1. Dapré Ecclésiaste 7:20, kisa Salomon di ?

 MEN SA rwa Salomon di : « I pa gen pyès moun ki jis asou latè-a ki toujou ka fè bon bagaj é ki pa janmen ka fè pyès péché » (Eccl. 7:20). A vré sa i di-a ! Nou tout ka péché (1 Jean 1:8). Sa ka rivé nou tout fè Bondjé ouben ròt-ya lapenn, donk, nou bézwen yé pardonnen nou.

2. Kisa nou ka rousanti lò roun bon zanmi ka pardonnen nou ?

² To dèt ka sonjé roun jou to fè roun bon zanmi lapenn. To té lé roudivini so zanmi, donk to doumandé li pardon ké tout to tchò. Kouman to santi to kò lò i pardonnen to ké tout so tchò ? To divèt té soulajé !

3. Ki késyon nou ké réponn annan sa artik-a ?

³ Nou tout lé Jéova sa nou pi bon zanmi, mé détan nou ka di ouben nou ka fè bagaj ki ka fè li lapenn. Alòr, kouman nou pouvé sir ki i lé pardonnen nou ? Poukisa nou pouvé di ki fason i ka pardonnen lontan miyò pasé fason nou menm nou ka pardonnen ròt-ya ? É pou fini, kimoun Jéova ka pardonnen ? Nou ké réponn sa késyon-yan annan sa artik-a.

4. Poukisa nou pouvé sir ki Jéova paré pou pardonnen ?

⁴ Labib-a ka di nou ki Jéova paré pou pardonnen. Lò i montré Moyiz kimoun i té sa asou montangn Sinayi-a, i  voyé roun zanj pou di li : « Jéova, Jéova, Bondjé ki plen ké pityé ké tandrès, i pa ka kouri faché, i plen ké lanmou fidèl é i toujou ka di lavérité ; i ka montré so lanmou fidèl pou roun patché moun é i ka pardonnen fot-a ké péché-a » (Ex. 34:6, 7). Jéova sa roun Bondjé ki bon é ki plen ké mizérikòrd ; i toujou paré pou pardonnen sa-ya ki péché é ki ka répanti (Néh. 9:17 ; Ps. 86:15).

5. Dapré Psaume 103:13, 14, kisa Jéova byen savé, é kisa sa ka pousé li fè ?

⁵ Kou a li ki fè nou, Jéova konnèt tout bagaj asou nou. To ka randé to kò kont : i konnèt tout ti bagaj asou chak moun asou latè-a ! (Ps. 139:15-17). Sa lé di ki i pouvé wè tout vyé défo nou pran koté nou papa ké nou manman. Anplis di sa, i savé tousa ki rivé nou annan nou lavi é ki fè nou divini moun-an nou sa jòdla. É kou i konnèt nou byen, kisa sa ka pousé li fè ? Sa ka fè li aji ké mizérikòrd ké nou (Ps. 78:39 ; li Psaume 103:13, 14).

6. Kouman Jéova montré ki i lé pardonnen nou ?

⁶ Jéova ja montré ki i lé pardonnen nou. I savé ki a akoz di sa Adan, prémyé wonm-an, fè ki nou tout ka péché é ki nou ka mouri (Rom. 5:12). I pa gen anyen nou pouvé fè pou soti anba sa é nou pa pouvé idé ròt-ya non plis (Ps. 49:7-9). Mé nou Bondjé ki kontan nou, montré so konpasyon pou nou. I fè roun bagaj pou libéré nou. Kisa i fè ? Kou nou ka li l’ annan Jean 3:16, i voyé so sèl Pitit mouri pou nou (Mat. 20:28 ; Rom. 5:19). Gras a sa, i pouvé libéré tout sa ki ka montré yé lafwa annan Jézi. I ka libéré yé di péché-a ké lanmò-a (Héb. 2:9). Sa dèt té rèd pou Jéova lò i wè kouman moun fè so Pitit ronté épi soufri anvan i mouri ! Jéova pa té ké janmen lésé l’ mouri si i pa té lé pardonnen nou.

7. Bay èkzanp moun annan Labib-a Jéova pardonnen.

⁷ Labib-a plen ké èkzanp moun Jéova pardonnen (Éph. 4:32). Kimoun to ka sonjé ? Pitèt to ka sonjé rwa Manasé. Sa mouché-a fè roun patché mové bagaj kont Jéova : I adoré fo bondjé é i ankourajé ròt-ya fè menm bagaj-a. I tchwé so pròp pitit é i bay yé an sakrifis pou fo  bondjé. É i jis mété roun zidòl annan tanp Jéova-a menm. Men sa Labib-a ka di asou li : « A pa ti mové bagaj i fè douvan Jéova pou provoké l’ » (2 Chron. 33:2-7). Mé, pita, lò i répanti vré, Jéova pardonnen li ké tout so tchò. I jis fè li roudivini rwa (2 Chron. 33:12, 13). Ouben pitèt to ka sonjé rwa David ki fè plizyèr péché ki té grav osi. Parèkzanp, i fè roun adiltèr épi i tchwé roun moun. Mé, lò David rékonnèt ki i té péché é i répanti vré, Jéova pardonnen li osi (2 Sam. 12:9, 10, 13, 14). Wi, nou pouvé sir ki Jéova paré pou pardonnen. É kou nou ké wè l’, fason Jéova ka pardonnen lontan miyò pasé fason nou menm nou ka pardonnen ròt-ya.

8. Poukisa Jéova a pi bon jij i pouvé gen ?

⁸ A Jéova ki « Jij tout latè-a » (Gen. 18:25). Roun jij divèt byen konnèt lalwa-a. Jéova byen konnèt lalwa-a paské i sa nou Jij mé anplis di sa, a li ki ka bay nou lalwa nou gen pou swiv (Is. 33:22). I pa gen pyès moun ki konnèt sa ki bon ké sa ki pa bon pi byen pasé Jéova. Ki ròt bagaj roun jij bézwen ? I bézwen konnèt tout bagaj asou roun sitiasyon anvan i pran roun désizyon. La ankò, Jéova sa pi bon jij i pouvé gen.

9. Di ki enfòrmasyon Jéova ka tchenbé kont pou i désidé si i ké pardonnen roun moun ?

⁹ Jéova pa kou jij-ya jòdla. I toujou konnèt tout bagaj annan nenpòrt ki sitiasyon i gen pou jijé (Gen. 18:20, 21 ; Ps. 90:8). I pa kou moun ki pouvé konté sèlman asou sa yé ka wè ouben sa yé ka tandé. I ka byen konprann tousa ki dèyè fason nou ka aji : ki kalité ké ki défo nou pran koté nou papa ké nou manman, fason nou lévé, koté nou ka rété é osi annan ki léta nou fika annan nou tchò ké annan nou tèt. Anplis di sa, i pouvé li annan nou tchò ; i byen savé sa ki ka pousé nou fè roun bagaj, sa nou ka prévwè fè ké sa nou anvi fè. I pa gen anyen nou pouvé séré pou Jéova (Héb. 4:13). Donk, lò Jéova ka pardonnen roun moun, a paské i konnèt tousa i gen pou savé asou sitiasyon-an.

10. Poukisa nou pouvé di ki jijman Jéova-ya toujou jis ? (Deutéronome 32:4).

¹⁰ Jijman Jéova-ya toujou jis. I pa ka fè préférans. I pa jen ka désidé pardonnen roun moun paské i jòlòt, paské i rich, paské tout moun konnèt li, ouben paské i konnèt fè roun patché bagaj (1 Sam. 16:7 ; Jacq. 2:1-4). Non, pyès moun pa pouvé mété présyon anlè Jéova ouben bay li soumaké anba tab (2 Chron. 19:7). I pa janmen ka pran désizyon paské i kòlè ouben san i pa réfléchi anvan (Ex. 34:7). A li ki pi bon jij i pouvé gen, paské i ka konprann tout bagaj asou nou ké nou sitiasyon (li Deutéronome 32:4).

11. Poukisa fason Jéova ka pardonnen lontan miyò pasé fason moun ka pardonnen ?

¹¹ Sa-ya ki ékri Ékritir ébrayik-ya té ka rékonnèt ki fason Jéova ka pardonnen, a pa kou lò moun ka pardonnen. Roun èspésyalis Labib-a ka di ki, détan, yé sèrvi roun mo ébré ki « rézèrvé èspésyalman pou palé di fason Bondjé ka pardonnen roun moun ki péché. Yé pa jen ka sèrvi sa mo-a pou palé di fason roun moun ka pardonnen rounòt moun paské fason Bondjé ka pardonnen lontan miyò  pasé fason moun ka pardonnen * ». A Jéova sèlman ki pouvé pardonnen konplètman roun moun ki péché é ki ka répanti. Mé ki bénédiksyon pardon Jéova-a ka mennen pou nou ?

12-13. a) Kisa nou ka rousanti lò Jéova ka pardonnen nou ? b) Pou konmyen tan Jéova ka pardonnen ?

¹² Lò nou ka asèpté ki Jéova pardonnen nou, nou ka antré annan roun « sézon soulajman ». Sa lé di ki nou ka viré gen lapè annan nou tchò ké roun bon konsyans. A sèlman lò « Jéova li menm » ka pardonnen nou, nou pouvé santi nou kò byen konsa (Actes 3:19). Lò Jéova ka pardonnen nou, i ka pèrmèt nou roudivini so zanmi kou anvan, é pou li, a kousidiré nou pa té jen péché.

¹³ Lò Jéova pardonnen nou péché, i fin ké sa : nou pa bézwen pè i fè nou pyès répròch ouben i pini nou pita (Is. 43:25 ; Jér. 31:34). Labib-a ka di nou ki i ka mété nou péché lwen di nou, menm fason « koté solèy-a ka lévé lwen di koté i ka kouché-a * » (Ps. 103:12). Lò nou ka sonjé fason Jéova ka pardonnen nou sa ka fè nou rété èstébékwé é sa ka plen nou tchò ké rékonésans (Ps. 130:4). Mé kimoun Jéova ka pardonnen ?

14. Kisa nou anprann asou pardon Jéova-a ?

¹⁴ Kou nou wè l’, Jéova pa ka gadé si péché-a grav ouben si i pa grav pou désidé si i ka pardonnen roun moun. Nou anprann osi ki i sa nou Kréyatèr, Sa-la ki ka bay nou lalwa ké nou Jij. Donk i ka sèrvi tousa i konnèt pou désidé si i ké pardonnen. Atò, di kisa i ka tchenbé kont ?

15. Dapré Luc 12:47, 48, kisa Jéova ka gadé pou désidé si i ké pardonnen roun moun ?

¹⁵ Men prémyé bagaj-a Jéova ka gadé pou désidé si i ké pardonnen : ès moun-an té savé ki sa i té ka fè pa té bon ? A sa lidé-a nou ka wè annan sa Jézi di annan Luc 12:47, 48 (li). Roun moun ki ka désidé fè roun bagaj ki pa bon,  toupannan i savé ki sa pa ka fè Jéova plézi, ka fè roun péché ki grav. Jéova pouvé désidé pa pardonnen sa moun-an (Marc 3:29 ; Jean 9:41). Mé, détan sa ka rivé nou tout fè bagaj nou savé ki pa bon. Ès nou pouvé èspéré ki Jéova ké pardonnen nou kanmenm ? Wi ! Annou wè aprézan rounòt bagaj Jéova ka gadé lò i ka désidé pardonnen roun moun.

16. A kisa ki répanti, é poukisa nou divèt répanti pou Jéova pardonnen nou ?

¹⁶ Men rounòt bagaj Jéova ka gadé : ès moun-an ka répanti vré ? Kisa répanti lé di ? Répanti, sa lé di chanjé lidé, chanjé fason nou ka réfléchi ouben sa nou lé fè. Sa lé di ki, si nou fè roun bagaj ki pa té bon, nou ka rigrété sa ouben si nou pa fè roun bagaj ki té bon, nou ka rigrété sa osi é nou tris pou sa. Mé moun-an ki ka répanti vré pa tris sèlman paské i fè roun mové bagaj, i tris osi paské i lésé so lanmityé ké Jéova vini fèb é akoz di sa, i fè roun mové bagaj. Sonjé ki ni Manasé ni David yé fè péché ki té grav. Pourtan, Jéova pardonnen yé paské yé répanti ké tout yé tchò (1 Rois 14:8). Donk, pou Jéova pardonnen nou, i divèt wè ki nou ka répanti vré. Mé a pa loutou di rigrété péché nou fè-a. A chanjé nou konpòrtman ki tout *. Annou palé di rounòt bagaj Jéova ka gadé.

17. A kisa ki tounen so kò, é poukisa nou divèt tounen nou kò si nou pa lé tonbé annan menm péché-ya ? (Isaïe 55:7).

¹⁷ Men roun trwazyèm bagaj enpòrtan : ès moun-an tounen so kò ? Roun moun ki ka tounen so kò, ka arété fè mové bagaj é i ka koumansé aji kou Jéova lé i aji (li Isaïe 55:7). I divèt chanjé fason i ka pansé-a épi lésé fason Jéova ka pansé aji asou li (Rom. 12:2 ; Éph. 4:23). I divèt byen désidé arété sonjé ké fè mové bagaj (Col. 3:7-10). A sèlman si nou gen lafwa annan sakrifis Jézi ki Jéova ké pouvé pardonnen nou é pirifyé nou di péché-a. I ké pèrmèt nou profité di tout bénédiksyon sa sakrifis-a  ka poté si i ka wè ki nou ka fè tousa nou pouvé pou chanjé nou konpòrtman (1 Jean 1:7).

18. Kisa nou anprann asou pardon Jéova-a annan sa artik-a ?

¹⁸ Annou rouwè déztrwa lidé enpòrtan nou wè annan sa artik-a. I pa gen pyès moun ki ka pardonnen kou Jéova. Poukisa nou pouvé di sa ? Prémyèrman, i toujou paré pou pardonnen. Dézyèmman, i konnèt nou byen. I byen savé kisa ki fè nou divini moun-an nou sa jòdla, é i pa gen pyès moun si a pa li ki pouvé di si nou ka répanti vré. É trwazyèmman, lò i ka pardonnen nou, i fin ké sa. Sa ka pèrmèt nou gen roun bon konsyans é fè li plézi.

19. Menm si nou ka kontinyé fè péché paské nou pa parfè, poukisa nou pouvé kontan ?

¹⁹ Nou savé ki tout tan nou pa ké parfè, nou ké kontinyé fè péché. Mé, sa nou ka li annan liv Étude perspicace des Écritures (volume 2), paj 765 pouvé ankourajé nou : « Jéova gen mizérikòrd, é i savé ki so sèrvitèr-ya fèb. Donk yé pa bézwen tris toulong pou fot yé ka fè akoz di péché-a (Ps 103:8-14 ; 130:3). Si yé ka fè tousa yé pouvé pou maché asou chimen Bondjé, yé pouvé kontan (Ph 4:4-6 ; 1Jn 3:19-22). » Lò nou savé sa, sa ka ankourajé nou !

20. Di kisa nou ké palé annan ròt artik-a ?

²⁰ Nou ka di Jéova mèrsi paské i paré pou pardonnen nou lò nou ka vréman rigrété bagaj nou fè ki pa bon. Mé kouman nou pouvé imité l’ annan zafè pardonnen ? Poukisa nou pouvé di ki fason nou ka pardonnen ka sanblé fason Jéova ka pardonnen ? É ki diférans i gen ant fason Jéova ka pardonnen ké fason nou menm nou ka pardonnen ? Poukisa sa enpòrtan pou nou konprann sa ? A sa nou ké wè annan ròt artik-a.