1. Ki bagaj nou pouvé pè ?

 NESTOR ké so madanm María * té lé alé sèrvi koté yé té bézwen plis moun. Pou yé té rivé fè sa, yé té divèt asèpté viv ké mwens soumaké. Mé yé té pè paské yé pa té sir ki yé té ké rivé kontan si yé té ka ganyen mwens soumaké. Biniam divini Témwen Jéova annan roun péyi koté yé ka anpéché nou adoré Bondjé kou nou lé. I konprann byen vit ki yé té pouvé pèrsékité li, é sa té ka fè li pè. Mé sa ki té ka fè l’ plis pè ankò, a té fason so fanmi té ké réyaji lò yé té ké vin savé ki i té chanjé rélijyon. Valérie anprann ki i té gen sa yé ka aplé roun cancer agressif, é i briga pou trapé roun dòktèr ki té ké asèpté opéré l’ san bay li disan. I té pè mouri, é nou ka konprann li.

2. Poukisa nou divèt fè tousa nou pouvé pou nou pa rété asou sa ki ka fè nou pè ?

² Ès to ja pran pè akoz di roun di sa bagaj-ya ? A sa ki rivé roun patché annan nou. Mé nou divèt anprann kontrolé nou kò lò nou pè paské, si nou pa ka fè sa, nou ka riské pran mové désizyon. Nou jis ka riské pran mové désizyon ki ké gaté nou lanmityé ké Jéova. É a sa menm Satan lé ! I ka éséyé osi fè nou pè pou nou dézobéyi lalwa Jéova, kou sa-la ki ka di nou préché bon nouvèl-a parèkzanp (Rév. 12:17). Satan méchan, i mové é i fò. Mé to pouvé tchenbé rèd douvan li. Kouman ?

3. Kisa ki ké idé nou pa rété asou sa ki ka fè nou pè ?

 ³ Si nou sir ki Jéova kontan nou é ki i òbò nou, nou ké pouvé tchenbé rèd douvan Satan (Ps. 118:6). Annou pran èkzanp moun-an ki ékri Psaume 118. I viv roun patché sitiasyon ki té rèd : I té gen roun patché lèlmi, é annan yé, i té gen grotchap (vèrsé 9 ké 10). Détan, i té anba bon présyon (vèrsé 13). É Jéova té korijé l’ byen rèd (vèrsé 18). Magré sa, men sa i chanté : « Mo pa ké pè. » Kisa ki té ka pèrmèt li santi so kò an sékirité ? I té savé ki menm si i té rouprann li, so Papa ki annan syèl-a té kontan li. I té sir ki kèlkéswa sa ki té ké rivé li, so Bondjé té ké toujou idé li (Ps. 118:29).

4. Si nou sir ki Jéova kontan nou, asou ki bagaj ki pouvé fè nou pè nou pa ké rété ?

⁴ Nou tout divèt sir ki Jéova kontan nou. Sa ké pèrmèt nou pa rété asou trwa bagaj ki pouvé fè nou pè : 1) pè pa gen asé soumaké pou bay nou fanmi sa i bézwen, 2) pè moun ké 3) pè mouri. Frè ké sò-ya nou palé annan prémyé paragraf-a rivé pa rété asou sa ki té ka fè yé pè, paské yé té sir ki Jéova té kontan yé.

5. Ki bagaj ki pouvé fè roun chèf fanmi enkyèt ? (gadé zimaj-a anlè prémyé paj-a).

⁵ Pou roun chèf fanmi krétyen, sa enpòrtan pou i pran swen di so fanmi (1 Tim. 5:8). Si to sa roun chèf fanmi, ès to té pè pédi to travay pannan sa pandémi-a ? Ès to té pè pa gen asé soumaké ankò pou bay to fanmi manjé ouben pou péyé kaz-a ? Ouben, si to té ka pédi to travay, ès to té pè pa trouvé rounòt ? Ouben ankò, kou Nestor ké María nou ja palé anvan, ès to réfléchi bokou anvan to fè chanjman ki té ké fè to ganyen mwens soumaké ? Malérèzman, Satan ka profité di sa kalité bagaj-ya ki ka fè nou pè. É gras a sa, i ka rivé fè moun arété sèrvi Jéova.

6. Kisa Satan té ké lé fè nou krè ?

⁶ Satan té ké lé fè nou krè ki Jéova pa ka gadé pou nou é ki nou pa pouvé konté asou li pou i idé nou bay nou fanmi sa i bézwen. Akoz di sa, nou pouvé pansé ki nou divèt fè tousa ki fo pou nou pa pédi nou travay menm si sa lé di dézobéyi lalwa Jéova.

7. Di kisa Jézi ka pèrmèt nou sir ?

⁷ Jézi ka di nou ki nou Bondjé ‘savé sa nou bézwen anvan menm nou vin doumandé li’ (Mat. 6:8). É i konnèt Papa-a pi byen pasé pyès moun. I savé ki Jéova paré pou bay nou sa nou bézwen. Anplis di sa, kou nou krétyen, nou ka fè parti di fanmi Bondjé. É, kou a Jéova ki chèf sa fanmi-a, nou pouvé sir ki i ké rèspèkté èkzaktéman sa i ka doumandé chèf fanmi-ya fè annan 1 Timothée 5:8.

8. a) Kisa ki ké idé nou pa pè pa gen asé soumaké pou nou bay nou fanmi sa i bézwen ? (Matthieu 6:31-33). b) Asou foto-a ki ka alé ké paragraf 8-a, kisa frè-a ké so madanm ka fè, é kouman nou pouvé imité yé ?

⁸ Si nou sir ki Jéova kontan nou é ki i kontan nou fanmi, nou ké sir osi ki i ké bay nou sa nou bézwen (li Matthieu 6:31-33). Jéova lé bay nou sa nou bézwen é ki ka fè l’ san konté, ké bokou lanmou ! Lò i fè latè-a, i bay nou plis ki sa nou bézwen pou rété vivan. A ké bokou lanmou i plen latè-a ké bagaj pou fè nou plézi (Gen. 2:9). Menm si détan sa  nou gen-an jiskont, a pou nou sonjé ki si nou ka rivé gen sa nou bézwen, a gras a Jéova (Mat. 6:11). Nou pa divèt bliyé ki tout sakrifis nou ka fè jòdla pa anyen òbò sa nou Bondjé ki kontan nou ka bay nou jòdla é ké bay nou dimen. A sa Nestor ké María konprann (Is. 65:21, 22).

9. Kisa èkzanp Nestor ké María ka anprann nou ?

⁹ Nestor ké María té gen roun bon ti travay ké roun bèl ti kaz an Kolonbi. Yé ka di : « Nou té lé vandé sa nou té gen é fè plis pou Jéova, mé nou té pè paské nou pa té sir ki nou té ké kontan si nou té ka ganyen mwens soumaké. » Kisa ki idé yé arété pè ? Yé réfléchi asou tousa Jéova té ja fè pou montré yé ki i té kontan yé. Kou yé té sir ki Jéova té ké toujou pran swen di yé, yé lésé yé bon ti travay, yé vandé yé kaz é yé déménajé annan roun koté annan péyi-a koté yé té bézwen plis moun pou préché. Ès yé rigrété désizyon yé pran-an ? Nestor ka di : « Nou wè ki sa Matthieu 6:33 ka di, vré. Nou pa janmen manké anyen, é jòdla nou pi kontan pasé anvan. »

10. Poukisa nou ka konprann ki moun pouvé pè yé konpanyen ?

¹⁰ Dipi Adan ké Èv tounen yé do bay Jéova, moun-yan ka fè yé konpanyen méchansté (Eccl. 8:9). Parèkzanp, bokou moun ka sèrvi otorité yé gen-an pou fè ròt-ya méchansté. Roun patché moun méchan ka fè bagaj ki mové. Timoun ka malmennen yé kanmarad lékòl, yé ka jouré yé é yé ka ménasé yé. É roun ran jis ka malmennen yé fanmi. Donk, moun blijé pè yé konpanyen. Kouman Satan ka éséyé sèrvi sa kont nou ?

11-12. Kouman Satan ka sèrvi zafè pè moun kont nou ?

¹¹ Satan ka sèrvi zafè pè moun pou fè nou arété préché, ouben pou fè nou arété fè sa Jéova ka doumandé nou fè. I ka pousé roun ran gouvèrnman défann nou adoré Jéova é pèrsékité nou (Luc 21:12 ; Rév. 2:10). Annan monn Satan-an, roun patché moun ka di bagaj ki pa vré. Yé ka manti asou nou pou fè nou trapé problèm. Détan sa-ya ki ka krè sa manti-ya pouvé ari nou ouben menm malmennen nou (Mat. 10:36). Ès sa Satan  ka fè ka étoné nou ? Non, sa pa ka étoné nou pyès. I ja fè sa annan 1^é syèk-a (Actes 5:27, 28, 40).

¹² Mé zafè pè gouvèrnman-yan pèrsékité nou, a pa sèl bagaj Satan ka sèrvi. Sèrten pè pran kou, mé sa yé plis pè ankò, a fason yé fanmi ké réyaji lò yé ké vin savé ki yé chanjé rélijyon. Yé kontan yé fanmi. Yé lé yé menm osi konnèt Jéova épi kontan li. É sa ka fè yé lapenn lò yé ka tandé yé fanmi dérèspèkté vré Bondjé-a ké sa-ya ki ka adoré l’. A vré, i gen sa ki té kont roun moun ki té Témwen annan yé fanmi, épi finalman yé divini Témwen yé menm osi. Mé kouman nou té ké réyaji si nou fanmi pa té lé wè nou ankò akoz di sa nou ka krè aprézan ?

13. Si nou sir ki Bondjé kontan nou, kouman sa pouvé idé nou lò nou fanmi ka baré nou chimen ? (Psaume 27:10).

¹³ Sa ki marké annan Psaume 27:10 pouvé ankourajé nou lò nou fanmi ka baré nou chimen (li). Si nou ka sonjé ki Jéova kontan nou bokou, nou pa ké pè sa ki ké pouvé rivé nou, é nou ké sir ki Jéova ké rékonpansé nou si nou ka tchenbé. Jéova ké bay nou tousa nou bézwen pou viv, i ké idé nou pou nou kontan, pou nou rété kalm é pou nou rété pròch ké li. I ké fè sa pi byen pasé pyès moun. A sa Biniam, nou ja palé anvan, konprann.

14. Kisa èkzanp Biniam ka anprann nou ?

¹⁴ Biniam divini Témwen Jéova menm si i té savé ki gouvèrnman-an annan so péyi té ka pèrsékité Témwen Jéova-ya. Kou i té sir ki Jéova té kontan li, annou wè kouman sa idé l’ pa pè moun. I ka di : « Pèrsékisyon-an té pi mové pasé sa mo té ka pansé, mé sa mo té pè pasé pèrsékisyon gouvèrnman-an, a té opozisyon mo fanmi. Mo té pè fè mo papa lapenn paské mo té divini Témwen Jéova é mo té pè ki mo fanmi pansé ki mo té sa roun bonnaryen. » Magré sa, Biniam té sir ki Jéova toujou ka pran swen di sa-ya i kontan. I ka di : « Mo réfléchi asou sa Jéova té fè pou idé frè ké sò ki té gen problèm soumaké ouben problèm akoz di moun ki pa té kontan yé ouben ankò problèm akoz di moun ki té ka fè yé méchansté. Mo té sir ki si mo té ka rété fidèl douvan Jéova, i té ké béni mo.  Yé arété mo plizyèr fwa, é yé jis fè mo patché mizè. Mé chak fwa, mo wè ké mo pròp wéy ki Jéova ka idé nou lò nou annan malò si nou ka rété fidèl douvan li. » Jéova montré Biniam ki i té sa roun vré papa pou li, é so sèrvitèr-ya montré ki yé té sa roun vré fanmi pou li.

15. Poukisa sa nòrmal si nou pè mouri ?

¹⁵ Labib-a ka di ki lanmò a roun lèlmi (1 Cor. 15:25, 26). Nou pouvé enkyèt lò nou ka sonjé lanmò, èspésyalman lò nou ouben roun moun nou kontan byen malad. Poukisa nou pè mouri ? Paské Jéova fè nou pou nou anvi viv pou tout-tan (Eccl. 3:11). Lò nou pè mouri, sa pouvé idé nou protéjé nou lavi. Parèkzanp, sa pouvé idé nou désidé pa manjé kochondri, fè èspòr, alé wè roun dòktèr ouben pran médikaman lò nou bézwen pran médikaman épi osi pa mété nou lavi an danjé pou anyen.

16. Kouman Satan ka profité di zafè pè mouri-a ?

¹⁶ Satan savé ki nou kontan lavi é i ka di ki nou té ké paré bay tousa nou gen, menm nou lanmityé ké Jéova, sèlman pou nou pa mouri (Job 2:4, 5). Sa i ka di pa vré menm ! Mé kou i sa « sa-la ki pouvé fè moun mouri », i ka éséyé profité di sa zafè pè mouri-a pou fè nou lésé Jéova (Héb. 2:14, 15). Détan, sèrten moun ki anba pouvwar Satan ké ménasé tchwé nou si nou pa lé lésé nou lafwa. Ouben détan, Satan ké profité di roun sitiasyon koté nou lavi an danjé pou fè nou dézobéyi Jéova. Parèkzanp, dòktèr-ya ouben nou fanmi pouvé mété présyon anlè nou pou nou asèpté pran disan, é konsa nou té ké dézobéyi lalwa Bondjé. Ouben roun moun pouvé éséyé fè nou asèpté roun trètman ki pa ka alé ké prensip-ya ki annan Labib-a.

17. Dapré Romains 8:37-39, kisa ki pouvé idé nou si nou pè mouri ?

¹⁷ Nou pa lé mouri. Mé nou savé ki menm si nou ka mouri, Jéova pa ké janmen arété kontan nou (li Romains 8:37-39). Lò so zanmi ka mouri, Jéova ka gardé yé annan so mémwè kousidiré yé té vivan toujou (Luc 20:37, 38). I présé roubay yé lavi (Job 14:15). Jéova péyé chè pou nou « gen lavi pou tout-tan » (Jean 3:16). Nou savé kouman Jéova kontan nou é ka pran swen di nou. Donk, pasé nou lésé Jéova lò nou malad ouben lò nou ka riské mouri, nou ka konté asou li pou i konsolé nou, pou i bay nou sajès ké fòrs. A sa Valérie ké so mari fè (Ps. 41:3).

18. Kisa èkzanp Valérie ka anprann nou ?

¹⁸ Lò i té gen 35 an, Valérie anprann ki i té gen sa yé ka aplé roun cancer agressif ké rar. Gadé kouman lanmou i té gen pou Jéova idé l’ menm si i té pè mouri. I ka di : « Lò mo anprann mo té malad, nou lavi chanjé rounsèl kou. Mo té bézwen roun gro opérasyon pou mo pa té mouri. Mo alé wè roun patché dòktèr, mé yé tout réfizé opéré mo san yé pa bay mo disan. Mo té pè, mé mo té byen désidé rèspèkté lalwa Bondjé é pa pran disan. Pannan tout mo lavi, Jéova té montré mo souvan ki i té kontan mo. Aprézan mo té gen lokazyon montré li mo lanmou pou li. Chak kou roun dòktèr té ka bay mo roun mové nouvèl, mo té pi désidé ankò fè nen Jéova gonflé é pa lésé Satan ganyen. Finalman yé opéré mo san yé pa bay mo disan, é opérasyon-an  byen maché. Mo malad toujou, mé Jéova toujou bay nou sa nou té bézwen. Parèkzanp, anvan mo anprann mo té malad, pannan réinyon lafen simenn-an, nou té wè artik-a “Affrontons les difficultés de la vie avec courage *”. Sa artik-a ankourajé mo ké mo mari bokou. Nou li l’ épi nou rouli l’ ankò. Nou rivé rété kalm épi pran bon désizyon gras a sa kalité artik-ya é paské nou kontinyé fè bagaj kou préché ké alé annan réinyon-yan. »

19. Ki soulajman nou ké gen titalò ?

¹⁹ Gras a Jéova, roun patché krétyen asou tout latè-a rivé tchenbé annan sitiasyon ki té rèd, é yé rivé pa bay Djab-a pyès chans (1 Pierre 5:8, 9). To menm osi to pouvé rivé fè l’ ! Titalò, Jéova ké di Jézi ké sa-ya ki ka dirijé ké li « détrwi travay Djab-a » (1 Jean 3:8). Apré sa, sa-ya ki ka adoré Bondjé asou latè-a pa ké ‘bézwen pè anyen é i pa ké gen anyen ki ké fè yé pè’ (Is. 54:14 ; Mich. 4:4). Mé anvan sa jou-a rivé, nou divèt travay rèd pou nou rivé pa rété asou sa ki ka fè nou pè !

20. Kisa nou divèt fè pou nou rivé pa rété asou sa ki ka fè nou pè ?

²⁰ Nou divèt plis sir ankò ki Jéova kontan nou é ki i lé protéjé nou. Pou nou rivé fè sa, annou pran tan réfléchi asou sa i fè pou idé so sèrvitèr-ya tan-lontan é annou palé tout moun di sa. Annou sonjé osi sa i fè pou idé nou lò nou té annan malò. Ké Jéova, nou pouvé rivé pa rété asou sa ki ka fè nou pè ! (Ps. 34:4).