ARTIK POU ÉTIDYÉ 42
Kouman nou pouvé idé sa-ya ki ka étidyé Labib-a vansé pou yé rivé batizé ? (2è parti-a)
« A pou to toujou véyé sa to ka fè é kouman to ka ansényé moun-yan » (1 TIM. 4:16).
KANTIK 77 La lumière dans un monde enténébré
KOUTWÉY ASOU SA NOU KÉ WÈ *
1. Kouman nou savé ki gras a prédikasyon ké ansèyman-an, moun-yan pouvé sové yé lavi ?
GRAS a prédikasyon ké ansèyman-an, moun-yan pouvé sové yé lavi ! Kouman nou savé sa ? Annan Matthieu 28:19, 20, Jézi bay nou sa lòrd-a : « Fè disip [...], batizé yé. » Poukisa sa enpòrtan pou nou batizé ? Nou divèt batizé si nou lé sové. Roun moun ki lé batizé divèt sir ki a paské Jézi bay so lavi, é paské i résisité ki nou pouvé sové. A sa apot Pyèr di : « Batenm-an ka [...] sové zòt [...] gras a rézirèksyon Jézi Kris » (1 Pierre 3:21). Atò, lò roun nouvo disip ka batizé, aprézan i pouvé sové.
2. Dapré 2 Timothée 4:1, 2, ki kalité ansényan nou divèt sa ?
2 Pou fè disip, nou divèt sa roun « bon ansényan » (li 2 Timothée 4:1, 2). Poukisa ? Paské lò Jézi di nou ‘fè disip’ i di nou osi ‘ansényé yé’. Menm fason-an, apot Pòl di nou ‘kontinyé’ fè sa travay-a, ‘paské si nou ka fè sa, nou ké sové ni nou menm, ni sa-ya ki ka kouté nou’. Atò, i té gen rézon bay sa konsèy-a : « A pou to toujou véyé [...] kouman to ka ansényé moun-yan » (1 Tim. 4:16). Pou nou fè disip, nou divèt byen ansényé. A pou sa nou lé toujou divini pi vayan annan sa bagaj-a.
3. Kisa nou ké wè annan sa artik-a ?
3 Nou ka étidyé Labib-a ké milyon moun asou tout latè-a. Mé kou nou wè l’ annan artik simenn pasé-a, nou lé fè tousa nou pouvé pou idé ankò plis moun ki ka étidyé Labib-a pou yé batizé. Annan sa artik-a, nou ké wè senk ròt bagaj roun ansényan divèt fè pou idé so étidyan vansé pou i rivé batizé.
LÉSÉ LABIB-A PALÉ
Doumandé roun ansényan ki gen bokou èspéryans èspliké to kouman to pouvé lésé Labib-a palé pi byen * (gadé paragraf 4-6).
4. Poukisa roun ansényan divèt panga palé tròp lò i ka étidyé Labib-a ké roun moun ? (gadé nòt-a osi).
4 Nou ka anprann moun-yan vérité ki annan Paròl Bondjé-a é nou kontan sa vérité-ya. Atò, pitèt nou anvi palé di tousa nou konnèt san nou pa lésé anyen pou apré. Mé ki a Tourdégard-a, étid asanblé-a ouben roun léson biblik, moun-an ki ka dirijé l’ pa divèt palé tròp. Pou i lésé Labib-a palé, roun ansényan pa divèt èspliké tousa i konnèt asou roun vèrsé ouben asou rounòt bagaj * (Jean 16:12). Sonjé kantité konésans to té gen lò to batizé ké kantité konésans to gen jòdla. Pitèt sa tan-an, a sèlman sa ki pi enpòrtan annan Labib-a to té konnèt (Héb. 6:1). Sa pran to plizyèr lannen pou to rivé anprann tousa to konnèt jòdla ; atò, pa éséyé anprann to étidyan tout bagaj rounsèl kou.
5. a) Dapré 1 Thessaloniciens 2:13, kisa nou lé idé roun étidyan konprann ? b) Kouman nou pouvé ankourajé roun étidyan di sa i ka pansé asou sa i ka anprann ?
5 Nou lé ki moun-an ki ka étidyé Labib-a ké nou konprann ki sa i ka anprann, a pa nou ki ka di l’ mé a Paròl Bondjé-a (li 1 Thessaloniciens 2:13). Kouman nou pouvé idé l’ konprann sa ? Ankourajé to étidyan di sa i ka pansé asou sa i ka anprann. Pasé to èspliké l’ tout sé vèrsé-ya, doumandé to étidyan di to kouman li menm ka konprann yé. Idé li wè kouman i pouvé apliké konsèy Paròl Bondjé-a ka bay annan so lavi. Pozé li késyon ki ké fè li di sa i ka pansé ké sa i ka rousanti asou sèrten vèrsé zòt ka wè ansanm (Luc 10:25-28). Parèkzanp, doumandé li : « Kisa sa vèrsé-a ka anprann ou asou sa kalité-a ki Jéova gen ? », « Kouman sa vérité-a pouvé itil pou ou ? », « Kisa ou ka pansé di sa ou fin anprann-an ? » (Prov. 20:5). Nou pa lé étidyan-an ranmasé roun patché konésans, a pa sa ki pi enpòrtan. Mé pi enpòrtan-an, a ki i kontan é ki i apliké sa i ka anprann.
6. Si to ka étidyé Labib-a ké roun moun, poukisa détan sa byen pou to alé ké roun proklamatèr ki gen èspéryans ?
6 Si to ka étidyé Labib-a ké roun moun, détan ès to ka alé ké roun proklamatèr ki gen èspéryans ? Si to ka fè l’, doumandé li kouman i ka wè fason to ka dirijé léson-an, é si to ka byen lésé Labib-a palé. Si to lé divini roun pi bon ansényan, a pou to enb (gadé Actes 18:24-26). Doumandé li osi si i ka pansé ki étidyan-an ka byen konprann sa i ka anprann. É si to pa ké la pou dirijé léson-an pannan roun ouben plizyèr simenn, to pouvé doumandé li dirijé léson-an pou to. Konsa, étid-a ké kontinyé fèt chak simenn, é sa ké montré étidyan-an ki sa enpòrtan pou i étidyé Labib-a. Pa janmen di ki a to rounso ki pou dirijé léson-an. To lé sa ki miyò pou to étidyan : to lé i kontinyé anprann toujou plis asou lavérité é to lé i kontinyé alé douvan.
MONTRÉ KI TO KONTAN É KI TO KA KRÈ SA TO KA ANPRANN LI
Sèrvi èkzanp frè ké sò-ya pou idé to étidyan konprann kouman i pouvé apliké prensip Labib-a annan so lavi * (gadé paragraf 7-9).
7. Kisa ki ké idé moun-an nou ka étidyé Labib-a ké li kontan toubonnman sa i ka anprann ?
7 To étidyan bézwen santi ki to kontan é ki to ka krè sa Labib-a ka anprann nou (1 Thess. 1:5). Konsa, sa ké pi fasil pou i kontan sa i ka anprann. Pitèt, to pouvé menm èspliké li kouman prensip-ya ki annan Labib-a idé to annan to lavi. Konsa, i ké randé so kò kont ki annan Labib-a, i gen patché konsèy ki pouvé idé li osi annan so lavi.
8. Kisa to pouvé fè ankò pou idé to étidyan é poukisa sa byen pou to fè sa ?
8 To pouvé di to étidyan ki i gen frè ké sò ki jwenn menm problèm ké li é ki rivé tchenbé magré sa. Pitèt to pouvé mennen ké to roun proklamatèr ki ké ankourajé étidyan-an gras a so èkzanp. To pouvé osi trouvé plizyèr témwanyaj ankourajan asou jw.org, annan parti « La Bible transforme des vies * ». Artik ké vidéyo-ya to ké trouvé annan sa parti-a, ké idé to étidyan konprann ki, prensip ki annan Labib-a pouvé fè li gen roun lavi ki pi bèl.
9. Kouman nou pouvé ankourajé moun-an ki ka étidyé Labib-a ké nou palé ké so fanmi ké so zanmi di sa i ka anprann ?
9 Si to étidyan maryé ouben si i ka viv ké roun moun, ès sa moun-an ka étidyé Labib-a osi ? Si i pòkò ka étidyé Labib-a, to pouvé doumandé li vini ké zòt. Ankourajé to étidyan palé ké so fanmi ké so zanmi di sa i ka anprann (Jean 1:40-45). To pouvé doumandé li « Kouman ou té ké èspliké sa vérité-a bay ou fanmi ? » ouben « Ki vèrsé ou té ké itilizé pou montré roun zanmi ki sa lidé-a vré ? » A konsa to ké anprann to étidyan divini roun ansényan. Apré sa, lò i ké fè tousa Labib-a ka doumandé roun proklamatèr fè, i ké pouvé koumansé préché ké asanblé-a. To pouvé osi doumandé to étidyan si i konnèt roun moun ki té ké kontan étidyé Labib-a. Si i konnèt roun moun, pa trennen pou aplé moun-an. Montré li vidéyo Kouman roun léson biblik ka pasé ? * pou propozé li étidyé Labib-a ké to.
ANKOURAJÉ LI CHACHÉ GEN ZANMI ANNAN ASANBLÉ-A
Ankourajé to étidyan chaché gen zanmi annan asanblé-a * (gadé paragraf 10-11).
10. Dapré 1 Thessaloniciens 2:7, 8, ki kalité ansényan Pòl té sa é kouman nou pouvé imité li ?
10 Nou divèt montré moun-yan nou ka étidyé Labib-a ké yé-a ki nou kontan yé. A pou to wè moun-an ki ka étidyé ké to kou roun moun ki ké pitèt divini to frè ouben to sò (li 1 Thessaloniciens 2:7, 8). Sa pa fasil pou i lésé so zanmi ki pa Témwen Jéova é pou fè tousa i divèt fè pou adoré Jéova. A pou sa to divèt idé l’ trapé vré zanmi annan asanblé-a. A pou to menm sa roun zanmi pou li. Pa alé wè li sèlman pou léson biblik-a, alé wè li osi rounòt moman. Aplé li, voyé li roun mésaj, ouben alé wè li anvan jou léson biblik-a. A konsa to ké montré li ki to vréman kontan li.
11. Kisa nou lé roun étidyan jwenn annan asanblé-a ?
11 Roun dolo afriken ka di : « A tout roun vilaj ki ka lévé roun timoun. » Atò, nou pouvé di : « A tout roun asanblé ki ka fè roun disip. » A pou sa, roun bon ansényan ké fè frè ké sò-ya annan so asanblé konnèt so étidyan, é yé ké pouvé idé étidyan-an divini pi pròch ké Jéova. Konsa, étidyan-an ké pouvé pasé tan ké sèrvitèr Bondjé-ya, é sa frè ké sò-ya ké pouvé idé li divini pi bon zanmi ké Jéova é idé li lò i ké jwenn problèm. Nou lé ki chak étidyan santi ki i gen so plas annan asanblé-a, é ki i ka fè parti di nou fanmi èspirityèl. Nou lé ki lanmou i ka wè annan asanblé-a bay li anvi vini. Konsa, sa ké pi fasil pou li arété maché ké moun-yan ki pa ka idé l’ kontan Jéova (Prov. 13:20). Si zanmi i té gen anvan ka mété l’ asou koté, i ké savé ki i pouvé jwenn vré zanmi annan òrganizasyon Jéova-a (Marc 10:29, 30 ; 1 Pierre 4:4).
MONTRÉ POUKISA SA ENPÒRTAN DI VOUWÉ SO LAVI POU BONDJÉ É BATIZÉ
Piti piti, roun étidyan ki sensèr pouvé vansé jistan i rivé batizé (gadé paragraf 12-13).
12. Poukisa nou divèt di étidyan-an souvan kouman sa enpòrtan pou roun moun vouwé so lavi pou Bondjé é batizé ?
12 A pou to di to étidyan souvan kouman sa enpòrtan pou roun moun vouwé so lavi pou Jéova é batizé. Lò nou ka étidyé Labib-a ké roun moun, sa nou lé, a ki i adoré Jéova é ki i batizé. Si i ka étidyé Labib-a dipi plizyèr mwa, é èspésyalman si i ka vini annan réinyon-yan, i divèt konprann ki, si nou ka étidyé Labib-a ké li, a pou i anprann kisa i divèt fè pou i divini Témwen Jéova.
13. Kisa roun étidyan divèt fè pou i pouvé batizé ?
13 Piti piti, roun étidyan ki sensèr pouvé vansé jistan i rivé batizé. Pou koumansé, i ka anprann konnèt ké kontan Jéova, é i ka koumansé gen lafwa annan li (Jean 3:16 ; 17:3). I ka divini zanmi Jéova mé osi zanmi frè ké sò-ya annan asanblé-a (Héb. 10:24, 25 ; Jacq. 4:8). Apré sa, i ka lésé tout so vyé labitid-ya é i ka répanti so kò di so péché (Actes 3:19). An menm tan, so lafwa ka fè li palé di lavérité-a ké ròt-ya (2 Cor. 4:13). Pou fini, i ka vouwé so lavi pou Jéova é i ka batizé (1 Pierre 3:21 ; 4:2). A pa ti kontan tout asanblé-a kontan sa jou-a ! Pi to étidyan ka fè sa i divèt fè pou batizé, pi to divèt félisité l’ souvan, é ankourajé li kontinyé sa i ka fè.
PRAN TAN GADÉ SI TO ÉTIDYAN KA VANSÉ É SA I DIVÈT FÈ ANKÒ
14. Kouman roun ansényan pouvé savé si so étidyan ka vansé ?
14 A pou nou gen pasyans lò nou ka idé roun étidyan vansé pou i rivé batizé. Mé i gen roun moman, nou divèt chaché savé si i lé vréman adoré Jéova. Ès to wè sèrten bagaj ki ka montré ki i ka fè tousa i pouvé pou fè sa Jézi ka doumandé li fè ? Ouben, ès a jis konnèt i lé konnèt Labib-a ?
15. Ki késyon roun ansényan divèt pozé so kò pou savé si so étidyan paré pou batizé ?
15 Pran tan gadé si to étidyan ka vansé. Ès i ka di sa i ka rousanti pou Jéova ? Ès i ka priyè l’ ? (Ps. 116:1, 2). Ès i kontan li Labib-a ? (Ps. 119:97). Ès i ka vini chak simenn annan réinyon-yan ? (Ps. 22:22). Ès i ka fè chanjman annan so lavi ? (Ps. 119:112). Ès i koumansé palé di sa i ka anprann ké so zanmi épi ké so fanmi ? (Ps. 9:1). É pi enpòrtan-an, ès i lé divini Témwen Jéova ? (Ps. 40:8). Si i pa ka fè anyen di tousa, chaché savé tou dousman sa ki ka anpéché l’ vansé, épi palé ké li di sa jantiman mé franchman *.
16. Kisa ki pouvé fè to savé si to divèt arété étidyé Labib-a ké roun moun ?
16 Si to ka étidyé Labib-a ké roun moun, tanzantan doumandé to kò si to divèt kontinyé ouben si to divèt arété. Doumandé to kò : « Ès i ka préparé so léson ? Ès i kontan vini annan réinyon-yan ? Ès i lésé so vyé labitid-ya ? Ès i fini ké so rélijyon ? » Si i pa ka fè anyen di tousa, si to ka kontinyé étidyé Labib-a ké li, a kousidiré to té ka éséyé anprann roun moun najé menm si to savé i pa lé mouyé so kò ! Si roun étidyan pa djè kontan sa i ka anprann é si i pa paré pou fè chanjman annan so lavi, sa pa ka sèrvi anyen di étidyé Labib-a ké li !
17. Dapré 1 Timothée 4:16, kisa roun ansényan divèt fè ?
17 Fè disip, a roun rèsponsabilité ki enpòrtan pou nou. A pou sa nou lé idé nou étidyan vansé pou yé rivé batizé. Pou fè sa, nou ka lésé Labib-a palé é lò nou ka ansényé yé, nou ka montré yé ki nou kontan é ki nou ka krè sa nou ka anprann yé. Nou ka ankourajé yé chaché gen zanmi annan asanblé-a. É nou ka montré yé kouman sa enpòrtan pou yé vouwé yé lavi pou Bondjé é batizé, toupannan nou ka chaché wè si yé ka vansé. (Gadé ankadré-a « Sa roun ansényan divèt fè ».) Nou vréman kontan bay annan sa travay-a ki ka sové lavi moun ! A pou nou désidé fè tousa nou pouvé pou idé moun-yan nou ka étidyé Labib-a ké yé vansé pou yé rivé batizé !
KANTIK 79 Qu’ils tiennent ferme dans la foi !
^ § 5 Étidyé Labib-a ké roun moun, a roun bèl kado Jéova ka fè nou. Nou pouvé idé moun-an pansé ké aji kou Bondjé lé. Annan sa artik-a, nou ké wè ròt konsèy ki ké idé nou divini pi vayan lò nou ka ansényé.
^ § 4 Gadé artik « Pièges à éviter lors d’un cours biblique », annan Cahier Vie et ministère sèptanm 2016.
^ § 8 Ou ka trouvé l’ annan QUI SOMMES-NOUS ? > TÉMOIGNAGES ET ANECDOTES.
^ § 9 Asou JW Library®, alé annan MULTIMÉDIA > NOS RÉUNIONS ET NOTRE MINISTÈRE > OUTILS POUR LA PRÉDICATION.
^ § 15 Gadé artik-ya « L’amour et la reconnaissance pour Jéhovah mènent au baptême » ké « Es-tu prêt pour le baptême ? » annan La Tour de Garde mars 2020.
^ § 77 MEN SA NOU KA WÈ ASOU ZIMAJ : Roun sò ki gen èspéryans vini annan roun léson biblik ki roun sò ki pi jenn ka fè. Roun tibi tan apré, i ka èspliké li kouman i pouvé fè pou i pa palé tròp pannan léson-yan.
^ § 79 MEN SA NOU KA WÈ ASOU ZIMAJ : Pannan roun léson, madanm-an ki ka étidyé Labib-a ka anprann kouman i pouvé sa roun miyò madanm. Apré sa, i ka di so mari sa i anprann.
^ § 81 MEN SA NOU KA WÈ ASOU ZIMAJ : Sa menm madanm-an ka pasé roun bèl ti moman ké so mari koté frè ké sò i jwenn annan Sal di Rwayonm-an.
