Ès sa monn-an ké fini ?
Pitèt ou ja savé, Labib-a ka palé di lafen monn-an (1 Jean 2:17). Ès sa lé di ki tout moun asou latè-a ké disparèt ? Ès latè-a ké divini roun koté koté i pa gen anyen ni pyès moun ka viv, ouben ès i ké détrwi nèt ?
ASOU SA DÉ KÉSYON-YAN, LABIB-A KA RÉPONN : NON !
Sa ki pa ké disparèt
MOUN-YAN
Sa Labib-a ka di : Bondjé ‘pa kréyé latè-a pou anyen, mé i fè l’ pou moun viv asou l’’ (ISAÏE 45:18).
NOU PLANÈT
Sa Labib-a ka di : « Roun jénérasyon ka alé é rounòt ka vini, mé latè-a ké rété la pou tout-tan » (ECCLÉSIASTE 1:4).
SA SA LÉ DI : Dapré Labib-a, latè-a pa ké janmen détrwi é i ké toujou gen moun pou viv asou l’. Donk, kisa sa lé di « lafen monn-an » ?
RÉFLÉCHI ASOU SA : Labib-a ka konparé lafen monn-an ki ka vini ké roun lévènman ki pasé annan lépòk Noé. Annan sa lépòk-a, latè-a té « plen ké vyolans » (Genèse 6:13). Mé Noé li menm té sa roun moun ki jis. Donk, Bondjé lésé Noé ké so fanmi viv, mé i fè moun mové-ya mouri annan roun délij. Asou sa lévènman-an, Labib-a ka di : « Bondjé détrwi monn sa lépòk-a, i néyé l’ anba dlo » (2 Pierre 3:6). Sa jou-a, roun monn té fini. Mé kisa ki disparèt ? A pa latè-a, mé moun mové ki té asou l’. Donk, lò Labib-a ka palé di lafen monn-an, sa pa lé di ki a nou planèt ki ké détrwi. Mé a pito moun mové ki ka rété asou l’ ki ké disparèt ké tout sistèm yé mété an plas.
Sa ki ké disparèt
PROBLÈM KÉ MÉCHANSTÉ
Sa Labib-a ka di : « Roun ti moso tan ankò, é moun méchan pa ké la ankò ; to ké gadé koté yé té fika, é yé pa ké la. Mé a moun ki ka fè yé kò toupiti ki ké viv asou latè-a é yé ké pran plézi annan lapè i ké gen tout koté asou latè-a » (PSAUME 37:10, 11).
SA SA LÉ DI : Annan lépòk Noé, Délij-a pa fè méchansté-a disparèt pou tout-tan. Apré Délij-a, moun méchan roukoumansé randé lavi-a rèd pou lézòt. Mé titalò, Bondjé ké tiré tout méchansté-a. Kou sa-la ki ékri Psaume-an di, « Moun méchan pa ké la ankò ». Bondjé ké fè méchansté-a disparèt gras a so rwayonm, roun gouvèrnman pou tout latè-a ki annan syèl-a. Sa rwayonm-an ké dirijé moun-yan ki ké viv asou latè-a é ki kontan lajistis.
RÉFLÉCHI ASOU SA : Ès moun-yan ki ka dirijé monn-an ké asèpté rwayonm Bondjé-a ? Labib-a ka di non. Yé ké gen toupé opozé yé kò kont sa rwayonm-an (Psaume 2:2). Ki rézilta sa ké bay ? Rwayonm Bondjé-a ké ranplasé tout gouvèrnman imen-yan é « a li rounso ki ké rété pou tout-tan » (Daniel 2:44). Mé poukisa dominasyon imen-yan divèt disparèt ?
Nou vréman bézwen dominasyon imen-yan fini
Sa Labib-a ka di : « Moun-an ki ka maché-a, a pa li pou dirijé so pròp kò » (JÉRÉMIE 10:23).
SA SA LÉ DI : Bondjé pa kréyé imen-yan pou yé dirijé yé pròp kò. Yé pa ka rivé dirijé ròt imen-yan ni trapé roun solisyon pou yé problèm.
RÉFLÉCHI ASOU SA : Ansiklopédi Britannica Academic ka di ki i pa gen roun péyi ki pouvé « fini ké lèlmi nou ka jwenn asou tout latè-a kou parèkzanp moun ki maléré, lafamin, maladi, katastròf natirèl ké lagèr ouben ròt kalité vyolans ». Artik-a ka di osi ki, dapré roun ran moun, « sèl bagaj-a ki ké rivé réglé tout sa problèm-yan, a rounsèl gouvèrnman pou tout latè-a ». Mé, menm si tout gouvèrnman imen-yan té ka mété yé kò ansanm, a toujou menm imen enparfè-ya ki té ké dirijé monn-an, é yé pa pouvé trapé pyès solisyon pou problèm-yan nou soti palé-a. Rwayonm Bondjé-a sa sèl gouvèrnman-an ki ké pouvé réglé pou tout-tan tout problèm i gen asou latè-a.
Donk dapré Labib-a, lafen monn-an, sa lé di lafen sistèm malonèt nou ka wè jòdla-a, a pa roun bagaj moun ki bon divèt pè. Mé pito, nou divèt présé wè sa bagaj-a, paské Bondjé ké tiré sa vyé monn mové-a pou mété roun monn nouvo ki bèl toubonnman !
Kitan sa chanjman-an ké fèt ? Ou ké trapé répons Labib-a annan artik ki ka vini-a.
