé kisa Jéova ka doumandé to fè annan asanblé-a ?

2. Ki èkzanp Pòl pran plizyèr fwa annan so lèt ?

² Annou gadé roun èkzanp Pòl pran annan plizyèr lèt i ékri gras a lèspri sen Bondjé. Plizyèr fwa, Pòl di ki asanblé-a kou roun kò. I di osi ki sa ki annan asanblé-a yé kou sé diféran parti annan kò-a (Rom. 12:4-8 ; 1 Cor. 12:12-27 ; Éph. 4:16).

3. Ki lidé nou ké wè annan sa artik-a ?

³ Annan sa artik-a nou ké wè trwa lidé enpòrtan annan èkzanp Pòl pran. Prémyèrman, nou ké wè ki nou chak nou gen nou plas * annan asanblé Jéova-a. Dézyèmman, nou ké wè kisa nou pouvé fè si nou ka santi nou pa ka sèrvi anyen annan asanblé-a. Trwazyèmman, nou ké wè poukisa nou divèt fè tousa nou pouvé pou fè sa Jéova ka doumandé nou fè annan so asanblé.

4. Kisa nou ka anprann annan Romains 12:4, 5 ?

⁴ Prémyé lidé nou pouvé anprann annan èkzanp Pòl a ki Jéova ka bay nou chak roun plas enpòrtan annan so fanmi. Pòl ka èspliké : « Menm fason-an tout parti-ya annan rounsèl kò pa ka fè menm bagaj-a, menm fason-an, menm si nou bokou, nou ké Jézi ka fè rounsèl kò, mé nou chak nou sa roun parti annan kò-a, é ansanm nou tout ka fè rounsèl » (Rom. 12:4, 5). Kisa Pòl té lé montré ? Nou tout gen roun bagaj diféran pou fè annan asanblé-a, mé nou chak nou gen valò.

5. Ki kado Jéova bay asanblé-a ?

⁵ Pitèt to ka di ki sa ki gen roun plas annan asanblé-a a frè-ya ki ka dirijé l’ (1 Thess. 5:12 ; Héb. 13:17). A vré, Jéova sèrvi Jézi pou fè so asanblé-a « kado plizyèr wonm » (Éph. 4:8). Annan sa wonm-yan i gen frè Kolèj santral-a, asistan Kolèj santral-a, frè komité filyal-ya, rèsponsab sirkonskripsyon-yan, frè-ya ki ka ansényé annan lékòl biblik-ya, ansyen-yan ké asistan-yan. A gras a lèspri sen yé ka chwazi sa frè-ya pou yé pouvé idé asanblé-ya ké pran swen di brébi Jéova-ya ki gen bokou valò pou li (1 Pierre 5:2, 3).

6. Jéova sèrvi so lèspri sen pou chwazi plizyèr frè annan asanblé-a. Dapré 1 Thessaloniciens 2:6-8, kisa yé lé fè ?

⁶ Frè-ya Jéova chwazi gen plizyèr bagaj pou fè. Menm fason-an diféran parti kò-a kou lanmen ké pyé-ya ka fè tousa ki fo pou kò-a byen maché, frè-ya Jéova chwazi ka travay rèd pou tout bagaj byen maché annan asanblé-a. Yé pa ka chaché moun-yan poté yé anlè. Yé lé ankourajé yé frè ké sò-ya é fè yé vin pi fò (li 1 Thessaloniciens 2:6-8). Nou ka di Jéova mèrsi pou sa frè èspirityèl-ya ki ka fè bagaj-ya pou bon tchò !

7. Ki bénédiksyon roun patché frè ké sò ka jwenn annan yé sèrvis a plen tan ?

⁷ I gen sa annan asanblé-a ki misyonèr, pyonyé èspésyal ouben pyonyé pèrmanan. Asou tout latè-a, roun patché frè ké sò ka pasé près tout yé tan ka préché é ka anprann moun-yan Labib-a. A konsa yé pouvé idé roun patché moun divini disip Jézi. Souvan sa frè ké sò-ya pa gen gran kichoz, mé Jéova ka bay yé patché bénédiksyon (Marc 10:29, 30). Nou kontan bokou sa frè ké sò-ya, é nou byen kontan yé la ké nou annan asanblé-a !

8. Poukisa chak frè ké sò ki ka préché bon nouvèl-a gen bokou valò pou Jéova ?

⁸ Ès a sèlman frè-ya Jéova chwazi annan asanblé-a, ké sa-ya ki annan sèrvis a plen tan-an ki pouvé itil annan asanblé-a ? Non. Tout sa ki ka préché bon nouvèl-a gen bokou valò pou Jéova ké pou asanblé-a (Rom. 10:15 ; 1 Cor. 3:6-9). Pou byen di, pi gran travay asanblé-a gen pou fè a idé moun-yan divini disip nou Sényèr Jézi Kris (Mat. 28:19, 20 ; 1 Tim. 2:4). Tout sa ki annan asanblé-a, ki yé batizé ki yé pa batizé, ka éséyé bay sa travay-a prémyé plas annan yé lavi (Mat. 24:14).

9. Poukisa nou kontan nou sò-ya ?

⁹ Jéova ka bay nou sò-ya roun travay enpòrtan annan asanblé-a pou montré yé kouman yé gen valò pou li. I gen bokou rèspè pou yé paské yé ka sèrvi l’ ké fidélité, ki yé madanm maryé, ki yé manman, ki yé mari mouri ouben ki yé pa gen mari. Labib-a ka palé di roun patché madanm vayan Jéova té kontan. Labib-a ka di ki nou pouvé pran èkzanp asou yé paské yé  té gen sajès, lafwa, yé té ka sèrvi l’ ké bokou balan, yé té gen kouraj, yé té ka bay ké tout yé tchò é san konté (Luc 8:2, 3 ; Actes 16:14, 15 ; Rom. 16:3, 6 ; Phil. 4:3 ; Héb. 11:11, 31, 35). Nou lé di Jéova mèrsi paské annan nou asanblé, nou gen sò ki gen sa menm kalité-ya !

10. Poukisa nou kontan nou frè ké so ki ja granmoun annan asanblé-a ?

¹⁰ Nou kontan gen osi annan nou asanblé roun patché frè ké sò ki ja granmoun. Roun ran pasé tout yé lavi annan sèrvis Jéova. É pou rounòt ran i pa gen lontan yé anprann lavérité. Roun patché annan yé ka briga ké maladi laj ka mennen. Paské maladi gaté vayan yé pa pouvé fè sa yé lé annan asanblé-a, ni annan prédikasyon-an. Magré sa, yé ka fè sa yé pouvé annan prédikasyon-an é yé ka fè tousa yé pouvé pou ankourajé ké fòrmé ròt-ya. Nou tout ka profité di yé èspéryans. Pou Jéova yé bèl é pou nou osi ! (Prov. 16:31).

11-12. Kouman jennjan-yan annan to asanblé ka ankourajé to ?

¹¹ Annou palé osi di nou jennjan-yan. Lavi-a pa fasil pou yé paské yé ka grandi annan monn Satan ka dirijé-a ké tout mové lidé i lé fè yé asèpté (1 Jean 5:19). A pa ti ankourajman nou gen lò nou ka tandé yé komantèr, lò nou ka wè yé ka préché, é ka palé di yé lafwa ké kouraj ! Wi jennjan-yan, zòt gen roun plas enpòrtan annan asanblé Jéova-a ! (Ps. 8:2).

¹² Roun ran annan nou frè ké sò pa ka rivé krè ki yé pouvé fè roun bagaj pou asanblé-a. Kisa ki pouvé idé nou sir ki nou chak gen roun plas enpòrtan annan asanblé-a ? A sa nou ké wè aprézan.

13-14. Poukisa sèrten pa ka rivé krè ki yé gen valò pou asanblé-a ?

¹³ Annou wè roun dézyèm bagaj nou ka anprann annan èkzanp Pòl pran. Jòdla bokou moun pa ka rivé krè yé gen valò pou asanblé-a. Pòl di asou sa : « Si pyé-a  té ka di : “Kou mo pa sa roun lanmen, mo pa annan kò-a”, a pa pou sa i pa té ké annan kò-a. Si zorè té ka di : “Kou mo pa sa roun wéy, mo pa annan kò-a”, a pa pou sa i pa té ké annan kò-a » (1 Cor. 12:15, 16). Kisa Pòl té lé fè nou konprann ?

¹⁴ Si to ka konparé to kò ké ròt-ya annan asanblé-a to pa ké wè topa valò. I gen sa ki dòkò annan zafè fè diskour, annan zafè òrganizasyon ouben ròt ki sa dé bon bèrjé. Pitèt to ka di ki to pa vayan kou yé annan sa bagaj-ya. Sa ka montré ki to pa sa roun moun ki ka gonflé so lèstomak é to ka rékonnèt to limit (Phil. 2:3). Mé a pou to panga. Si to toujou ka konparé to kò ké sa ki vayan annan roun bagaj to ké dékourajé. Pitèt menm to ké santi kou Pòl ka di, ki to pa ka sèrvi anyen annan asanblé-a. Kouman to pouvé briga ké sa lidé-a ?

15. Dapré 1 Corinthiens 12:4-11, si nou vayan annan roun bagaj, kisa nou divèt rékonnèt ?

¹⁵ Annou réfléchi asou sa : annan lépòk 1^é syèk-a, Jéova té bay sèrten krétyen-yan lèspri sen pou yé té fè mirak. Mé a pa menm bagaj-ya yé tout té ka fè (li 1 Corinthiens 12:4-11). Jéova pèrmèt sa krétyen-yan fè dé bagaj diféran, mé yé chak té gen valò pou li. Jòdla, Jéova pa ka bay nou lèspri sen pou nou fè mirak, mé a menm lidé-a kanmenm : nou tout pa vayan annan menm bagaj-ya, mé nou chak nou gen valò pou Jéova.

16. Ki konsèy Pòl bay nou divèt swiv ?

¹⁶ Pasé nou konparé nou kò ké ròt-ya, miyò nou swiv sa konsèy Pòl bay-a : « A pou chak moun gadé sa i menm ka fè, é a konsa i ké pouvé kontan parapòrta li menm, é pa paské i ka konparé so kò ké rounòt moun » (Gal. 6:4).

17. Poukisa sa bon pou nou swiv konsèy Pòl bay-a ?

¹⁷ Si nou ka swiv èkzanp Pòl bay nou-a é si nou ka gadé sa nou menm ka fè, nou ké wè ki nou osi nou vayan annan  sèrten bagaj. Parèkzanp, roun ansyen ki pa djè vayan annan zafè fè diskour pouvé vayan pou idé moun batizé. Ouben ankò, pitèt roun ansyen pa ka rivé òrganizé so kò kou ròt ansyen-yan annan so asanblé, mé pitèt tout moun savé a roun bon bèrjé ki ka byen pran swen di ròt-ya, roun ansyen yé kontan alé wè, ki ka bay bon konsèy é ki kontan rousouvwè moun (Héb. 13:2, 16). Si nou konnèt annan ki bagaj nou vayan nou ké kontan ké sa nou ka fè annan asanblé-a. É nou pa ké jalou nou frè ké sò-ya ki ka rivé fè bagaj nou menm pa ka rivé fè.

18. Kouman nou pouvé divini pi vayan annan prédikasyon-an ?

¹⁸ Nou chak annan asanblé-a nou divèt lé divini pi vayan annan prédikasyon-an é fè roun pi bon travay pou Jéova. Pou idé nou fè sa, i ka fè so òrganizasyon bay nou pi bèl fòrmasyon i pouvé gen. Parèkzanp, annan nou réinyon annan simenn-an, yé ka bay nou konsèy asou fason pou nou pouvé divini pi fò annan prédikasyon-an. Ès to ka éséyé fè sa yé ka anprann to annan sa fòrmasyon-an ?

19. Kisa to pouvé fè pou to rivé alé annan lékòl pou évanjélizatèr Rwayonm-an ?

¹⁹ Lékòl pou évanjélizatèr Rwayonm-an ka bay moun-yan roun fòrmasyon yé pa ké janmen wè rounòt koté. A frè ké sò ki annan sèrvis a plen tan-an é ki gen ant 23 ké 65 lannen ki pouvé fè sa lékòl-a. Pitèt to ka di ki to pa ké jen rivé alé la. Pasé to rété asou sa ki ka anpéché to fè sa lékòl-a, marké asou roun papyé poukisa to lé fè sa lékòl-a. Apré sa, désidé kouman to ké rivé fè sa yé ka doumandé to fè pou alé annan sa lékòl-a. Ké Jéova, é si to ka travay rèd, to ké pouvé rivé fè sa to té pansé to pa té ké jen rivé fè.

20. Kisa Romains 12:6-8 ka anprann nou ?

²⁰ Annan Romains 12:6-8 (li), nou ka wè ki twrazyèm bagaj nou ka anprann annan èkzanp Pòl pran. Annan sa vèrsé-ya osi, Pòl ka montré ki chak moun annan asanblé-a vayan annan diféran bagaj. Mé sa kou-a, i ka di ki si nou vayan annan nenpòrt ki bagaj a pou nou itilizé sa pou fè asanblé-a vin pi fò é pi solid.

21-22. Kisa nou ka anprann ké sa Robèr ké Félis ka di ?

²¹ Annou wè sa ki rivé ké roun frè nou ké aplé Robèr. I té annan sèrvis a plen tan-an annan rounòt péyi lò yé doumandé l’ routounen annan Bétèl so péyi. Yé èspliké l’ ki a pa paské i pa té ka fè so travay byen ki yé té doumandé l’ chanjé koté i té ka sèrvi-a. Magré sa i di : « Pannan plizyèr mwa, mo santi kousidiré a té mo ki té mal fè roun bagaj. Plizyèr fwa mo sonjé lésé Bétèl-a. » Kouman Robèr rivé viré gen tchò kontan ? Rounòt ansyen fè li sonjé ki annan chak travay Jéova bay nou fè, i bay nou roun fòrmasyon, pou sa fòrmasyon-an sèrvi nou annan sa nou ka fè jòdla. Robèr konprann ki a té pou i arété gadé dèyè pou i mété so lèspri asou sa i té pouvé fè aprézan.

²² A menm bagaj-a ki rivé ké frè Félis Épiskopo. Li ké so madanm rousouvwè yé diplonm lékòl Galaad an 1956 ; apré sa yé voyé yé Bolivi annan sèrvis sirkonskripsyon-an. An 1964, yé fè roun timoun. Félis ka di : « Nou té gen chagren tèlman paské nou té divèt lésé koté nou té fika. A vré, mo pédi roun lannen ka pléré asou sa ki té rivé mo. Mé ké Jéova,  mo chanjé, mo té sa roun papa aprézan é mo désidé mété mo lidé asou sa nouvo travay mo té gen pou fè-a. » Ès to ka rousanti menm bagaj-a ké Robèr ouben Félis ? Ès to dékourajé paské to pa gen menm rèsponsabilité ki sa to té gen anvan ? Si a sa, to ké gen plis tchò kontan si to ka chanjé fason to ka pansé-a é si to ka mété to lidé asou sa to pouvé fè aprézan pou sèrvi Jéova ké to frè ké sò-ya. A pou to toujou gen bokou travay pou fè é sèrvi sa to konnèt fè pou idé ròt-ya. A konsa to ké gen tchò kontan paské to ké fè asanblé-a vin pi fò.

23. a) Kisa nou divèt pran tan fè ? b) Kisa nou ké wè annan artik ki ka vin dèyè-a ?

²³ Nou chak nou gen valò pou Jéova. I lé nou tout byen annan so fanmi. Atò, annou réfléchi asou sa nou pouvé fè pou fè nou frè ké sò-ya vin pi fò. Apré sa, annou fè sa nou pouvé pou fè sa nou désidé-a. Si nou ka fè sa, nou pa ké di nou pa gen nou plas annan asanblé-a. Mé kouman nou ka wè ròt-ya annan nou asanblé ? Kouman nou pouvé montré yé nou kontan yé ? A sa nou ké wè annan artik ki ka vin dèyè-a.