ANNAN vil Jérizalèm, i gen roun mizé koté i gen patché bagaj asou tout péyi yé ka palé annan Labib-a. Annan sa mizé-a, i gen roun ròch koté moun-yan marké roun bagaj bòd lannen 700 ké lannen 600 anvan Jézi Kris. Yé trouvé sa ròch-a annan roun gròt ki té ka sèrvi tonm tou pròch ké Ébron, an Israyèl. Men sa ki marké asou l’ : « A pou Yawé Sabaòt voyé malédiksyon asou Agaf piti Agav ! » Kouman sa ki marké asou sa ròch-a ka montré ki nou pouvé gen konfyans annan sa ki marké annan Labib-a ? Dapré sa ki marké asou ròch-a, non Bondjé, Jéova, yé ka ékri YHWH ké ansyen lèt Ébré-ya, té sa roun non tout moun té byen konnèt é té ka sèrvi touléjou annan lépòk Labib-a. I gen ròt bagaj yé trouvé annan plizyèr gròt ankò. Moun-yan té ka alé annan sa gròt-ya pou séré yé kò é yé té gen labitid marké non Bondjé asou mir-ya. Yé té ka marké osi non moun koté i té gen non Bondjé.

Rachel Nabulsi, roun profésò ki ka travay linivèrsité Jéòrji ka di asou sa bagaj-a : « YHWH ka rouvin souvan annan sa bagaj-ya ki marké. Sa ka anprann nou bokou bagaj. [...] Tèks-ya [annan Labib-a] ké bagaj-ya ki marké asou ròch-ya, ka montré kouman YHWH té enpòrtan annan lavi Israyèl ké Jida *. » A sa menm paské non Bondjé ka parèt milyé fwa annan Labib-a. Anplis di sa, a sa lépòk-a, moun-yan té souvan gen non Bondjé annan yépa non.

Sa ki marké asou ròch-a, « Yawé Sabaòt », lé di « Jéova chèf larmé-ya ». Nou pouvé di ki annan lépòk Labib-a, moun-yan té ka souvan sèrvi non Bondjé ké « Jéova chèf larmé-ya ». Nou ka konprann osi poukisa Labib-a ka sèrvi « Jéova chèf larmé-ya » 250 fwa annan Ékritir ébrayik-ya, èspésyalman annan liv Isaïe, Jérémie ké Zacharie.