KISA sa ka fè to lò roun zanmi to kontan bokou ka voyé roun lèt pou to ? Roun jou, disip Timoté rousouvwè roun lèt Pòl té voyé pou ankourajé li. Sa lèt-a annan Labib-a jòdla, a 2 Timothée. Timoté té dèt présé trapé roun koté byen trankil pou i té pouvé li sa so zanmi té gen pou di li. Pitèt i doumandé so kò : « Kouman Pòl fika ? Ès i ké bay mo konsèy asou fason mo divèt fè mo travay ? Ès i ké di mo kouman mo pouvé divini pi vayan lò mo ka préché é kouman mo pouvé idé ròt-ya pi byen ? » Kou nou ké wè l’, Timoté jwenn répons asou sa késyon-yan é, anplis di sa, i anprann roun patché ròt bagaj enpòrtan. Annan sa artik-a, nou ké wè déztrwa konsèy i gen annan sa lèt-a.

Lò Timoté koumansé li lèt Pòl té voyé pou li-a, lanmenm i santi kouman Pòl té kontan l’. Paské Pòl ka aplé l’ « mo pitit mo kontan » (2 Tim. 1:2). Timoté dèt té gen trant lannen konsa lò i rousouvwè sa lèt-a, bò d’ lannen 65 di nou lépòk, mé i té ja roun ansyen ki té gen bokou èspéryans. Sa té ka fè pasé dis lannen i té ka travay ansanm ké Pòl é i té anprann roun patché bagaj ké li.

Sa dèt ankourajé Timoté lò i wè Pòl té ka kontinyé tchenbé ké fidélité. Pòl té lajòl Ròm é i té savé ki yé té ké tchwé l’ titalò (2 Tim. 1:15, 16 ; 4:6-8). Mé i ékri : « Mo ka kontinyé sipòrté tout bagaj » (2 Tim. 2:8-13). Donk Timoté wè ki so zanmi té ka kontinyé gen kouraj. Lò i wè ki Pòl té ka kontinyé tchenbé, sa bay Timoté plis fòrs é sa pouvé bay nou plis fòrs osi.

Pòl ankourajé Timoté bay so sèrvis pou Bondjé bokou valò. I té lé i fè kado Bondjé té bay li-a ‘roupran kousidiré a té roun difé i té ka vanté’ (2 Tim. 1:6). Mo grèk yé ka sèrvi pou « kado » a mo kharisma. A roun kado yé ka fè roun moun ké bon tchò san i pa mérité l’. Timoté té rousouvwè sa kado-a lò yé té chwazi l’ pou fè roun  travay èspésyal annan asanblé-a (1 Tim. 4:14).

Kisa Pòl té lé Timoté fè ké sa kado-a ? Lò i wè ki Pòl té marké « roupran kousidiré a roun difé to ka vanté », Timoté pitèt sonjé roun difé bwa ki pouvé vin pi fèb. Lò difé a konsa, to divèt vanté l’ pou i fè roun gro difé épi pou i bay plis chalò. Roun diksyonèr ka èspliké ki vèrb grèk (anazopyreo) Pòl ka sèrvi isi-a lé di « vanté, fè roupran ». Sa vèrb-a pouvé sèrvi pou di « roubay roun moun balan, ouben motivasyon ». Pou byen di, Pòl té ka konséyé Timoté mété tout so tchò annan travay yé té bay li fè-a. Sa konsèy-a pou nou osi. Nou divèt sèrvi Bondjé ké bokou balan.

Toupannan i té ka li lèt so zanmi té voyé pou li, Timoté wè rounòt konsèy ki té ké idé li gen bon rézilta annan so ministèr. Men sa Pòl té ékri : « Gras a lèspri sen nou gen andidan nou, tchenbé sa bèl bagaj yé bay to-a » (2 Tim. 1:14). Ki bèl bagaj yé té bay Timoté ? Annan vèrsé 13-a, Pòl té ka palé di « bon paròl-ya », sa lé di lavérité ki annan Labib-a (2 Tim. 1:13). Kou i té minis Bondjé, Timoté té divèt ansényé frè ké sò-ya ké moun-yan annan so téritwar vérité-ya ki annan Paròl Bondjé-a (2 Tim. 4:1-5). Anplis di sa, kou i té ansyen, i té divèt pran swen di troupo Bondjé-a (1 Pierre 5:2). I té ké tchenbé bèl bagaj yé té bay li-a, sa lé di vérité-ya i té divèt ansényé, si i té ka konté asou lèspri Jéova ké so Paròl (2 Tim. 3:14-17).

Nou menm osi, yé bay nou tchenbé roun bèl bagaj, sa lé di : vérité-ya nou ka fè moun-yan konnèt lò nou ka préché (Mat. 28:19, 20). Nou pouvé kontinyé bay sa bèl bagaj-a bokou valò si nou ka kontinyé gen labitid priyè ké étidyé Paròl Bondjé-a (Rom. 12:11, 12 ; 1 Tim. 4:13, 15, 16). Anplis di sa, pitèt nou ansyen ouben sèrvitèr èspésyal a plen tan. Si a sa, sa bèl bagaj-a yé bay nou tchenbé divèt pousé nou fè nou kò toupiti é konté asou Jéova. Donk, nou pouvé tchenbé, ouben protéjé sa bèl bagaj-a si nou ka bay li valò é si nou ka doumandé Jéova idé nou lò nou ka fè travay yé bay nou fè-a.

Timoté té divèt osi fòrmé ròt-ya. A pou sa Pòl té ékri pou li : « Bagaj-ya to tandé mo di to [...], bay plizyèr wonm fidèl tchenbé yé, é yé menm apré sa ké adòk pou ansényé ròt-ya » (2 Tim. 2:2). Pòl fè Timoté sonjé ki i té divèt ansényé ròt frè-ya tout bagaj li menm té anprann. A sa chak ansyen jòdla divèt fè osi. Roun bon ansyen pa ka séré bagaj ki té ké itil pou ròt-ya savé : i ka byen montré yé kouman pou fè roun travay pou yé pouvé fè l’ yé menm. I pa pè yé konnèt plis bagaj ki li, ouben ki yé fè travay-a pi byen pasé li. I pa ké di yé jiskont sa yé bézwen savé. Sa i lé, a idé sa i ka fòrmé-ya rivé gen bon sans é byen konprann sitiasyon-yan, sa lé di divini krétyen ki gen èspéryans. Konsa, « wonm fidèl » i ka ansényé-ya ké pi itil ankò pou asanblé-a.

Sa lèt-a té divèt gen bokou valò pou Timoté. I dèt li ké rouli sa lèt-a ké réfléchi asou konsèy i té gen annan l’, é asou fason i té pouvé fè tousa i té pouvé pou swiv yé.

Nou menm osi nou lé swiv sa konsèy-a. Kouman nou pouvé fè sa ? Annou fè tousa nou pouvé pou fè kado Bondjé bay nou-a roupran kousidiré a roun difé nou té ka vanté, pou tchenbé bèl bagaj yé bay nou-a é pou anprann ròt-ya tousa nou konnèt. Konsa, nou ‘ké kontinyé fè travay yé bay nou fè-a ké tout nou fòrs’ kou Pòl ankourajé Timoté fè l’ (2 Tim. 4:5).